އެންޓި ކޮރަޕްޝަން (އޭސީސީ)އަށް ސެކެރެޓަރީ ޖެނެރަލެއް ހޯދަން މިއަދު އިއުލާނުކޮށްފިއެވެ.
އެގޮތުން، އޭސީސީން ބުނީ، މި މަގާމަށް ކުރިމަލާ މީހަކު މަގާމުގެ މަސައްކަތާ ގުޅޭ ދާއިރާއަކުން ރާއްޖޭގެ ގައުމީ ސަނަދުތަކުގެ އޮނިގަނޑު ލެވެލް ނުވައެއްގެ ސަނަދެއް ހާސިލުކޮށް، މަގާމުގެ މަސައްކަތާ ގުޅޭ ދާއިރާއެއްގައި މަދުވެގެން ހަތަރު އަހަރުގެ ތަޖުރިބާ ލިބިފައި ހުންނަން ވާނެ ކަމަށެވެ.
ނުވަތަ މަގާމުގެ މަސައްކަތާ ގުޅޭ ދާއިރާއަކުން ރާއްޖޭގެ ގައުމީ ސަނަދުތަކުގެ ލެވެލް ހަތެއްގެ ސަނަދެއް ހާސިލުކޮށް، މަސައްކަތާ ގުޅޭ ދާއިރާއެއްގައ މަދުވެގެން ހަ އަހަރުގެ ތަޖުރިބާ ހުންނަން ވާނެ ކަމަށް އޭސީސީން ބުނެފައިވެއެވެ.
މީގެއިތުރުން، މަސައްކަތު ދާއިރާގެ ތަޖުރިބާ ގުނުމުގައި ބަލާނީ ސީނިއާ މެނޭޖްމަންޓް އަދި އޮފީހުގެ ސިޔާސަތު ކަނޑައެޅުމުގެ ޒިންމާ އަދާކުރި މަގާމެއްގެ ތަޖުރިބާ ލިބިފައިވުމަށް ކަމަށް އެ ކޮމިޝަނުން ވަނީ ބުނެފައެވެ.
އެ ކޮމިޝަނަށް ސެކެޓްރީ ޖެނެރަލެއް ހޯދަނީ ފަސް އަހަރުގެ މުއްދަތަކަށެވެ.
މި މަގާމަށް ކުރިމަތިލާން އެދޭ ފޯމު އެ ކޮމިޝަނުގެ ކައުންޓަރުންނާއި ވެބްސައިޓް މެދުވެރިކޮށް ލިބެން ހުންނާނެ ކަމަށް ބުނެއެވެ.
ހަމައެއާއެކު، ފޯމު ފުރިހަމަކޮށްފައިވާ އިގުރާރާއި ކުށުގެ ރެކޯޑާއި ސިޔާސީ ޕާޓީއެއްގައި ރަޖިސްޓްރީވެފައިވޭތޯ ބެލުމަށް އީސީން ސާފުކުރަން ޖެހޭ މައުލޫމާތު ހުށަހަޅަން ވާނެ ކަމަށް އެ ކޮމިޝަނުން ބުނެފައިވެއެވެ.
މި މާގަމަށް ކުރިމަތިލާން ފޯމު ހުށަހެޅުމުގެ ސުން ގަޑިއަކީ މި މަހުގެ 28 ވާ އަންގާރަ ދުވަހުގެ 14:30އެވެ.