ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޑެޕިއުޓީ މެނޭޖިން ޑިރެކްޓަރުކަމަށް ފަޔާޒު މަންސޫރު އައްޔަންކޮށްފިއެވެ.
ފަޔާޒަކީ އިމާރާތްކުރުމުގެ ދާއިރާއަށް ޚާއްސަ އާކިޓެކްޓެކެވެ. އޭނާ ވަނީ 1996ވަނަ އަހަރު، އޮސްޓްރޭލިއާގެ ކުއީންސްލޭންޑް ޔުނިވާސިޓީ އޮފް ޓެކްނޮލޮޖީއިން ކުއަންޓިޓީ ސާވެއިންއިން ޑިގްރީ ހާސިލްކުރައްވައިފައެވެ.
އަދި 2000ވަނަ އަހަރު، ނިއު ޒިލޭންޑުގެ ވިކްޓޯރިއާ ޔުނިވާސިޓީ އޮފް ވެލިންގްޓަނުން ބިލްޑިން ސައިންސުން މާސްޓާޒް ހާސިލްކުރައްވައިފައެވެ.
ފަޔާޒު ވަނީ ހުޅުމާލޭ ހިއްކި ދުވަސްވަރު އެ މަސައްކަތުގައި މުހިންމު ދައުރެއް އަދައިކުރައްވައިފައެވެ.
އެގޮތުން ރައީސް އޮފީހުގައި ހުޅުމާލެ ޑިވެލޮޕްމަންޓު ޔުނިޓުގެ ކުއަންޓިޓީ ސާވެޔަރެއްގެ މަގާމުގައި 2001 އިން 2002 އަށް، އަދި ޑެޕިއުޓީ ޑިރެކްޓަރެއްގެ މަގާމުގައި 2002 އިން 2004 އަށް އޭނާ މަސައްކަތް ކުރެއްވިއެވެ.
އެ ދުވަސްވަރު އޭނާ ވަނީ ހުޅުމާލޭ ތަރައްގީ ކުރުމުގެ މަސައްކަތުގައި ލޯން މެނޭޖުކުރުމާއި، ބަޖެޓުކުރުމާއި، ކޭޝް ފްލޯ ތައްޔާރުކުރުންފަދަ މާލީ ގޮތުން ކުރަންޖެހޭ މަސައްކަތްތައް ކުރައްވައިފައެވެ. އަދި އެ ޔުނިޓުގެ މާލީ މަސައްކަތްތަކާއި ރިއަލް އެސްޓޭޓް ސެކްޝަން ހިންގަވައިފައެވެ.
އެޗްޑީސީގެ ޑެޕިއުޓީ މެނޭޖިން ޑިރެކްޓަރުކަމުގެ މަގާމަށް އައްޔަންކުރިއިރު އޭނާއަކީ ގެޑޯ އާކިޓެކްޗާ ކުންފުނީގެ ޑިރެކްޓަރެކެވެ.