ޑައިނަސޯތައް ދައްކައިދޭ ބޮޑު ފްރެންޗައިޒް ކަމަށްވާ ޖުރެސިކް ވޯލްޑް އަލުން ރީބޫޓުކޮށް ޖުލައި މަހު ދައްކަން ފަށަން ތައްޔާރުވެއްޖެއެވެ.
ޖުރެސިކް ވޯލްޑްގެ ފުރަތަމަ ފިލްމުތައް ނެރެން ފަށާފައިވަނީ 90ގެ އަހަރުތަކުގައި ޖުރެސިކް ޕާކްގެ ނަމުގައެވެ. ކާމިޔާބު ތިން ފިލްމަށް ފަހު އަނެއްކާ ވެސް ފްރެންޗައިޒް އަލުން ރީބޫޓްކޮށްފައިވަނީ 2015 ވަނަ އަހަރެވެ.
ބްރައިސް ޑެލަސް ހަވާޑް އަދި ކްރިސް ޕްރެޓް އެކީގައި ފެނުނު މި ފްރެންޗައިޒްގެ ފުރަތަމަ ރީބޫޓް ނިންމާލާފައިވަނީ ތިން ފިލްމަށް ފަހު 2022 ވަނަ އަހަރެވެ. ޖުރެސިކް ވޯލްޑް "ޑޮމިނިއަން"ގެ ނަމުގައި ފްރެންޗައިޒްގެ ރީބޫޓްގެ ތިންވަނަ ފިލްމު ނެރުނެވެ. އެއީ، އެ އަހަރު ދެވަނައަށް އެންމެ ބޮޑު އާމްދަނީއެއް ލިބުނު ފިލްމެވެ.
އަނެއްކާ ފިލްމު ރީބޫޓްކުރުމަށް ތައްޔާރުވެފައިވާއިރު ފުރަތަމަ ފިލްމަށް ކިޔާނީ "ޖުރެސިކް ވޯލްޑް: ރީބާތު" އެވެ. މި ފިލްމު އަންނަ ޖުލައި މަހުގެ ތެރޭގައި ދައްކަން ފަށަން ވަނީ ހަމަޖެހިފައެވެ. ފިލްމުގެ ފައިނަލް ޕޯސްޓް ޕްރޮޑަކްޝަން މިހާރު ނިމިފައިވާއިރު މިހާރު ތައްޔާރުވަނީ ޕްރޮމޯޝަނަލްގެ މަސައްކަތް ފެށުމަށެވެ.
ޖުލައި މަހުގެ ދެވަނަ ދުވަހު ސިނަމާތަކުން ދައްކަން ފެށުމަށް ހަމަޖެހިފައިވާ ފިލްމުގެ ފުރަތަމަ ޓީޒަރު ޕޯސްޓަރުތައް މިހާރު ވަނީ އާންމުކޮށްފައެވެ. މި ޕޯސްޓަރުތަކުން ފިލްމުގެ ކާސްޓުން ފެނެއެވެ.
ފިލްމުގެ ލީޑް ކާސްޓުންގެ ގޮތުގައި ފެންނާނީ ޖޮނަތަން ބެއިލީއާއި ސްކާލެޓް ޖޯހެންސަންގެ އިތުރުން މަހާޝަލާ އަލީއެވެ. މި ފިލްމު ފްރެންޗައިޒްގެ ކުރީގެ ވާޝަންތަކުގެ އެއްވެސް އެކްޓަރެއް އެނބުރި ފިލްމަށް އަންނާނެ ކަމެއް ހާމަކޮށްފައެއް ނުވެއެވެ. ނަމަވެސް، އެއިން އެއްވެސް އެކްޓަރެއް މި މައުލޫމާތު ހިއްސާ ކޮށްފައިނުވުމުން ފަހަރުގައި އެއިން ތަރިއެއް ނުފެނުމަކީ އެކަށީގެންވާ ކަމެކެވެ.