ރަށްރަށަށް ސީދާ ރައީސް ޑރ. މުހައްމަދު މުއިއްޒު ދަތުރުފުޅުކުރައްވަނީ މި އަހަރު ތެރޭގައި ރައްޔިތުންނަށް މުހިންމުވާ މަޝްރޫއުތައް ހިނގާނެކަން ބުނެދެއްވަން ކަމަށް އެ މަނިކުފާނު މިއަދު ވިދާޅުވެއްޖެއެވެ.
ރައީސް މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ކޮންމެ ރަށަކަށް ވަޑައިގެން ވެސް އެ ރަށެއްގައި ކުރިއަށް ގެންގޮސްދެއްވާނެ މަޝްރޫއުތައް އަންނަނީ ވިދާޅުވަމުންނެވެ. ރައްޔިތުންނަށް މުހިންމުވާ މަޝްރޫއުތައް މި އަހަރާއި އަންނަ އަހަރު ފައްޓަވާނެ ކަމަށް އެ މަނިކުފާނު ތަކުރާރުކޮށް ވިދާޅުވެއެވެ.
މެންދުރު ފަހު ގއ. ކަނޑުހުޅުދޫގެ ރައްޔިތުންނާ ބައްދަލުކުރައްވާ ވާހަކަދައްކަވަމުން ރައީސް މުއިއްޒު ވިދާޅުވީ، ދަތުރުތައް މިގޮތަށް ކުރުމުގެ ބޭނުމަކީ ރައްޔިތުންނަށް މުހިންމުވާ މަޝްރޫއުތައް މި އަހަރު ވަރަށް އިސްކަންދީގެން ކުރާނެކަން އަދި އެ ވައުދުތައް ފުއްދާނެކަން ބުނެދިނުން ކަމަށެވެ.
"ދަތުރުތައް މި ކުރަނީ، މި ކަންކަން ކޮށްދޭނެ ވާހަކަ، ރައްޔިތުންނަށް މުހިންމުވާ ކަންކަން ވަރަށް އިސްކަންދީގެން މި އަހަރު ތެރޭގައި ހިނގައިގަންނާނެ ވާހަކަ އަދި ނިމެމުންދާނެ ވާހަކަ ދަންނަވަންވެގެން،" އެ މަނިކުފާނު ވިދާޅުވިއެވެ.
"...ތި ބޭފުޅުން ވިދާޅުވާން ހުރި ކަންތައްތައް ވެސް ތަންކޮޅެއް ގާތުން މިހެން ބައްދަލުވެލައިގެން ދައްކާލުމުގެ ފުރުސަތު ދިނުމަށްޓަކައި. އަދި، އަޑުއަހަން ވެސް އަޅުގަނޑު ބޭނުންވާތީ،"
ރައީސް މުއިއްޒު ރަށްރަށަށް ކުރައްވާ ދަތުރުފުޅުގެ ތެރެއިން ކަނޑުހުޅުދޫގައި: އެ މަނިކުފާނު ވިދާޅުވީ، އެ ރަށުގެ ބިން ހިއްކައިދެއްވާނެ ކަމަށް -- ފޮޓޯ/ ރައީސް އޮފީސް
މީގެ އިތުރުން، ރައީސް މުއިއްޒު ވަނީ ކަނޑުހުޅުދުއަށް ކޮށްދެއްވާނެ ކަންތައްތައް ވެސް އިއުލާނުކުރައްވާފައެވެ.
އެ ގޮތުން، އަންނަ އަހަރު އެ ރަށުގެ ބިން ހިއްކުމުގެ މަސައްކަތް ކުރިއަށް ގެންގޮސްދެއްވާނެ ކަމަށް އެ މަނިކުފާނު ވިދާޅުވިއެވެ. މި އަހަރު ތެރޭގައި އެ މަސައްކަތް ފެއްޓޭނެ ކަމަށް ގަބޫލުނުކުރެއްވޭ ކަމަށާއި އެކަމަކު، 2027 ގެ ކުރިން ބިން ހިއްކައި، އެ ތަނުގައި ރޯހައުސް މަޝްރޫއެއް ކުރިއަށް ގެންދަވާނެކަން އެ މަނިކުފާނު އިއުލާނުކުރެއްވިއެވެ.
ރައީސް ވިދާޅުވީ، ކަނޑުހުޅުދޫ ސްކޫލުގައި މިހާރު އިމާރާތްކުރަމުން އަންނަ ކްލާސްރޫމްތަކުގެ އިތުރުން ވެސް އިތުރު ކްލާސްރޫމްތަކެއް އިމާރާތްކޮށްދެއްވާނެ ކަމަށެވެ. އަދި، އެ ސްކޫލުގައި މަލްޓިޕާޕަސް ހޯލެއް ބިނާކޮށްދެއްވާނެ ކަމަށް ވެސް އެ މަނިކުފާނު ވިދާޅުވިއެވެ.
އެ ރަށުގެ ސިއްހީ މަރުކަޒަށް ދިމާވެފައިވާ ދަތިތައް ވެސް ހައްލުކޮށްދެއްވާނެކަމުގެ ޔަގީންކަން ރައީސް ވަނީ ދެއްވައިފައެވެ.
ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން، ހުވަދުއަތޮޅު ދެކުނުބުރިން އެމަނިކުފާނު އިއްޔެ ވަނީ ހޯނޑެއްދޫ، ނަޑެއްލާ، ވާދޫ، ފިޔޯރީއަށް ވަޑައިގެންފައެވެ. ހުވަދުއަތޮޅު އުތުރުބުރީން އެ މަނިކުފާނުގެ މި ދަތުރުފުޅުގައި ވަޑައިގެންނެވުމަށް ހަމަޖެހިފައި ވަނީ ކަނޑުހުޅުދޫގެ އިތުރުން ނިލަންދޫ، މާމެންދޫ އަދި ދެއްވަދޫއަށެވެ.
މި ދަތުރުފުޅުގައި އެ މަނިކުފާނުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވައެވެ. ރައީސް ހުވަދުއަތޮޅުގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ މާދަމާއެވެ.