ގާނޫނުއަސާސީ އިސްލާހުކުރެވޭނީ މަޖިލީހަށް، ބަދަލުކުރެވޭނީ ރައްޔިތުންނަށް: ނަޝީދު

ގާނޫނުއަސާސީ އިސްލާހު ކުރުމުގެ ބާރު އޮންނާނީ ރައްޔިތުންގެ މަޖިލީހަށް ކަމަށް ކުރީގެ ރައީސް އަދި މަޖިލީހުގެ ރައީސްކަން ވެސް ކުރެއްވި މުޙައްމަދު ނަޝީދު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މެންބަރުން އެ މެންބަރުން އިންތިޚާބުވި ޕާޓީން ވަކިވުމުންނާއި ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް މަޖިލީހުން ވަނީ އިސްލާހެއް ގެނެސްފައެވެ. މި އިސްލާހު ބާތިލް ކުރުމަށް އެދި ކެންދޫ ދާއިރާގެ ކުރީގެ މަޖިލިސް މެމްބަރު އަދި ގާނޫނީ ވަކީލު އަލީ ހުސައިން ވަނީ ސުޕްރީމް ކޯޓަށް މައްސަލައެއް ހުށަހަޅައިފައެވެ.

މި މައްސަލަ ސުޕްރީމް ކޯޓަށް ނުބެލޭނެ ކަމަށް ދައުލަތުގެ ވަކީލާ ފާތިމަތު ހަލީމް ވިދާޅުވި ނަމަވެސް، އެ ކޯޓުން ނިންމީ މައްސަލަ ކުރިއަށް ގެންދިއުމަށެވެ.

މިކަމާ ގުޅިގެން މިއަދު ނަޝީދު އެކްސްގައި ކުރެއްވި ޕޯސްޓުގައި ވަނީ، ގާނޫނުއަސާސީ އިސްލާހު ކުރެވޭނީ ހަމައެކަނި މަޖިލީހަށް ކަމަށެވެ. އަދި ގާނޫނުއަސާސީގެ ނަޒަރުގައި ގާނޫނުއަސާސީ ބަދަލުކުރާ ނަމަ، ފެންނަ ނުފެންނަ ވޯޓެއް ނަގަން ޖެހޭނެ ކަމަށާއި ގާނޫނު އަސާސީ ބަދަލު ކުރުމުގެ ބާރު އޮންނަނީ ސީދާ ރައްޔިތުންނަށް ކަމަށް އެ ޕޯސްޓުގައި ވެއެވެ.

އެ ޕޯސްޓުގެ ތެރޭގައި، ނަޝީދުގެ ނުރަސްމީ އެކައުންޓުން ކޮށްފައިވާ ޕޯސްޓެއްގައި ވަނީ ސުޕްރީމް ކޯޓަށް ލިބިދީފައި އޮންނަނީ ގާނޫނު އަސާސީ މާނަ ކުރުމުގެ ބާރު ކަމަށެވެ.

"ސުވާލަކީ މެންބަރުންގެ ގޮނޑި ގެއްލޭ ހަމަ ބަދަލުކުރުން އެއީ ބަދަލެއްތޯ ނުވަތަ އިސްލާހެއްތޯ. މިކަން މާނަ ކޮށްދިނުން އެއީ ސުޕްރީމް ކޯޓުގެ ވާޖިބު،" އެ މަނިކުފާނު ލިޔުއްވާފައިވެއެވެ.

މިހާރު ސުޕްރީމް ކޯޓުގައި އޮތް އެ މައްސަލައަށް އިދިކޮޅު އެމްޑީޕީން ތަދައްޚުލު ވެފައި ވާއިރު، ނަޝީދުގެ ޑިމޮކްރެޓްސްއިން ވެސް ވަނީ އެ މައްސަލައަށް ތަދައްޚުލު ވެފައެވެ. ނަމަވެސް ޑިމޮކްރެޓްސްއިން އެ މައްސަލައިގެ އަޑުއެހުންތަކަށް ހާޒިރުވެފައެއް ނުވެއެވެ.

ޑިމޮކްރެޓްސްގެ ރައީސް އިމްތިޔާޒް ފަހުމީ ވެސް މި މައްސަލައިގައި ދެކެވަޑައިގަންނަވަނީ, ނަޝީދު ދެކެވަޑައިގަންނަވާ ގޮތަށެވެ.

އިމްތިޔާޒު ވަނީ އެ މައްސަލަ ސުޕްރީމް ކޯޓުގައި ނުބެލޭނެ ކަމަށް ވިދާޅުވެފައެވެ.