ނިމުނު ސަރުކާރުގައި އެސްޓީއޯގެ މެނޭޖިން ޑިރެކްޓަރަކަށް އެންމެ ފުރަތަމަ ހުންނެވި ހުސައިން އަމްރު، އެމްޑީޕީ ދޫކުރައްވައި، ގުޅިވަޑައިގެންނެވި ޑިމޮކްރެޓްސްއިން ވެސް ވަކިވެ، އަލުން އެމްޑީޕީއާ ގުޅިވަޑައިގެންފިއެވެ.
މި ފަހަކަށް އައިސް ޑިމޮކްރެޓްސްގެ ހަރަކާތްތައް މުޅިންހެން އޮތީ މަޑުޖެހިފައެވެ. އެ ޕާޓީއަށް ރައްޔިތުންގެ މަޖިލިސް އިންތިޚާބުން ވެސް އެއްވެސް ގޮނޑިއެއް ނުލިބި ނާކާމިޔާބުވުމާއެކު ޕާޓީގެ މާ ބޮޑު ސިޔާސީ ހަރަކާތްތަކެއް ކުރިއަކަށް ނުގެންދެއެވެ
އެއާއެކު އަމްރު ހިމެނޭހެން އެ ޕާޓީ އުފައްދަވަން އިސްކޮށް އުޅުއްވި މެންބަރުން ވެސް ސިޔާސީ ކަންކަމުން ފެނިފައެއް ނުވެއެވެ.
އަމްރު ޑިމޮކްރެޓްސް ދޫކުރައްވައި އެމްޑީޕީއާ ގުޅިވަޑައިގެންނެވިކަން ހާމަކުރެއްވީ އެމްޑީޕީއަށް ނިސްބަތްވާ، ހުޅުމާލެ ދާއިރާގެ ކުރީގެ މެންބަރު، އަލީ ނިޔާޒެވެ.
އެކްސްގައި ކުރެއްވި ޕޯސްޓެއްގައި އަމްރަށް މަރުހަބާ ވިދާޅުވެ، ނިޔާޒު ވިދާޅުވީ "ސިޔާސީ އިސްލާހީ މަސައްކަތުގައި އަބަދު ވެސް އެންމެ މުހިއްމު މަސައްކަތެއް ކުރެވޭނެ ޖާގަ އޮންނާނީ އެމްޑީޕީގައި" ކަމަށެވެ.
"އެ ފުރުސަތު ސިޔާސީ ކުރިމަގު ހޯދަން އެދޭ ކޮންމެ މީހަކަށް އެމްޑީޕީގައި ތަންމިނަށް ވަނީ ހުޅުވިފައި،" ނިޔާޒު ވިދާޅުވިއެވެ.
މިކަމާ ގުޅޭ އިތުރު ތަފްސީލް ހޯދައިލުމަށް "ސަން"އިން އަމްރަށް ގުޅަން މަސައްކަތް ކުރި ނަމަވެސް އަދި ޖަވާބެއް ލިބޭގޮތް ވަނީ ނުވެފައެވެ.
ޑިމޮކްރެޓްސް ދޫކުރައްވައި އަމްރު ވަޑައިގެންނެވިއިރު، އެ ޕާޓީން އޮތީ މިހާރުގެ ސަރުކާރު ޖަވާބުދާރީ ކުރުވުމަށް އެހެން ޕާޓީތަކުން އެ ޕާޓީއާއެކު މަސައްކަތްކުރަން އެދޭނަމަ އެ ކަމުގެ މަޝްވަރާއަށް ވެސް ތައްޔާރު ކަމަށް ބުނެފައެވެ.
ޑިމޮކްރެޓްސް އަކީ އެމްޑީޕީގައި އުފެދުނު ޚިޔާލު ތަފާތުވުންތަކަށްފަހު، ކުރީގެ ރައީސް މުޙައްމަދު ނަޝީދަށް ތާއީދު ކުރައްވާ މެންބަރުން އެ ޕާޓީ ދޫކޮށްލައްވައި އުފެއްދެވި ޕާޓީއެކެވެ.
އެމްޑީޕީން ވަކިވުމަށް ފަހު، ޑިމޮކްރެޓްސްއާ ގުޅުނު މެންބަރުން ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. ނިމިދިޔަ ރިޔާސީ އިންތިޚާބުގައި ވެސް އެ ޕާޓީން ބޮޑަށް މަސައްކަތް ކޮށްފައިވަނީ އެމްޑީޕީ "ފެއިލްވެއްޖެ" ކަމަށް ބުނެއެވެ.