ބޮކްސް އޮފީހުގައި ލިބޭ ކާމިޔާބީއަށް ވުރެ ބޮޑަށް މުހިންމީ ފިލްމީ މަސައްކަތްތައް ކުރުމުގައި ދެމިހުރުން ކަމަށް ބޮލީވުޑްގެ އެކްޓަރު އަކްޝޭ ކުމާރު ބުނެފިއެވެ.
އަކްޝޭގެ ކުރިއަށް އޮތް ފިލްމު "ސްކައި ފޯސް"ގެ ޓްރެއިލާ ރިލީޒްކުރަން ބޭއްވި ޚާއްސަ ހަފުލާގައި މީޑިއާއިން ކުރި ސުވާލުތަކަށް ޖަވާބުދެމުން އެކްޓަރު ބުނީ، 33 އަހަރުވީ ފިލްމީ ކެރިއަރުގައި ވަރަށް ބުރަކޮށް މަސައްކަތްކޮށްފައި ހުންނާނެ ކަމަށާއި އެއްވެސް އިރަކު ބޮކްސް އޮފީހުގެ ކާމިޔާބީއަށް ބަރޯސާނުވާ ކަމަށެވެ.
"ސްކައި ފޯސް"ގެ މަންޒަރެއްގައި އަކްޝޭ ކުމާރު އަދި ފިލްމުން ބޮލީވުޑަށް ތައާރަފްވާ އެކްޓަރު ވީރު ޕަހަރިޔާ--ފޮޓޯ/ޕިންކްވިލާ
މި ފަހުން ރިލީޒްކުރި އަކްޝޭގެ ގިނަ ފިލްމުތަކަކީ ވެސް ބޮކްސް އޮފީހުގައި މާ ބޮޑަށް ވިދާލި ފިލްމުތަކަކަށް ނުވި ކަމަށް ވިޔަސް އެ ފިލްމުތަކުގައި ކުރެވުނު މަސައްކަތާ މެދު ވަރަށް ބޮޑަށް ހިތްހަމަޖެހޭ ކަމަށް އެކްޓަރު ވަނީ ބުނެފައެވެ.
އޭގެ ތެރޭގައި ފިލްމު "ބަޅޭ މިޔާ ޗޯޓޭ މިޔާ"، "ސަރުފީރާ" އަދި "ކޭލް ކޭލް މޭ" ހިމެނެއެވެ. ނަމަވެސް، އަކްޝޭ ވަރަށް ކުޑަކުޑަ ރޯލަކުން ފެނުނު ފިލްމުތައް ކަމަށްވާ "އިސްތިރީ 2" އަދި "ސިންގްހަމް އަގެއިން"އަށް ބޮކްސް އޮފީހުގައި ބޮޑު ކާމިޔާބީއެއް ވަނީ ލިބިފައެވެ.
ބޮކްސް އޮފީހުގައި އަކްޝޭގެ ފިލްމުތަކަށް ނާކާމިޔާބީއާ ކުރިމަތިލާން ޖެހުމަކީ އާ ކަމެއް ނޫން ކަމަށާއި ކުރިމަގުގައި ވެސް މަސައްކަތް ކުރާނީ އަކްޝޭ ކުޅޭ ފިލްމުތަކުގައި ކުޅޭ ރޯލްތައް އެންމެ ފުރިހަމައަށް ބެލުންތެރިންނަށް ގެނެސްދިނުމަށް ކަމަށް އެކްޓަރު ވަނީ ބުނެފައެވެ.
އަކްޝޭގެ ފިލްމުތަކަށް ބޮކްސް އޮފީހުގައި މާ ބޮޑު ކާމިޔާބީއެއް ނުލިބުނު ނަމަވެސް 57 އަހަރުގެ އެކްޓަރަކީ އަހަރެއްގެ މައްޗަށް އެންމެ ގިނަ ފިލްމުތަކަށް ސޮއިކުރާ އެއް އެކްޓަރެވެ. ރިޕޯޓުތައް ބުނާގޮތުން އަކްޝޭ ފިލްމު ކުޅެދޭ އަގު 17 މިލިއަން އެމެރިކާ ޑޮލަރަށް އަރައެވެ.
މި އަހަރު ރިލީޒްކުރާ އަކްޝޭގެ ފުރަތަމަ ފިލްމު "ސްކައި ފޯސް"ގެ ޓްރެއިލާ ބެލުންތެރިންނަށް ދައްކާލާފައިވާއިރު ފިލްމު ސިނަމާތަކަށް ގެންނަން ތާވަލުކޮށްފައިވަނީ މި މަހުގެ 24 ވަނަ ދުވަހެވެ. މި ފިލްމަކީ މިހާތަނަށް އިންޑިއާއާއި ޕާކިސްތާނާ ދެމެދު ހިނގި އެންމެ ވަރުގަދަ ވައިގެ ހަމަލާގެ ހާދިސާގެ މައްޗަށް ބިނާކޮށް އުފައްދާފައިވާ ތާރީޚީ ހަނގުރާމަ މަތީ ފިލްމެކެވެ.