އެތައް އަހަރެއްވި ނަމަވެސް އަދިވެސް އެންމެ ގިނަ ބަޔަކު ވާހަކަދައްކާ ޝޯތަކުގެ ތެރޭގައި ފްރެންޑްސް ހިމެނެއެވެ. ޝޯގެ އެންމެ ފާހަގަކޮށްލެވޭ ކެރެކްޓަރުން ކަމަށްވާ ފީބީ ބުފޭއާއި ޗޭންޑްލާ ބިންގަކީ ގިނަ ބައެއްގެ ފެވްރިޓެވެ. ދެ ކެރެކްޓަރުންގެ ރޯލުން ފެންނަ އެކްޓަރުންނަކީ އާންމު ދިރިއުޅުމުގައި ވެސް ވަރަށް ގާތް ދެ މީހުންނެވެ.
ޗޭންޑްލާގެ ރޯލުން ފެނުނު މެތިއު ޕެރީ ވަނީ 2023 ވަނަ އަހަރު ކުއްލި ގޮތަކަށް މަރުވެފައެވެ. އެއާއެކު ކާސްޓުން އަންނަނީ އެކި ކަންތައްތަކުން އޭނާގެ ހަނދާން އާ ކުރަމުންނެވެ.
މި ހަނދާންތައް ފީބީގެ ކެރެކްޓަރު ކުޅޭ ލީސާ ކޫޑްރޯއަށް ލިބިފައިވަނީ އާދަޔާހިލާފު ގޮތަކަށެވެ. އެގޮތުން، މެތިއު، ލީސާއަށް ދިން މެސެޖެއް ފެނުނީ އިހަށް ދުވަހު ކަމަށް ލީސާ ހާމަކުރިއެވެ.
ފްރެންޑްސްގެ ޝޯ ފިނާލޭ ދެއްކީ 2004 ވަނަ އަހަރެވެ. ޝޯ ދައްކާ ނިމުމަށް ފަހުން އެ ޝޯ ސެޓުން މެތިއު ވަނީ ޕްރޮޕެއް ނަގާފައެވެ. މި ޕްރޮޕް އޭނާ ވަނީ ލީސާއަށް ހަދިޔާކޮށްފައެވެ. މި ޕްރޮޕް އޭނާއަށް ދީފައިވަނީ އޭގެ ތެރެއަށް މެސެޖެއް ލުމަށް ފަހުންނެވެ. ނަމަވެސް، ލީސާ އޭރު އެ ޕްރޮޕް ތެރެއެއް ނުބަލައެވެ.
"އިހަށް ދުވަހަކު މެސެޖެއް ފެނުނީ ޕްރޮޕްއެއް ތެރެއިން. ޖަގެއްހެން އިން ޕްރޮޕެއް މިއީ. މެތިއު މިއަށް ލާފައިން މެސެޖެއް އެކަމު އޭރު ބެލިފައެއް ނުވޭ،" ޑްރޫ ބެރިމޯ ޝޯގައި ވާހަކަދައްކަމުން ލީސާ ބުންޏެވެ.
ލީސާއަށް މެސެޖު ފެނުމުން ލިބުނީ ބޮޑު ޝޯކެއް ކަމަށް އޭނާ ބުންޏެވެ. ފްރެންޑްސްގެ ދުވަސްތަކުގެ ހަނދާންތައް އެއްކޮށް އާވި ކަމަށް އޭނާ ބުންޏެވެ.
ނަމަވެސް، މި މެސެޖުގެ އިތުރު ތަފުސީލެއް މި ވަގުތު ދޭން ބޭނުންނުވާ ކަމަށް ލީސާ ބުންޏެވެ. ފަހަރެއްގައި ކުރިއަށް އޮތްތަނުގައި އެ މައުލޫމާތު ހިއްސާކޮށްފާނެ ކަމަށް އޭނާ ފާހަގަކުރިއެވެ.
ކޮމެޑީ ޝޯ ފްރެންޑްސް ދައްކަން ފަށާފައިވަނީ 1994 ވަނަ އަހަރެވެ. ކާމިޔާބު 10 ސީޒަނަށް ފަހު ޝޯ ނިންމާލާފައިވަނީ 2004 ވަނަ އަހަރެވެ.