އެސްޓޯނިއާގެ ޑިޖިޓަލް ޓްރާންސްފޯމޭޝަނަކީ ހަރުދަނާ އަދި ދެފުށް ފެންނަ ވެރިކަމެއްގެ ނަމޫނާއެއް ކަމަށާއި ދިވެހިރާއްޖެއިން އެ ނަމޫނާ ބަލައިގަންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ އެސްޓޯނިއާއަށް ކުރައްވާ ރަސްމީ ދަތުރުފުޅު ނިންމަވާލައްވައި، 'އެކްސް'ގައި ކުރެއްވި ޕޯސްޓެއްގައެވެ.
އެ ޕޯސްޓުގައި ވަނީ އެސްޓޯނިއާއިން އެމަނިކުފާނު ފުރާވަޑައިގަންނަވަނީ ވަރަށް ވެސް އުންމީދާއެކު ކަމަށެވެ. އެގޮތުން އެ ދަތުރުފުޅުގައި ހޯދާފައިވާ ކާމިޔާބީއަކީ ރާއްޖެއަށް ވަރަށް ބޮޑު ހިތްވަރެއް ކަމަށް އެމަނިކުފާނު ވިދާޅުވިއެވެ.
އެ ދަތުރުފުޅަކީ ދެ ގައުމުގެ ދެމެދުގައި ގުޅުން ބަދަހިކުރުމުގެ އާ ހަރުފަތެއް ކަމަށާއި، އުފެއްދުންތެރި ބައްދަލުވުންތަކާއި، ސިޔާސީ މަޝްވަރާތަކުގެ އިތުރުން މުހިންމު އެއްބަސްވުންތަކެއްގައި ސޮއިކުރެވުނުކަން އެމަނިކުފާނު ފާހަގަކުރެއްވިއެވެ.
ޚާއްސަގޮތެއްގައި އެސްޓޯނިއާގެ 'އިނޮވޭޓިވް ޑިޖިޓަލް ޓްރާންސްފޯމޭޝަނަކީ' ހަރުދަނާ އަދި ދެފުށް ފެންނަ ވެރިކަމެއް ހިންގުމަށް ދުނިޔޭގެ ނަމޫނާއެއް ކަމަށް ރައީސް ވިދާޅުވިއެވެ. އަދި ރާއްޖެއަށް އެކަމުން އިބުރަތް ހާސިލުކުރުމުގެ ފުރުސަތު ލިބިވަޑައިގަތީތީ އެކަމަށް ޝުކުރުވެރިވާ ކަމަށް އެމަނިކުފާނު ވިދާޅުވިއެވެ.
"ރާއްޖޭގެ ޑިޖިޓަލް ގަވަނަންސް ހަރުދަނާކުރުމަކީ، އަޅުގަނޑުގެ ސަރުކާރުން ވަރަށް ބޮޑު އިސްކަމެއް ދެއްވާ ކަމެއް. އެހެންވީމާ، މި ދަތުރުފުޅުގެ އެންމެ ބޮޑު އެއް ބޭނުމަކީ އެއީ،" ރައީސް ވިދާޅުވިއެވެ.
މި ދަތުރުފުޅުގައި، ސިޔާސީ މަޝްވަރާ ކުރުމަށާއި ސައިބަސެކިއުރިޓީ ދާއިރާއިން ދިވެހި ސަރުކާރާއި އެސްޓޯނިއާ ސަރުކާރާ ދެމެދު ދެ ފަހުމުނާމާއެއްގައި ވަނީ ސޮއިކޮށްފައެވެ.
މި ދަތުރުފުޅަކީ އެސްޓޯނިއާގެ ރައީސް ޑރ. އަލާރް ކަރިސްގެ ދައުވަތަކަށް ރައީސް މުއިއްޒު އެ ގައުމަށް ކުރެއްވި ދަތުރުފުޅެކެވެ.
އެ މަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.