ޓީވީ އަދި ފިލްމުތަކަށް އެކީގައި ދޭ އެންމެ ވަރުގަދަ އެއް އެވޯޑު ކަމަށްވާ ގޯލްޑެން ގްލޯބްސްގެ މި އަހަރުގެ އެވޯޑު ރޭހުގައި އެންމެ ގިނަ އެވޯޑު ހޯދި އުފެއްދުމަކަށް، އެފްއެކްސްގެ ޓީވީޝޯ "ޝޯގުން" ވެއްޖެއެވެ.
ފިއުޑަލް ޖަޕާނަށް 1600ގެ އަހަރުތައް ދައްކުވައިދޭ މި ލިމިޓެޑް ޝޯ ވަނީ އިއްޔެގެ ގޯލްޑަން ގްލޯބްސް އެވޯޑު ހަފުލާގައި ފަސް އެވޯޑު ހޯދާފައެވެ. މި ފަސް އެވޯޑުތަކުގެ ތިން އެވޯޑު ހޯދާފައިވަނީ ޝޯގެ ކާސްޓުންނެވެ.
ޓީވީ ޝޯތަކުގެ ކެޓެގަރީން އެންމެ މޮޅު އެކްޓަރުގެ ރޯލު ޝޯގެ ލީޑް، ހިރޮޔޫކީ ސަނާޑާ ހޯދާފައިވާއިރު ލީޑް އެކްޓްރެސްގެ ރޯލް ހޯދާފައިވަނީ ޝޯގެ ލީޑް އަނާ ސިވާއީއެވެ. އެންމެ މޮޅު ސަޕޯޓިން އެކްޓަރުގެ ރޯލު، ޝޯގެ އެކްޓަރު ޓަޑަނޯބޫ އަސާނޫ ވަނީ ހޯދާފައެވެ.
މީގެ އިތުރުން، ޝޯގުން ވަނީ އެވޯޑު ހަފުލާގެ އެންމެ މޮޅު ޝޯގެ އެވޯޑު އަދި އެންމެ މޮޅު ސިނެމެޓޮގްރަފީ އަދި ސްކޯ ވެސް ހޯދާފައެވެ.
ލިސްޓުގެ ދެވަނައިގައި އޮތީ އެމިލިއާ ޕެރޭޒްއެވެ. ސެލީނާ ގޮމޭޒް ލީޑުން ފެނިގެންދާ މި ފިލްމަކީ ގޯލްޑެން ގްލޯބްސްގައި އެންމެ ގިނަ ނޯމިނޭޝަން ލިބިފައިވާ ފިލްމެވެ. މި ފިލްމަށް ވަނީ ތިން އެވޯޑު ލިބިފައެވެ. ލިސްޓުގެ ތިންވަނައިގައި ދެ ނޯމިނޭޝަންއާ އެކު އޮތީ ހިސްޓޮރިކަލް ޑްރާމާ "ބްރޫޓަލިސްޓް"އެވެ.
ގޯލްޑެން ގްލޯބްސްގައި ފިލްމު ކެޓަގަރީން އެންމެ މޮޅު އެކްޓްރެސްގެ އެވޯޑު ހޯދާފައިވަނީ ޑެމީ މޫއެވެ. ޑެމީއަށް މި އެވޯޑު ލިބިފައިވަނީ މިދިޔަ އަހަރު ނެރުނު ހިޓް ފިލްމު "ސަބްސްޓެންސް"އިން އޭނާ ދައްކާފައިވާ ރޯލުންނެވެ. މިއީ އޭނާގެ 45 އަހަރުގެ އެކްޓިން ކެރިއަރުގެ ފުރަތަމަ އެވޯޑެވެ. އެންމެ މޮޅު އެކްޓަރުގެ ރޯލުން އެވޯޑު ހާސިލުކޮށްފައިވަނީ ބްރޫޓަލިސްޓުން އޭޑްރިއަން ބްރޯޑީއެވެ.