މި ގަރުނުގައި އުފެދުނު އެންމެ ބޮޑު އާޓިސްޓަކީ ހޮލީވުޑްގެ ލަވަކިޔުންތެރިޔާ ޓޭލާ ސްވިފްޓް ކަމުގައި ބިލްބޯޑުން ކަނޑައަޅައިފިއެވެ.
މިއުޒިކްގެ އެންމެ ބޮޑު ޗާޓު ލޭބަލް ކަމަށްވާ ބިލްބޯޑުން ދާދިފަހުން ވަނީ 21 ވަނަ ގަރުނުގެ އެންމެ ބޮޑު ތަރީންގެ ލިސްޓެއް އެކުލަވާލާފައެވެ. މި ލިސްޓު އެކުލަވާލާފައިވަނީ 2000 އިން ފެށިގެން މިދިޔަ އަހަރާ ހަމައަށް ބިލްބޯޑު ޗާޓުތަކުން އެންމެ ވަރުގަދަ ކޮށް ފެނިފައިވާ ތަރިންނަށް ބިނާކޮށެވެ.
މި ލިސްޓު އެކުލަވާލުމަށްޓަކައި ބިލްބޯޑު ޗާޓުގައި އެންމެ ވަރުގަދަ އަށް ފެނިފައިވާ ތަރީންނާއި ޗާޓުން އެންމެ ގިނައިން އެއްވަނަ ހޯދާފައިވާ ތަރީން ހިމަނާފައިވެއެވެ. ބިލްބޯޑު ޗާޓުގައި ޓޭލާ ހިމަނާފައިވާއިރު އޭނާ މިއުޒިކް އިންޑަސްޓްރީއަށް ނުކުތީ ވެސް 2006 ވަނަ އަހަރެވެ. މި ލިސްޓުގައި ހިމެނޭ އެހެން ބައެއް ތަރީންނަކީ ޓޭލާއަށް ވުރެ ކުރީން މިއުޒިކް އުފައްދަމުން ދިޔަ ތަރީންނެވެ.
އޭނާ 2006 އަހަރު މިއުޒިކް އުފައްދަން ފެށި ނަމަވެސް މިހާތަނަށް އޭނާ ވަނީ ބިލްބޯޑް ހޮޓް 100ގެ ޗާޓުން އެއްވަނަ 14 އަލްބަމުން ހޯދާފައެވެ. އޭނާގެ ލަވަތަކުން 12 ސިންގަލްއެއް ވެސް ވަނީ ސިންގަލްގެ ލިސްޓުން އެއްވަނަ ހޯދާފައެވެ.
ޓޭލާގެ ކާމިޔާބީތަކުގެ ތެރޭގައި 2022 ވަނަ އަހަރުގެ އަލްބަމް "މިޑްނައިޓް"ގެ ރެކޯޑު ހިމެނެއެވެ. އެ އަލްބަމް ރިލީޒްކުރުމާ އެކު އަލްބަމްގެ 10 ލަވައެއް މުޅި ބިލްބޯޑު ޗާޓުގެ ގަދަ 10 ގައި ހިމެނުނެވެ. މުޅި ގަދަ 10 އޮތީ ހަމައެކަނި އޭނާގެ ލަވައިން ފުރާލާފައެވެ. މިއީ މިގޮތަށް ރިކޯޑެއް މުގުރާލި ފުރަތަމަ ފަހަރެވެ.
ލިސްޓުގެ ދެވަނައިގައި ޓޭލާ އާ ޖެހިގެން އޮތީ ޑްރޭކެވެ. ލިސްޓުގެ ތިންވަނައިގައި އޮތީ މިއުޒިކް ރިލީޒްކުރުން ހުއްޓާލާފައިވާ ލަވަކިޔުންތެރިޔާ ރިއާނާއެވެ. ހަތަރުވަނައިގައި ޕޯސްޓް މަލޯން އޮތް އިރު ފަސްވަނައިގައި އޮތީ އެމިނެމް އެވެ.