ބޭރުފައިސާއާބެހޭ ގާނޫނުގެ ދަށުން ޓޫރިޒަމް ވިޔަފާރިތައް އެމްއެމްއޭގައި ރެޖިސްޓްރީ ކުރުމުގެ ގަވާއިދު, "ބޭރު ފައިސާއާ ބެހޭ ގާނޫނުގެ ދަށުން ރަޖިސްޓަރީ ކުރުމުގެ ގަވާއިދު" މިއަދު އާންމުކޮށްފިއެވެ.
ބޭރު ފައިސާއާ ބެހޭ ގާނޫނަށް ގެނައި ބަދަލުތަކަށް، މި މަހުގެ އެއްވަނަ ދުވަހުން ފެށިގެން ވަނީ އަމަލު ކުރަން ފަށައިފައެވެ. މިއީ އެ ގާނޫނުގެ ދަށުން ހަދާފައިވާ ގަވާއިދެކެވެ.
މިއަދު އާންމުކުރި ގަވާއިދުގެ ދަށުން އެމްއެމްއޭގައި ރެޖިސްޓާވާން ޖެހޭ ވިޔަފާރިތަކުގެ ތެރޭގައި:
- ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތައް
- މާލީ އިދާރާތައް ފިޔަވައި ފާއިތުވީ މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން އެމެރިކާ ޑޮލަރާ އެއްވަރުގެ އަދަދެއް ލިބިފައިވާ ފަރާތްތައް
އެ ގަވާއިދުގައިވާ ގޮތުން، މިދިޔަ އަހަރު 15 މިލިއަން އެމެރިކާ ޑޮލަރާ އެއްވަރުގެ އަދަދެއް ލިބިފައި ފަރާތްތަކުން، ފެބްރުއަރީ ތިނެއްގެ ކުރިން އެމްއެމްއޭގައި ރެޖިސްޓްރީވުމަށް އެދި ހުށަހަޅަންޖެހެއެވެ.
ނަމަވެސް، މި އަހަރު ފެށުނު ފަހުން މި އަދަދަށް ޑޮލަރު ލިބިފައިވާނަމަ، ރެޖިސްޓްރީކުރުމަށް އެދި ހުށަހަޅަންޖެހޭނީ އަންނަ އަހަރުގެ ޖެނުއަރީ ނިމުމުގެ ކުރިންނެވެ.
މި ގަވާއިދުގައި ވާގޮތުން، މި އަހަރު ފެށުނު ފަހުން ޓޫރިޒަމާ ގުޅުން ހުރި ޚިދުމަތެއް ދޭން ފަށައިފިނަމަ ވެސް، މަސްދުވަހުގެ ތެރޭގައި ވިޔަފާރި ރެޖިސްޓްރީ ކުރަންޖެހެއެވެ.
ޓޫރިޒަމް ދާއިރާގެ މުދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުގެ ތެރެއިން، ބޭރު ފައިސާއާބެހޭ ގަވާއިދުގެ ދަށުން ރެޖިސްޓްރީކޮށްފައިނުވާ ފަރާތްތަކަށް ރެޖިސްޓްރީ ކުރުމުގެ މުއްދަތު ދީފައި އޮތީ އަންނަ ހޯމައިގެ ނިޔަލަށެވެ.
މި ގަވާއިދުގެ ދަށުން އެމްއެމްއޭގައި ރެޖިސްޓްރީ ކުރަން ޖެހެނީ އެ އިދާރާގެ ފޮރިން އެކްސްޗޭންޖު ޕޯޓަލް މެދުވެރިކޮށެވެ.
ބޭރު ފައިސާއާބެހޭ ގާނޫނުގެ ދަށުން ޓޫރިސްޓު ރިޒޯޓުތަކުން ފަތުރުވެރިއެއްގެ ބޮލަކަށް 500 އެމެރިކާ ޑޮލަރު ދިވެހި ބޭންކްތަކުގައި މާރުކުރަންޖެހެއެވެ. ނުވަތަ މަހެއްގެ ތެރޭގައި އެ އެސްޓެބްލިޝްމަންޓަކަށް ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.
ގެސްޓްހައުސްތަކުން ޚިދުމަތް ހޯދާ ކޮންމެ ފަތުރުވެރިއެއްގެ ބޮލަކަށް 25 އެމެރިކާ ޑޮލަރު މާރުކުރަންޖެހެއެވެ. ނުވަތަ މަހެއްގެ ތެރޭގައި ލިބޭ ބޭރު ފައިސާގެ އާމްދަނީގެ 20 ޕަސެންޓް މާރުކުރަންޖެހެއެވެ.