އިލެކްޝަންސް ކޮމިޝަން (އީސީ)އަށް މެންބަރުން އައްޔަންކުރަން ރައްޔިތުންގެ މަޖިލީހުގެ ދައުރުން ބޭރު ދެ ޖަލްސާއެއް މި މަހު ބާއްވަން މިއަދު ނިންމައިފިއެވެ.
"ސަން"އަށް މައުލޫމާތު ދެއްވަމުން މަޖިލީހުގެ މެޖޯރިޓީ ލީޑަރު އިބްރާހިމް ފަލާހް ވިދާޅުވީ، މި މަހު ދައުރުން ބޭރު ދެ ޖަލްސާއެއް ބާއްވަން ނިންމާފައިވާ ކަމަށެވެ. އެއީ، މި މަހުގެ 16 ވަނަ ދުވަހާއި 20 ވަނަ ދުވަހެވެ.
އޭނާ ވިދާޅުވީ، ޖަލްސާތައް ބާއްވަނީ މިނިވަން މުއައްސަސާތަކަށް މިހާރު ހުސްވެފައިވާ ޖާގަތަކަށް މީހުން ނަގާށެވެ.
ފާހަގަކޮށްލެވޭ ގޮތުގައި މަގާމުގެ މަސްއޫލިއްޔަތު އަދާކުރުމުގައި އިހުމާލުވެ، ގާނޫނާ ޚިލާފު އެތައް ކަމެއް ކުރިކަމުގެ ބޮޑެތި ތުހުމަތުތަކާ އެކު އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަނީ މަގާމުން ވަކިކޮށްފައެވެ.
އެހެންވެ، އީސީގައި މިހާރު ތިއްބެވީ ތިން މެންބަރުންނެވެ. އެއީ، މެންބަރު ހަސަން ޒަކަރިއްޔާ، އަބްދުލް ހަސީބު އިސްމާއިލް އަދި ޑރ. މުހައްމަދު ޒާހިރެވެ.
އިލެކްޝަންސް ކޮމިޝަންގެ މެންބަރު ކަމުގެ މަގާމު ހުސްވާތާ 60 ދުވަހުގެ ތެރޭގައި އެ މަގާމަށް މެންބަރަކު އައްޔަންކުރަން ޖެހޭ އިރު، އަންނަ ދައުރު ނުފެށެނީސް އެ މުއްދަތު ހަމަވެއެވެ.
މި ވަގުތު މަޖިލީސް އޮތީ ދައުރު ނިންމުމަށް ފަހު ޗުއްޓީގައެވެ. މަޖިލީސް އަލުން ހުޅުވޭނީ އަންނަ މަހެވެ.