ހުޅުމާލޭ ދެވަނަ ފިޔަވަހީގެ ހިޔާ ފުލެޓުތަކުގެ ބައެއް ޓަވަރުތަކަށް ފެނުގެ ޚިދުމަތް ރޭގެ ވަގުތެއްގައި ކެނޑިފައިވާއިރު، މިހާރު އެ މައްސަލަ ހައްލުކުރެވިފައިވާ ކަމަށް ސަރުކާރުގެ ފެން ކުންފުނި، އެމްޑަބްލިއުއެސްސީން މިއަދު ބުނެފިއެވެ.
އެމްޑަބްލިއުއެސްސީން 3:15 ހާއިރު އެކްސްގައި ކުރި ޕޯސްޓްއެއްގައިވަނީ ހިޔާ ފުލެޓުތަކަށް ދިމާވި ފެނުގެ މައްސަލަ މިހާރު ހައްލުކޮށްފައިވާ ކަމަށެވެ.
ހިޔާ ޓަވަރުތަކުގައި ދިރިއުޅޭ މީހުންނަށް ރޭ އެޗްޑީސީން ފޮނުވާފައިވާ މެސެޖެއްގައިވަނީ ހިޔާ ޓަވަރުތަކަށް ފެން ދޫކުރުމަށް ބަހައްޓާފައިވާ ބޫސްޓާ ޕަމްޕަށް ދިމާވި ޓެކްނިކަލް މައްސަލައަކާ ގުޅިގެން ހިޔާ ޓަވަރުތަކުން ފެނުގެ ޚިދުމަތް މެދުކެނޑިފައިވާ ކަމަށެވެ.
ހިޔާ ފުލެޓުގައި ދިރިއުޅެމުން އަންނަ މީހުންނަށް ދިމާވެދާނެ ދަތިތަކަށް އެ ކުންފުނިން ވަނީ މާފަށް އެދިފައެވެ.
ފާހަގަކޮށްލެވޭ ގޮތުގައި ހުޅުމާލޭގެ ފުރަތަމަ ފިޔަވަހިން ރޭގެ ވަގުތެއްގައި ވަނީ ކަރަންޓު ވެސް ކެނޑިފައެވެ.
ކަރަންޓު ކެނޑެން ދިމާވި ސީދާ މައްސަލަ ހިއްސާނުކުރި ނަމަވެސް ސްޓެލްކޯއިން ވަނީ އެ މައްސަލަ މިހާރު ހައްލުކޮށްފައިވާ ކަމަށް ބުނެފައެވެ.