މިވަގުތު މާލެ ސަރަހައްދަށް ކުރަމުންދާ ވިއްސާރައާ ގުޅިގެން ހުޅުމާލެ ސަހަރާގައި މީހުން ވަޅުލެވެން ނެތުމުން، މިއަދު ހުޅުމާލެ ސަހަރާގައި ވަޅުލަން ހަމަޖެހިފައިވާ މީހުންގެ ޖަނާޒާގެ އިންތިޒާމް ހަމަޖެހިފައިވަނީ މާލޭ އާސަހަރާ މިސްކިތުގައި ކަމަށް މާލެ ސިޓީ ކައުންސިލުން ބުނެފިއެވެ.
ސޯޝަލް މީޑިއާގައި ކުރި ޕޯސްޓެއްގައި މާލެ ސިޓީ ކައުންސިލުން ބުނީ މިވަގުތު ކުރާ ވިއްސާރާއިގެ ސަބަބުން ހުޅުމާލެ ސަހަރާގެ ފެންފަށަލައިގައި އަށް އިންޗިއާއި ނުވަ އިންޗިއާއި ދެމެދު މިންވަރަކަށް ފެން ހަރުލާފައި އެބަހުރި ކަމަށެވެ.
އެކަމުގެ ސަބަބުން، ކަށްވަޅު ކޮނެ ސަންދޯއް ބެހެއްޓުމަށް ދަތިވެފައިވާ ކަމަށް ވެސް އެ ކައުންސިލުން ބުންޏެވެ.
އަދި މި ވަގުތަށް ހުޅުމާލެ ސަހަރާގައި މީހުން ވަޅުލެވެން ނެތް ކަމަށް ސިޓީ ކައުންސިލުން ވަނީ ބުނެފައެވެ.
އެހެންކަމުން މިއަދު ހުޅުމާލެ ސަހަރާގައި ވަޅުލަން ހަމަޖެހިފައިވާ މީހުންގެ ޖަނާޒާގެ އިންތިޒާމް ހަމަޖެހިފައި ވަނީ، މާލޭ އާސަހަރާ މިސްކިތުގައި ކަމަށް ވެސް ސިޓީ ކައުންސިލުން ބުންޏެވެ.