ދަރިވަރުންގެ އުމުރާ ނުގުޅޭ ވާހަކަދައްކައި، ދަރިވަރުން ގްރޫމްކުރިކަމުގެ ތުހުމަތުގައި ހައްޔަރުކުރި ޓީޗަރު، އެ ރަށުގެ މެޖިސްޓްރޭޓް ކޯޓުން ދޫކޮށްލާފައިވަނިކޮށް އެއީ ގޯސް ނިންމުމެއް ކަމަށް ނިންމައި އަލުން ބަންދުކުރުމަށް ހައިކޯޓުން ހުކުމްކޮށްފިއެވެ.
އެ މައްސަލަ ފުލުހަށް ރިޕޯޓުކުރީ މިދިޔަ އޮކްޓޯބަރު މަހުގެ 17ވަނަ ދުވަހެވެ. އެ މައްސަލައިގައި ކޯޓު އަމުރެއްގެ ދަށުން ހައްޔަރުކުރީ އުމުރުން 29 އަހަރުގެ ފިރިހެނެކެވެ. އޭނާ ހައްޔަރުކުރީ އޮކްޓޯބަރު 27ވަނަ ދުވަހެވެ.
އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން 20 ދުވަހަށް ބަންދުކުރަން މުއްދަތު ޖެހިއެވެ. އެއަށް ފަހު 30 ދުވަހަށް ބަންދުކުރަން އަމުރުކުރިއެވެ. އެއަށް ފަހު ޑިސެމްބަރު 18 ވަނަ ދުވަހު އޭނާގެ ބަންދު މުއްދަތު ހަމަވުމާ އެކު މެޖިސްޓްރޭޓް ކޯޓަށް ހާޒިރުކުރުމުން ވަނީ ދޫކޮށްލައިފައެވެ.
އިއްޔެ ހައިކޯޓުން ކުރި ހުކުމުން އެނގޭ ގޮތުގައި މެޖިސްޓްރޭޓް ކޯޓުން އޭނާ ބަންދުން ދޫކޮށްލީ މުޖުތަމައަށް ނުރައްކަލެއް ނެތް ކަމަށް ބަލައިފައެވެ. ނަމަވެސް، ހައިކޯޓުން ވަނީ އެފަދަ މީހުންނަކީ މުޖުތަމައުގެ ސަލާމަތަށް އޮތް ނުރައްކަލެއް ކަމަށް ނިންމައިފައެވެ. ފުލުހުން ހުށަހަޅާފައިވާ ލިޔުންތަކަށް ބަލާއިރު އެ މައްސަލައިގައި ތުހުމަތުވާ ޓީޗަރުގެ ދިރިއުޅުމުގެ ވައްޓަފާޅި ހުރީ ކުޑަކުދިންނަށް ރައްކާތެރި ގޮތަކަށް ނޫން ކަމަށް ބުރަވެވޭ ކަމަށް ހުކުމުގައި ބުނެފައިވެއެވެ.
އެ މީހާއަކީ ކުރިން އެފަދަ ތުހުމަތެއް އޭނާގެ މައްޗަށް ކުރެވިފައި ނެތް މީހެއް ނަމަވެސް، އެއީ މިހާރު ތުހުމަތު ކުރެވިފައިވާ ކުށުގެ ނުރައްކާތެރިކަމުން އެހެން ކުޑަކުދިން ސަލާމަތްކޮށްދޭނެ ކަމެއް ނޫން ކަމަށް ހުކުމުގައި ބުނެފައިވެއެވެ.
އެހެންކަމުން އޭނާ ބަންދުން ދޫކޮށްލުމަށް ކޮށްފައި އޮތް އަމުރު ބާތިލުކޮށް، ހަތް ދުވަހަށް އޭނާ ބަންދުކުރުމަށް ހައިކޯޓުން ވަނީ ހުކުމްކޮށްފައެވެ. އެ މުއްދަތުގައި އޭނާގެ ބަންދާމެދު ގޮތެއް ނިންމުމަށް އަލުން މެޖިސްޓްރޭޓް ކޯޓަށް ހުށަހެޅުމަށް ޕްރޮސިކިއުޓާ ޖެނެރަލަށް އަންގަން ވަނީ ހުކުމްކޮށްފައެވެ.
ހައި ކޯޓުގެ ހުކުމުން އެނގޭ ގޮތުގައި މި ޓީޗަރަކީ ސްކޫލެއްގައި ކިޔަވައިދެމުންދިޔަ ޕްރައިމަރީ ޓީޗަރެކެވެ. އޭނާގެ މައްޗަށް ތުހުމަތުކުރެވޭ މައްސަލައިގައި އޭނާ ވަޒީފާ އަދާކުރަމުންދާ ސްކޫލުގައި ކިޔަވަމުންދާ 18 އަހަރުން ދަށުގެ ފިރިހެން ކުދިންތަކަކާ މެދު ޖިންސީ އަމަލު ހިންގި ކަމަށް ތުހުމަތުކޮށް ހެކި ވަނީ ހުށަހަޅާފައެވެ. އޭނާ ވަނީ ޖިންސީ އަމަލު ހިންގުމަށްޓަކައި ގިނަ ކުދިންތަކެއް ގްރޫމްކޮށްފައި ކަމަށް ހުކުމުގައި ބުނެފައިވެއެވެ.
ފުލުހުން ބުނީ، މި މައްސަލަ ރިޕޯޓު ކުރީ މ، ފ، ދ، ތ، ލ. އަތޮޅުގެ ތެރެއިން އަތޮޅެއްގެ ރަށަކުން ކަމަށެވެ. މި މައްސަލައަކީ ކުޑަކުދިން ޝާމިލުވާ މައްސަލައަކަށްވުމުން، ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާ ނިސްބަތްވާ ރަށް ފުލުހުން ހާމަކޮށްފައެއް ނުވެއެވެ. ހައިކޯޓުގެ ހުކުމުގައި ވެސް އެ މައުލޫމާތުތައް ވަނީ ސިއްރުކޮށްފައެވެ.