ދަ ޑިމޮކްރެޓްސްގެ ރައީސް ހަސަން ލަތީފާއި ނައިބު ރައީސް މުޙައްމަދު ޝިފާޒް (ޝިއްޕެ) މަގާމުން ވަކިވުމުން، އެ ޕާޓީގެ ހިންގުން ވަގުތީ ގޮތުން އައިޝަތު އަލައިކާ އަދުނާނާއި ހުސައިން ފިރުޝާނާ ހަވާލުކޮށްފިއެވެ.
އެ ޕާޓީގެ އަސާސީ ގަވާއިދުގައި ވާގޮތުން ޕާޓީގެ ރައީސްގެ މަގާމު ހުސްވެއްޖެ ހާލަތެއްގައި އެ މަގާމާ ހަވާލުވާނީ ޕާޓީގެ ނައިބު ރައީސެވެ. އަލައިކާއާއި ފިރުޝާނަކީ ވެސް އެ ޕާޓީގެ ދެ ނައިބުރައީސުންނެވެ.
އެ ޕާޓީގެ ރައީސަކު އައްޔަން ކުރުމާމެދު ގޮތެއް ނިންމުމުގެ މަޝްވަރާތައް ޕާޓީތެރޭގައި ކުރެވެމުން ދާކަމަށް އެ ޕާޓީގެ އޮފިޝަލަކު ވަނި މައުލޫމާތު ދީފައެވެ.
ޑިމޮކްރެޓްސްގެ އިސް އޮފިޝަލަކު "ސަން"އަށް ވިދާޅުވީ ޕާޓީގެ ރައީސްކަމުން ހަސަން އިސްތިއުފާ ދެއްވި ނަމަވެސް އަދި ޕާޓީން ވަކިވެވަޑައިގެންނެވިކަމަށް އެނގިފައި ނުވާ ކަމަށެވެ. ޑިމޮކްރެޓްސްގެ މުއައްސިސަކީ ވެސް ހަސަން ލަތީފެވެ.
މި ބޭފުޅުން މަގާމުން އިސްތިއުފާ ދެއްވިއިރު، ނިމިދިޔަ ރިޔާސީ އިންތިޚާބުގައި ޑިމޮކްރެޓްސްގެ ރަނިންމޭޓަކަށް ހުންނެވި ހުސައިން އަމްރު ވެސް ވަނީ އެމްޑީޕީއާ ގުޅިވަޑައިގެންފައެވެ.
ޑިމޮކްރެޓްސްގެ އިސްވެރިންތަކެއް ޕާޓީ ދޫކުރައްވައި އެމްޑީޕީއާ ގުޅިވަޑައިގަންނަވަން އުޅުއްވާ ކަމުގެ އަޑުތަކެއް އަންނަނީ ފެތުރެމުންނެވެ.