އެމްޑީޕީ ދޫކުރައްވައި، އުފެއްދެއްވި ޑިމޮކްރެޓްސްގެ ރައީސްކަމުން، ހަސަން ލަތީފް އިސްތިއުފާ ދެއްވައި، އެ ޕާޓީގެ ނައިބު ރައީސް މުޙައްމަދު ޝިފާޒް (ޝިއްޕެ) މަގާމުން ވަކިވެ، ޕާޓީން ވެސް ވަކިވެވަަޑައިގެންފިއެވެ.
ޑިމޮކްރެޓްސްގެ އިސް އޮފިޝަލަކު "ސަން"އަށް ވިދާޅުވީ ޕާޓީގެ ރައީސްކަމުން ހަސަން އިސްތިއުފާ ދެއްވި ނަމަވެސް އަދި ޕާޓީން ވަކިވެވަޑައިގެންނެވިކަމަށް އެނގިފައި ނުވާ ކަމަށެވެ. ޑިމޮކްރެޓްސްގެ މުއައްސިސަކީ ވެސް ހަސަން ލަތީފެވެ.
ޕާޓީގެ މަގާމުން ހަސަން އިސްތިއުފާ ދެއްވިއިރު، ޕާޓީގެ ނައިބު ރައީސްކަމުން ޝިފާޒް އިސްތިއުފާ ދެއްވައި، ޕާޓީން ވެސް ވަކިވެވަޑައިގެންނެވިކަން ޑިމޮކްރެޓްސްގެ އޮފިޝަލް ވަނީ ކަށަވަރުކޮށްދެއްވައިފައެވެ.
މި ބޭފުޅުން މަގާމުތަކުން އިސްތިއުފާ ދެއްވިއިރު، ޑިމޮކްރެޓްސްގެ އިސްވެރިންތަކެއް ޕާޓީ ދޫކުރައްވައި އެމްޑީޕީއާ ގުޅިވަޑައިގަންނަވަން އުޅުއްވާ ކަމުގެ އަޑުތަކެއް އަންނަނީ ފެތުރެމުންނެވެ.
އެގޮތުން ކުރީގެ މެންބަރު އަލީ އާޒިމާއި، ޝިފާޒު ވެސް ޑިމޮކްރެޓްސް ދޫކުރައްވައި އެމްޑީޕީއަށް ސޮއިކުރައްވައިފި ކަމުގެ ޚަބަރުތަކެއް އަންނަނީ ދައުރުވަމުންނެވެ.
ޑިމޮކްރެޓްސްގެ ކުރީގެ ނައިބު ރައީސް މުހައްމަދު ޝިފާޒް -- ފޮޓޯ/ ދެން އޮންލައިން
އެކަމާ ގުޅިގެން "ސަން"އާ ވާހަކަދައްކަވަމުން ޝިފާޒު ވިދާޅުވީ އަދި އޭނާ އެއްވެސް ޕާޓީއަކަށް ސޮއިނުކުރައްވާ ކަމަށް ވިދާޅުވެފައެވެ. ނަމަވެސް ސަރުކާރު ޖަވާބުދާރީކުރެވޭނެ އެހެނިހެން ގޮތްގޮތް ހޯދޭތޯ ބައްލަވަމުން އަންނަކަމަށް ވިދާޅުވިއެވެ.
"އެންމެ ބޮޑަށް ސަރުކާރު ޖަވާބުދާރީ ކުރެވޭނެ ގޮތެއް ވާން އޮތީ ކޮން ގޮތަކުންތޯ އަޅުގަނޑު ވެސް ބަލަން މި ޖެހެނީ،" އޭނާ ވިދާޅުވިއެވެ.
އާޒިމާއި، ޝިފާޒު ވެސް އެމްޑީޕީއާ ގުޅިވަޑައިގެންފިކަމާއި، ހަސަން ވެސް އެމްޑީޕީއަ ގުޅެނީކަމަށް ޚަބަރުތައް ދައުރުވަމުން އަންނައިރު ރޭ، ވަނީ މިދިޔަ ރިޔާސީ އިންތިޚާބުގައި ޑިމޮކްރެޓްސްގެ ރަނިންމޭޓެއް ގޮތުގައި ނިކުންނެވި ހުސައިން އަމްރު އެމްޑީޕީއާ އަލުން ގުޅިވަޑައިގެންފައެވެ.
މި ފަހަކަށް އައިސް ޑިމޮކްރެޓްސްގެ ހަރަކާތްތައް މުޅިންހެން އޮތީ މަޑުޖެހިފައެވެ. އެ ޕާޓީއަށް ރައްޔިތުންގެ މަޖިލިސް އިންތިޚާބުން ވެސް އެއްވެސް ގޮނޑިއެއް ނުލިބި ނާކާމިޔާބުވުމާއެކު ޕާޓީގެ މާ ބޮޑު ސިޔާސީ ހަރަކާތްތަކެއް ކުރިއަކަށް ނުގެންދެއެވެ،
އެއާއެކު އެ ޕާޓީ އުފައްދަވަން އިސްކޮށް އުޅުއްވި މެންބަރުން ވެސް ސިޔާސީ ކަންކަމުން ފެނިފައެއް ނުވެއެވެ.