އިލެކްޝަންސް ކޮމިޝަން (އީސީ)ގެ މެންބަރުކަމަށް އައްޔަންކުރަން ރައްޔިތުންގެ މަޖިލީހަށް ފޮނުއްވާފައިވާ ދެ ބޭފުޅުންގެ ނަން، މަޖިލީހުގެ އިއްތިފާގުން މިއަދު ފާސްކޮށްފިއެވެ.
އީސީގެ މެންބަރުކަމަށް ފޮނުއްވާފައިވާ ދެ ނަމަކީ:
- މުހައްމަދު ޒާހިދު
- އަބްދުއްރަހްމާން ސަލާހް ރަޝީދު
އީސީގެ މެންބަރުކަމަށް ދެ ބޭފުޅުން އައްޔަންކުރުމާ މެދު މަޖިލީހުގެ މިއަދުގެ ޖަލްސާގައި ނެގި ވޯޓުގައި ދެ ބޭފުޅުން ވެސް މެންބަރުކަމަށް އައްޔަންކުރަން ވޯޓުގައި ބައިވެރިވެވަޑައިގެން 68 މެންބަރުންގެ އިއްތިފާގުން ވަނީ ފާސްކޮށްފައެވެ.
އީސީގެ ދެ މަގާމެއް ހުސްވީ މަގާމުގެ މަސްއޫލިއްޔަތު އަދާކުރުމުގައި އިހުމާލުވެ، ގާނޫނާ ޚިލާފު އެތައް ކަމެއް ކުރިކަމުގެ ބޮޑެތި ތުހުމަތުތަކާ އެކު އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަނީ މަގާމުން ވަކިކުރުމުންނެވެ.
މުހައްމަދު ޒާހިދު ވަނީ މީގެ ކުރިން ހިއުމަން ރައިޓްސް ކޮމިޝަން (އެޗްއާރްސީއެމް)ގެ ނައިބު ރައީސްކަން ކުރައްވާފައެވެ. އޭނާ އެ މަގާމުން ވަކިކުރީ 2020ވަނަ އަހަރެވެ. އޭގެ ކުރިން އޭނާ ވަނީ އެޗްއާރްސީއެމްގެ މެންބަރުކަން ވެސް ކުރައްވާފައެވެ. އަދި، ޖެންޑާ މިނިސްޓްރީގެ ޑެޕިއުޓީ މިނިސްޓަރުކަން ވެސް ކުރައްވާފައިވެއެވެ.
ޞަލާހަކީ މީގެ ކުރިން އީސީގެ ސެކެރެޓްރީ ޖެނެރަލްގެ މަގާމު ފުރުއްވާފައިވާ ބޭފުޅެކެވެ. އަދި، ހޯމް މިނިސްޓްރީގެ ޕާމަނަންޓް ސެކެރެޓްރީގެ މަގާމު ވެސް އޭނާ ވަނީ މީގެ ކުރިން އަދާކުރައްވާފައެވެ.