ރާއްޖޭގެ ރަށްތަކަށް ބޭނުންވާ ސީ އެމްބިއުލާންސް އިތުރުކުރަންޖެހޭ ކަމަށާއި، ސަރުކާރުން މިހާރު އެ މަސައްކަތް ފަށާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ހުވަދު އަތޮޅަށް އެ މަނިކުފާނު ކުރައްވާ ދަތުރުފުޅުގައި އެންމެ ފަހު ރަށެއްގެ ގޮތުން ގއ. ދެއްވަދޫއަށް ވަޑައިގެން ރަށުގެ ރައްޔިތުންނާ މުޚާތަބުކުރައްވާ ވިދާޅުވީ، އެކަހެރިކޮށް ވަކިން އޮންނަ ރަށަކަށް ވުމުން ސީ އެމްބިއުލާންސްގެ ޚިދުމަތް އެ ރަށަށް މުހިންމު ކަމަށެވެ.
މިހާރު އެ ޚިދުމަތް ލިބުމުގައި ދެއްވަދޫއަށް ދަތިއިރު، ރާއްޖޭގެ ވަރަށް ގިނަ ރަށްތަކަށް ވެސް އެ ޚިދުމަތް ބޭނުންވާ ކަމަށް އެ މަނިކުފާނު ވިދާޅުވިއެވެ.
ދެން ޖުމުލަކޮށް ރާއްޖޭގައި ވެސް ޖިއޮގްރޮފިކަލީ ތަންކޮޅެއް އެކަހެރިކޮށް ހުންނަ ރަށްތަކަށް ޓްރެވެލް ޑިސްޓެންސްގެ ސަބަބުން އަދި އަޅުގަނޑުމެންގެ ފްލީޓް ބޮޑު ނޫންވީމާ ދަތިތަކެއް އެބަހުރި، ރައީސް ޑރ. މުހައްމަދު މުއިއްޒު
ރައީސް ވިދާޅުވީ، ރާއްޖެ އުފެދިފައި އޮތް ގޮތުން މިހާރު ވެސް ސީ އެމްބިއުލާންސްތައް އިތުރުކުރަންޖެހޭ ކަމަށެވެ. އެއް ރަށް އަނެއް ރަށާ ދެމެދު އޮންނަ ދުރު ރާސްތާގެ ސަބަބުން އެ ޚިދުމަތް އިތުރަށް ވަރުގަދަކުރަންޖެހޭކަން އެ މަނިކުފާނު ފާހަގަކުރެއްވިއެވެ.
ދެއްވަދޫއަށް ރައީސް ވަޑައިގެން ރައްޔިތުންނާ ބައްދަލުކުރައްވަނީ -- ފޮޓޯ/ ރައީސް އޮފީސް
އެހެންކަމުން މުޅި ރާއްޖެއަށް ސީ އެމްބިއުލާންސްގެ ޚިދުމަތް އިތުރަށް ފުޅާކުރުމުގެ މަސައްކަތް މިހާރު ސަރުކާރުން ކުރަމުންދާ ކަމަށެވެ.
އޭގެ ނަތީޖާއަކަށް ވާނީ އިރާދަކުރެއްވިއްޔާ މި ރަށުން ވެސް ބޭނުންވާ ގޮތަށް، މި ރަށަށް ޚާއްސަ ސީ އެމްބިއުލާންސެއް ހަމަޖެހިގެން ދިޔުން. މުޅި ރާއްޖެއަށް މިކަމުގަ ޝާމިލުވާ ރަނގަޅު ހައްލެއް ގެނައުމުގައި އަޅުގަނޑު މަސައްކަތްތަކެއް ކުރަން މިހާރު އޮތީ ފަށާފަކަން ދަންނަވާލަން، ރައީސް ޑރ. މުހައްމަދު މުއިއްޒު
މި އަހަރަށް ފާސްކުރި ދައުލަތުގެ ބަޖެޓުގައި ރައްޔިތުންގެ ބޯހިޔާވަހި ކަމަށް ފަހު އެންމެ ބޮޑު އިސްކަމެއް ދޭ އެއް ކަމަކީ ސިއްޙީ ނިޒާމު ކަމަށް ރައީސް ވަނީ މީގެ ކުރިން ވިދާޅުވެފައެވެ.
ފާހަގަކޮށްލެވޭ ގޮތުގައި މި ސަރުކާރުން މިދިޔަ އަހަރުގެ ކުރީކޮޅު ވަނީ ދަރުމަވަންތަ ހޮސްޕިޓަލުން ވިލިމާލެއާއި މާލެއާ ދެމެދު ސީ އެމްބިއުލާންސްގެ ޚިދުމަތް ފަށައިފައެވެ.
ސީއެމްބިއުލާންސްގެ ޚިދުމަތުގެ އިތުރުން، ވައިގެ މަގުން ބަލިމީހުން އުފުލުމަށް އެއާ އެމްބިއުލާންސްގެ ޚިދުމަތް ވެސް ރާއްޖޭގައި ވަނީ ތައާރަފުކޮށްފައެވެ. އެކަމަކީ ވެސް ރައީސް މުއިއްޒުގެ ރިޔާސީ ވައުދުފުޅެކެވެ. އެއާ އެމްބިއުލާންސްގެ ޚިދުމަތް ދޭން ފެށި ފަހުން 437 ބަލިމީހުން އެއާ އެމްބިއުލާންސްގައި އުފުލައި، އަވަސް ސިއްޙީ ފަރުވާ ދީފައިވާކަމަށް ހެލްތު މިނިސްޓްރީން ވަނީ ބުނެފައެވެ.