އިހުސާން ފިހާރައެއް ހިންގާ ގ. އުފުރިޔާ ގޭގެ ހަަވަނަ ފަންގިފިލާގައި ރޭ ހިނގި އަލިފާނުގެ ހާދިސާއާ ގުޅިގެން އެކަކަށް ވަގުތީ ބޯހިޔާވަހިކަން ފޯރުކޮށްދީފިއެވެ.
ރޭ 11:27 ކަންހާއިރު އެ ގޭގައި ރޯވި އަލިފާންގަނޑު ނިއްވާލެވިފައިވަނީ ރޭ 12:01 ހާއިރު ކަމަށް އެމްއެންޑީއެފްއިން ބުނެއެވެ. ފޮޓޯތަކުން ފެންނަ ގޮތުގައި އަލިފާން ރޯވި އެޕާޓްމަންޓަށް ބޮޑެތި ގެއްލުންތަކެއް ވަނީ ލިބިފައެވެ.
ނަމަވެސް މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައެއް ނުވެއެވެ.
ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިއަދު ބުނީ އެ އެޕާޓްމަންޓުގައި ދިރިއުޅުނު މީހުންގެ ތެރެއިން އެކަކު ވަގުތީ ބޯހިޔާވަހިކަމަށް އެދިފައިވާ ކަމަށެވެ.
އެހެންކަމުން އެ މީހާއަށް އެއް ދުވަހަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު ހަމަޖައްސާފައިވާ ކަމަށް އެ އޮތޯރިޓީން ބުންޏެވެ.
ދޭތެރެ ދޭތެރެއިން މާލޭގައި އަންނަނީ މިފަދަ އަލިފާނުގެ ހާދިސާތައް ހިނގަމުންނެވެ. އެގޮތުން މިދިޔަ އަހަރު ވެސް ނުރައްކާތެރި، ބޮޑެތި އަލިފާނުގެ ހަދިސާތަކެއް ވަނީ ހިނގައިފައެވެ. އޭގެ ތެރޭގައި ތިން މިނިސްޓްރީއެއް މުޅިން އެނދި އަލިފާނުގެ ހާދިސާ ހިމެނެއެވެ.