އިލެކްޝަންސް ކޮމިޝަންގެ ގާނޫނީ ޒިންމާ ފުރިހަމައަށް އެބަ އަދާކުރެވޭތޯ ކުރީގެ ރައީސް އިބްރާހީމް މުހައްމަދު ޞާލިހް މިއަދު ސުވާލު އުފައްދަވައިފިއެވެ.
ޞާލިޙް އެފަދައިން ސުވާލު އުފައްދަވާފައި ވަނީ އެމްޑީޕީއަށް ނިސްބަތްވާ، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ)އަށް ނޭނގި ވެރިކަން ކުރާ ޕީއެންސީއަށް އޭނާ ވެއްދި މައްސަލައެއް ފެންމަތިވެފައި ވަނިކޮށެވެ.
އެކްސްގައި ކުރެއްވި ޕޯސްޓެއްގައި ޞާލިޙް ވިދާޅުވީ، އާންމު އެތައް ރައްޔިތެއްގެ ޒާތީ މައުލޫމާތު ނަހަމަ ގޮތުގައި ބޭނުންކޮށްގެން އޮޅުވާލައިގެން ސަރުކާރު ހިންގާ މައި ޕާޓީ، ޕީއެންސީއަށް ވައްދަމުންދާ ކަމަށެވެ.
އެގޮތުން، އެންމެ ފަހުން އިވުނީ މެންބަރު ޒިޔާދު ވެސް އޮޅުވާލައިގެން ޕީއެންސީއަށް ވެއްދި ވާހަކަ ކަން ފާހަގަކުރައްވައި ޞާލިޙް ވަނީ، އީސީގެ ގާނޫނީ ޒިންމީ ފުރިހަމައަށް އަދާކުރެވޭތޯ ސުވާލު އުފައްދަވާފައެވެ. އަދި، އީސީއަކީ ރައްޔިތުން ފުރިހަމައަށް އިތުބާރު ކުރާ ތަނަކަށް ވާން ޖެހޭ ކަމަށް އޭނާ ވަނީ ވިދާޅުވެފައެވެ.
"ސަން"އަށް މައުލޫމާތު ދެއްވަމުން ފިއްޓޭ މިއަދު ވިދާޅުވީ، އޭނާ ޕީއެންސީއަށް ވެއްދިކަމަށް ފެންނަން އޮތް ތާރީޚަކީ މިދިޔަ މަހުގެ 23ވަނަ ދުވަސް ކަމަށެވެ.
ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) -- ފޮޓޯ: މަޖިލިސް
އެ ކަން ކުރީ އޭނާއަށް އެއްވެސް މިންވަރަކަށް އެނގިގެން ނޫން ކަމަށާއި، އެ ކަން އެނގުނީ ވެސް އެހެން މީހެއްގެ ފަރާތުން މިއަދު ކަމަށް އޭނާ ވިދާޅުވިއެވެ.
މެންބަރަކު އޭނާ މަޖިލީހަށް އިންތިޚާބުވީ ޕާޓީ ބަަދަލުކުރުމަކީ އޭނާގެ ގޮނޑި ގެއްލޭނެ ކަމެއްގެ ގޮތުގައި ހަދައި އެންޓި ޑިފެކްޝަން ގާނުނެއް މި ސަރުކާރަށް ނިސްބަތްވާ މެންބަރުން ވަނީ ފާސްކޮށްފައެވެ.
ނަމަވެސް، އެކަމާ ގުޅުވައި "ސަން"އާ ވާހަކަދައްކަވަމުން އީސީގެ މެންބަރު ހަސަން ޒަކަރިއްޔާ ވިދާޅުވީ، ފިއްޓޭގެ ގޮނޑި ގެއްލެންޖެހޭ އެއްވެސް ސަބަބެއް އެ ކޮމިޝަނަށް ނުފެންނަ ކަމަށާއި، ގޮނޑި ނުގެއްލޭނެ ކަމަށެވެ.
އެއީ ޕާޓީ ބަދަލުވެފައި އޮތުމަކީ ފިއްޓޭ ބޭނުންވެގެން އަމިއްލައަށް ކުރި ކަމަކަށް ނުވާތީ ކަމަށް އޭނާ ވިދާޅުވިއެވެ.
އެ މައްސަލާގައި އެމްޑީޕީން ވަނީ މެމްބަރު ޒިޔާދުގެ ނަންމަތީގައި ވަގު ފޯމެއް ފުރައި ޕީއެންސީއަށް ވެއްދުން އެންމެ ހަރުކަށި އިބާރާތުން ކުށްވެރިކޮށް އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާ ގުޅުންހުރި އިދާރާތަކަށް އެ ޕާޓީން ގޮވައިލާ ކަމަށެވެ.