ގައުމީ އެއާލައިން، އެއާކްރާފްޓާއެކު މި މަހުގެ ތެރޭގައި ޗައިނާގެ ތިން ސިޓީއަކަށް ދަތުރުތައް ފަށާނެ ކަމަށް އެ ކުންފުނީގެ މެނޭޖިން ޑިރެކްޓަރު އިބްރާހީމް އިޔާސް މިއަދު ވިދާޅުވެއްޖެއެވެ.
މޯލްޑިވިއަނަށް އެއާބަސް އޭ330 އެއާކްރާފްޓު ގެނެސް، އޮޕަރޭޝަން ފެށުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން އިޔާސް ވިދާޅުވީ އައު ބޯޓާއެކު ޗައިނާގެ ބެެއިޖިން، ޝަންގްހާއި އަދި ޗެންގްޑޫއަށް ދަތުރުތައް ކުރުމަށް މި މަހު ހަމަޖެހިފައިވާ ކަމަށެވެ.
"މި މަޝްރޫއުގެ ދަށުން ޗައިނާގެ ތިން މަންޒިލް ކަމަށްވާ، ބެއިޖިން، ޝަންގްހައި އަދި ޗެންގްޑޫއަށް ވެލާނާ އިންޓަނޭޝަނަލް އެއާޕޯޓުން ސީދާ ދަތުރުތައް މި މަހުގެ ތެރޭގައި ފެށިގެންދާނެ," އިޔާސް ވިދާޅުވިއެވެ.
އޭނާ ވިދާޅުވީ މިއަދު ގެނެވުނު އައު ބޯޓާއެކު، ރާއްޖޭގެ ވައިގެ ދަތުރުފަތުރު ފުޅާކުރެވި، ފަތުވެރިކަން އިތުރަށް ފުޅާކުރުމުގެ މަސައްކަތް ފެށިގެންދާ ކަމަށެވެ.
މޯލްޑިވިއަނުން މިއަދު ރާއްޖެ ގެނައި ވައިޑްބޮޑީ މަތިންދާބޯޓު، އެއާބަސް އޭ330 ވެލާނާ އިންޓަނޭޝަނަލް އެއާޕޯޓަށް ޖެއްސުން -- ފޮޓޯ: ރައީސް އޮފީސް
އިޔާސްވަނީ މި އެއާކްރާފްޓް ގެނައުމުގައި މަސައްކަތްކުރީ މޯލްޑިވިއަނުގެ ހީވާގި ދިވެހި މުވައްޒަފުންކަން ފާހަގަ ކުރައްވައި، އެ ހުރިހާ ފަރާތްތަކަށް ޝުކުރު އަދާކުރައްވައިފައެވެ. އަދި މި މަސައްކަތުގައި އެހީތެރިކަން ފޯރުކޮށްދެއްވި ވަޒީރުންނާއި ސަރުކާރުގެ މުއައްސަސާތަކަށް ވެސް ޝުކުރު އަދާ ކުރެއްވިއެވެ.
ވައިޑްބޮޑީ ދެ އެއާކްރާފްޓެއް ގައުމީ އެއާލައިނަށް ގެނެސްގެން ޚިދުމަތް ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
މީގެ ދެވަނަ ބޯޓު ރާއްޖެ ގެނެސް، މި އަހަރުގެ އޮކްޓޫބަރުގެ އުދުހުންތައް ފެށޭނެ ކަމަށް ރައީސްވަނީ މިއަދު ވިދާޅުވެފައެވެ.
ވައިޑްބޮޑީ އެއާކްރާފްޓްތަކުން އެއްފަހަރާ 264 ފަސިންޖަރުންނަށް ދުރު މަންޒިލްތަކަށް ސީދާ ދަތުރު ކުރެވޭނެއެވެ.
މީގެ ކުރިން މޯލްޑިވިއަން އެއާލައިންގެ އެއާބަސް ބޭނުންކޮށްގެން ޗައިނާ އާއި ސައުތު އެފްރިކާއަށް ދަތުރުކުރިއެވެ. ނަމަވެސް، އޭރު ގެންގުޅުނީ ދިގު ދަތުރުތައް ކުރެވޭ ވަރުގެ ބޯޓުތަކަކަށް ނުވުމުން ދަތުރުތައް ކުރީ އެހެން މަންޒިލްތަކަށް ޓްރާންސިޓް ކޮށްގެންނެވެ.
މި ވަގުތު މޯލްޑިވިއަންގެ ފްލީޓުގައި 24 ބޯޓެއް ދަނީ އޮޕަރޭޓު ކުރަމުންނެވެ. އަދި 29 މަންޒިލަކަށް ދަތުރުތައް އަޅައި، އަހަރަކު 56،000އަށްވުރެ ގިނަ ފްލައިޓު އޮޕަރޭޓުކުރާއިރު، އަހަރެއްގެ މައްޗަށް މިލިއަނަކަށްވުރެ ގިނަ މީހުންނަށް ޚިދުމަތްދެމުންނެވެ.