މާލޭ، ހެންވޭރުގެ ގެސްޓުހައުސެއް ތެރެއިން މަރުވެފައި އޮތް ފިރިހެނަކު މިއަދު ފެނިއްޖެއެވެ.
މީޑިއާތަކަށް މައުލޫމާތު ދެމުން ފުލުހުން ބުނީ މަރުވެފައި އޮތް މީހަކު ފެނިގެން ރިޕޯޓު ލިބުނީ 14:04 ހާއިރު ކަމަށެވެ. މަރުވެފައި އޮއްވައި ފެނުުނީ އައްޑޫ ސިޓީ ހުޅުދޫ، ބޮކަރުމާގެ، 59 އަހަރުގެ އަބްދުﷲ ޒަކީއެވެ.
ފުލުހުން ބުނީ އޭނާ ފެނިފައިވަނީ ގެސްޓުހައުސްގެ ކޮޓަރީގެ ފާޚާނާ ތެރޭ ވެއްޓިފައި އޮއްވައި ކަމަށެވެ.
އެ މީހާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލުން މައުލޫމާތު ދިން ކަމަށް ފުލުހުން ބުންޏެވެ. މި މައްސަލަ މިހާރު ތަހުގީގުކުރަމުން އަންނަކަމަށް ވެސް ފުލުހުން ވަނީ ބުނެފައެވެ.
މި ފަހަކަށް އައިސް ގޮތް ނޭނގޭ މަރުތައް ވަރަށް ބޮޑަށް ވަނީ އިތުރުވެފައެވެ. އެގޮތުން މާލެއިން ވެސް މި ފަދަ މައްސަލަތަކެއް ފެންމަތިވެފައިވެއެވެ. އެ ކަމުގެ ކަންބޮޑުވުން އާންމުންގެ ތެރޭގައި ވެސް އަންނަނީ ފާޅުކުރަމުންނެވެ.