އުއްމީދާއި ހެޔޮ ބަދަލު ގެނެސްދޭ ޕާޓީއަކީ އެމްޑީޕީ: ޝާހިދު

އެމްޑީޕީއަކީ ދިވެހިރާއްޖެއަށް އުއްމީދާއި ހެޔޮ ބަދަލު ގެނެސްދޭ، ފަޚުރުވެރި ޕާޓީކަމަށް އެ ޕާޓީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ، އެމްޑީޕީގައި އިސްކޮށް އުޅުއްވުމަށްފަހު އެ ޕާޓީން ވަކިވެ، ދަ ޑިމޮކްރެޓްސްއާ ގުޅުން މެންބަރުންތަކެއް އަލުން ޕާޓީއާ ގުޅިވަޑައިގަތުމާ ގުޅިގެން އެ ބޭފުޅުންނަށް މަރުހަބާ ދަންނަވައި، އެކްސްގައި ކުރެއްވި ޕޯސްޓެއްގައެވެ.

އެމްޑީޕީއާ އަލަށް ގުޅިވަޑައިގެންނެވީ އެ ޕާޓީގެ ކުރީގެ ނައިބު ރައީސް މުހައްމަދު ޝިފާޒާއި، ކުރީގެ ޗެއާޕާސަން ހަސަން ލަތީފް، އަދި ކުރީގެ ޕީޖީ ލީޑަރު އަލީ އާޒިމްގެ އިތުރުން ޕާޓީގެ ޕޮލިސީ ކޮމިޓީގެ ކުރީގެ މުގައްރިރު އަދި އެސްޓީއޯގެ ކުރީގެ އެމްޑީ، ހުސައިން އަމްރެވެ.

ޝާހިދު ވިދާޅުވީ އޭނާ އެދިވަޑައިގަންނަވަނީ ޑިމޮކްރަސީ ހަރުދަނާކޮށް، ރައްޔިތުންގެ ބާރުވެރިކަން އިތުރުކުރުމަށް އެމްޑީޕީން ކުރަމުންގެންދާ މަސައްކަތްތަކުގައި ބައިވެރިވެވަޑައިގަތުމަށް ވީހާ ވެސް ގިނަ ބޭފުޅުން އެ ޕާޓީއާ ގުޅިވަޑައިގަތުމަށް ކަމަށެވެ.

މިދިޔަ ސަރުކާރުގައި އެމްޑީޕީގެ ތެރޭގައި ވަރަށް ބޮޑަށް ޚިޔާލު ތަފާތުވުން ބޮޑުވިއެވެ.

އޭރު އެ ޕާޓީގެ ރައީސްގެ ގޮތުގައި ހުންނެވި ކުރީގެ ރައީސް މުޙައްމަދު ނަޝީދާއި އޭރުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާ ދެމެދު ވަރަށް ބޮޑަށް ނުރުހުން އުފެދި، ގުޅުން އެއްކޮށް ކެނޑުނީއެވެ. ފުރަތަމަ ގުޅުން ގޯސްވީ، ބަރުލަމާނީ ނިޒާމަކަށް ފެންނަ ނުފެންނަ ވޯޓެއްގެ މައްސަލައިގައެވެ.

އޭގެ ފަހުން 2023 ވަނަ އަހަރުގެ ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމަރީގައި ނަޝީދާއި ޞާލިޙް ވާދަކުރެއްވިއެވެ. އެކަމަކު، ޕްރައިމަރީން ނަޝީދު ނާކާމިޔާބުވުމާ އެކު އެ މަނިކުފާނަށް ތާއީދުކުރައްވާ ބޭފުޅުން ވަނީ އިދިކޮޅާ އެކު މަސައްކަތްކުރައްވަން ފައްޓަވާފައެވެ. އަލީ އާޒިމް އެމްޑީޕީން ވަކިކުރީ ވެސް، އިދިކޮޅުން ބޭއްވި ހަރަކާތްތަކެއްގައި ބައިވެރިވުމުގެ ސަބަބުންނެވެ.

އާޒިމް ވަކިކުރުމާ އެކު ނަޝީދަށް ތާއީދުކުރައްވާ މެންބަރުން ވަނީ އަމިއްލައަށް އެމްޑީޕީން ވަކިވެ ޑިމޮކްރެޓްސްގެ ނަމުގައި ޕާޓީއެއް އުފައްދަވާފައެވެ. އެ ޕާޓީގެ މުއައްސިސަކީ ފަހުން ރައީސަކަށް ހުންނެވި ހަސަން ލަތީފެވެ.

ޑިމޮކްރެޓްސްގެ ތެރެއިން ބައެއް ބޭފުޅުން އެމްޑީޕީއާ އަލުން ގުޅިވަޑައިގެންނެވިއިރު، ޑިމޮކްރެޓްސްއިން ބުނެފައިވަނީ، އެ ޕާޓީ ފެއިލް ނުވާނެ ކަމަށާއި، ޕާޓީން ވަކިވެ ވަޑައިގެން އެމްޑީޕީއާ ގުޅިވަޑައިގަތް ބޭފުޅުންނާ މެދު އެއްވެސް މައްސަލައެއް ނެތް ކަމަށެވެ.