ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ގެ ޑާޓާބޭސް ބޭނުންކޮށްގެން ޕީއެންސީއަށް މެމްބަރުން އިތުރުކުރަން ވަގު ފޯމު ހުށަހެޅިކަމަށް ބުނާ މައްސަލައިގައި ހޯމް މިނިސްޓަރު އަލީ އިހުސާނު މަގާމުން އެކަހެރި ކުރަން އިދިކޮޅު މައި ޕާޓީ އެމްޑީޕީން މިއަދު ގޮވާލައިފިއެވެ.
އެޕާޓީން ނެރުނު ބަޔާނެއްގައި ވަނީ، ޕީއެންސީއަށް މެމްބަރުން އިތުރުކުރަން ހިންގި ހަރަކާތުގައި ސައްހަ ނޫން ފޯމުތައް އިލެކްޝަންސް ކޮމިޝަން (އީސީ)އަށް ހުށަހަޅާފައި ވާކަން އެ ޕާޓީން އަމިއްލައަށް އިއުތިރާފުވެފައިވާތީ އާއި ކޮމިޝަންގެ ބަހުން ޝައްކެއް ނެތް މިންވަރަށް އޮޅުން ފިލާކަމަށެވެ.
މިކަން ހިނގީ އެކި ފަރާތްތަކުން ހުށަހަޅާ ފޯމުގެ ސައްހަކަން ކަށަވަރު ކުރުމުގެ ގާބިލުކަން އެ ޕާޓީގައި ނެތުމުން ކަމަށް ޕީއެންސީން ވަނީ ބުނެފައެވެ. ނަމަވެސް، މިއީ އެ ޕާޓީން ރާވައިގެން ގަސްތުގައި ހިންގި ޖަރީމާއެއް ކަމަށް އެމްޑީޕީން ވަނީ ސިފަކޮށްފައެވެ.
ސޯޝަލް މީޑިއާގާއި ދައުރުވާ ފޮޓޯތަކުން ފެންނަ ގޮތުގައި ޑީއެންއާރުގެ މުވައްޒަފުން މިކަން ކުރީ މިނިސްޓަރުގެ ސީދާ ބެއްލެވުމުގެ ދަށުން ކަމަށާއި، މިކަމުގައި ހޯމް މިނިސްޓަރު އިހުސާނުގެ ދައުރެއްވާކަމަށް ތުހުމަތުކޮށް އެމްޑީޕީން ވަނީ އެކަން ކުށްވެރިކޮށްފައެވެ.
"ވަޒީރުންނަކީ ގާނޫނުއަސާސީއާއި ރައްޔިތުންގެ ހައްގުތަކަށް ރައްކާތެރިވުމަށް މާތްﷲ ގަންދީ ހުވައެއް ކޮށްގެން އެ މަގާމާ ހަވާލުވާ ބަޔަކަށް ވާއިރު، އެކިއެކި ޚިދުމަތްތަކަށް އެދިގެން ދިވެހި ސަރުކާރަށް ލިޔެކިޔުން ހުށަހަޅާ ދިވެހިރައްޔިތުންގެ ޒާތީ މައުލޫމާތުން ވައްކަންކުރުމުގައި މިނިސްޓަރު އިހުސާނުގެ ބައިވެރިވުން އޮތްކަމީ އެ ވަޒީރު ކުރެއްވި ހުވަޔާ ވެސް ޚިލާފު އަމަލެއް،" އެ ބަޔާނުގައި ވެއެވެ.
އެމްޑީޕީން ވަނީ މިކަން ތަހުގީގު ކުރުމަށް ދިވެހި ފުލުހުންގެ ޚިދުމަތަށް ގޮވައިލާފައެވެ. އަދި މިނިސްޓަރު އިހުސާނަކީ ފުލުހުންގެ އިދާރާގެ ކަންކަން ބެލެހެއްޓުން ހަވާލުވެފައިވާ ވަޒީރުކަމަށްވާއިރު، އޭނާ މި މަގާމުގައި ހުރެއްޖެނަމަ މިމައްސަލައިގެ އިންސާފުވެރި ތަހުގީގެއްކުރުމަކީ މުސްތަހީލު ކަމެއް ކަމަށް އެ ބަޔާނުގައި ވެއެވެ.
"...އޭނާ މި މަގާމުގައި ހުރެއްޖެ ނަމަ މިމައްސަލައިގެ އިންސާފުވެރި ތަހުގީގެއް ކަށަވަރުކުރުމަށްޓަކައި، މިނިސްޓަރު އިހުސާނު މަގާމުން އެކަހެރި ކުރުމަށް ވެސް ސަރުކާރަށް ގޮވާލަމެވެ،" އެ ބަޔާނުގައި ވެއެވެ.
މި އަމަލަކީ ދައުލަތުގެ ވަސީލަތްތައް ނަހަމަ ގޮތުގައި ބޭނުންކޮށްގެން ނާޖާއިޒު މަންފާއެއް ހޯދައި ދިނުމުގެ އަމަލަކަށް ވާތީ މިމައްސަލަ ތަހުގީގު ކުރުމަށް އެންޓި ކޮރަޕްޝަން ކޮމިޝަން (އޭސީސީ)އަށް ވެސް އެމްޑީޕީން ވަނީ ގޮވައިލާފައެވެ.
އެމްޑީޕީން ބުނީ މިފަދަ އަމަލުތަކަކީ ނާތަހުޒީބު، ޚިޔާނާތުގެ އަމަލެއްކަމަށެވެ. އަދި މިފަދަ އަމަލުތަކުގެ ސަބަބުން ސަރުކާރާމެދު އޮންނަ އިތުބާރު ގެއްލޭނެތީ މިފަދަ ކަންކަން ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަށް ވަނީ ގޮވައިލާފައެވެ.
އެމްޑީޕީގެ ޕާލިމަންޓްރީ ގްރޫޕުން މިއަދު ވަނީ އިހުސާނުގެ އިތުބާރު ނެތް މައްސަލަ މަޖިލީހަށް ވެއްދުމަށް ވެސް ނިންމާފައެވެ. މިނިސްޓަރުންގެ އިތުބާރު ނެތް މައްސަލަ މަޖިލީހަށް ވައްދަން 10 މެމްބަރުންގެ ސޮއި ބޭނުންވެއެވެ.
20ވަނަ ރައްތޔިތުންގެ މަޖިލީހުގައި އެމްޑީޕީ ތަމްސީލުކުރަނީ 12 މެމްބަރުންނެވެ.
އެމްޑީޕީއަށް ނިސްބަތްވާ، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ)އަށް ނޭނގި އޭނާ ވެރިކަން ކުރާ ޕީއެންސީއަށް ވެއްދި މައްސަލަ ވެސް މިދިޔަ ހޯމަ ދުވަހު ވަނީ ފެންމަތިވެފައެވެ.
މި މި ކަމާ ގުޅިގެން "ސަން"އާ ވާހަކަދައްކަވަމުން އީސީގެ މެންބަރު ހަސަން ޒަކަރިއްޔާ ވިދާޅުވީ، ފިއްޓޭގެ ޕާޓީ ބަދަލުކޮށް ޕީއެންސީގެ ދަފުތަރުގައި އޮތީ އޭނާގެ އެއްވެސް އިޚުތިޔާރެއް ނެތި، އޭނާއަށް ނޭނގިކަމަށް ވެސް އެ ކޮމިޝަނަށް އެނގިފައިވާ ކަމަށެވެ.
އެއާއެކު އެ ކޮމިޝަންގެ ކުއްލި ބައްދަލުވުމެއް ބާއްވައި، ފިއްޓޭ އަލުން އެމްޑީޕީގެ ދަފުތަރަށް ބަދަލުކުރަން ނިންމައި، އެ ކަން ކޮށްްފައިވާކަމަށް ވެސް ވިދާޅުވިއެވެ.