ގޭބީސީތަކަށް ފެނާއި، ނަރުދަމާއާއި، ކަރަންޓު އަދި އިންޓަނެޓްގެ ޚިދުމަތް ފޯރުކޮށްދިނުމަށް ފަހު، އެ ޚިދުމަތް ލިބިގަތުމުގައި އިތުރު ތަކުލީފާއި، އިތުރަށް ހޭދަކުރަންޖެހުން ހައްލުކޮށް، ޚިދުމަތް ލިބިގަންނަ އާންމުންގެ ހައްގު އެދެވޭ ގޮތުގައި ހިމާޔަތްކުރުމަށް ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
މި ބިލު ހުށަހެޅުއްވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހީމް (ކުޑޫ)އެވެ. މި ބިލު މަޖިލީހަށް ހުށަހެޅި ޑިސެމްބަރު 8، 2024 ގައެވެ. ބިލު ހުށަހެޅިއިރު މި ވަގުތު މަޖިލިސް އޮތީ ޗުއްޓީގައެވެ.
ބިލު ހުށަހެޅުމުގެ މަގުސަދެއްގެ ގޮތުގައި މެންބަރު ފާހަގަކުރެއްވީ ރާއްޖޭގައި ފެނާއި، ނަރުދަމާގެ އިތުރުން ކަރަންޓުގެ ޚިދުމަތް ދެނީ 'މޮނޮޕޮލީ'އެއްގެ ދަށުން ކަމަށާއި، އިންޓަނެޓްގެ ޚިދުމަތް ދޭ މައިގަނޑު ދެ ކުންފުނީގެ މެދުގައި ވެސް އެދެވޭ ވާދަވެރިކަމެއް ނެތުމުން ޚިދުމަތް ލިބިގަންނަ ފަރާތްތަކުގެ ހައްގު އެދެވޭ ގޮތުގައި ހިމާޔަތްނުކުރެވޭތީއެވެ.
ގޭބީސީއަކަށް ޚިދުމަތް ފޯރުކޮށްދިނުމަށް ފަހު އެދެވޭ ގޮތުގައި އެ ޚިދުމަތް ލިބިގަތުމަށް އިތުރު ތަކުލީފުތަކާ އިތުރު ހޭދަތައް ކުރަންޖެހޭކަން ބިލުގައި ވަނީ ފާހަގަކޮށްފައެވެ.
މި ބިލުގައި އިސްލާހު ހުށަހަޅާފައިވަނީ މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތްކުރުމުގެ ގާނޫނުގެ 32ވަނަ މާއްދާއަށާއި 90 ވަނަ މާއްދާއަށެވެ.
އެ އިސްލާހުގައި ބުނެފައިވަނީ ފެނާއި، ނަރުދަމާއާއި، ކަރަންޓު އަދި އިންޓަނެޓްގެ ޚިދުމަތް ފޯރުކޮށްދޭ ފަރާތްތަކުން ގޭބީސީއަކަށް ފޯރުކޮށްދޭ ޚިދުމަތް އެ ގޭބީސީއެއްގެ ހުރިހާ ކަންކޮޅުތަކަށް އެއް މިންވަރަކަށް، އެއް ބާރުމިނެއްގައި އަދި އެއް ހަލުވިމިނެއްގައި ފޯރުކޮށްދޭންވާނެ ކަމަށެވެ.
އެ ޚިދުމަތްތައް ގޭބީސީއެއްގެ އެންމެހާ ކޮޓަރިތަކަށާއި، ފާޚާނާތަކަށާއި އެ ގޭބީސީއެއްގެ އެންމެހާ ކަންކޮޅުތަކަށް އެއް މިންވަރެއްގައި އެ ޚިދުމަތް ލިބޭތޯ ކަށަވަރުކުރުމަކީ އެ ޚިދުމަތް ފޯރުކޮށްދޭ ފަރާތުގެ ޒިންމާއެއް ކަމަށް ވެސް އެ އިސްލާހުގައި ބުނެފައިވެއެވެ. ޚިދުމަތް ފޯރުކޮށްދިނުމުގެ ބޭނުމުގައި އެ ގޭބީސީއަކުން އިތުރު ފީއެއް ނެގުމަކީ މަނާކަމެއް ކަމަށް ވެސް ބަޔާންކޮށްފައިވެއެވެ.
ޚިދުމަތްދޭ ފަރާތަކުން އެ މާއްދާއާ ޚިލާފުވެއްޖެނަމަ، ޚިދުމަތް ލިބިގަންނަ ގާނޫނުގެ ދަށުން ކޮންސިއުމާ އޮމްބަޑްސްމަންއަށް މައްސަލަ ހުށަހެޅުމާއި، އެ މާއްދާ ލާޒިމުކުރާ ގޮތުގެ މަތިން އެ ޚިދުމަތް ފޯރުކޮށްދިނުމުގެ އަމުރަކަށް އެދި ޝަރުއީ ކޯޓަށް މައްސަލަ ހުށަހެޅޭނެ ކަމަށް އިސްލާޙުގައި ބަޔާންކޮށްފައިވެއެވެ. ގާނޫނުގެ 30 ވަނަ މާއްދާގެ ދަށުން ގެއްލުމުގެ ބަދަލު ހޯދުމަށް ދައުވާ ކުރުމުގެ ހައްގު ލިބިގެންވާނެ ކަމަށް ވެސް އިސްލާހުގައިވެއެވެ.
މިހާރު ރާއްޖޭގައި ޔުޓިލިޓީ ޚިދުމަތްތައް ފޯރުކޮށްދެނީ ސްޓެލްކޯއާއި ފެނަކައިންނެވެ. އަދި، އިންޓަނެޓްގެ ޚިދުމަތް ފޯރުކޮށްދެނީ ދިރާގު އަދި އުރީދޫންނެވެ.