ފަތުރުވެރިކަމުގައި މި އަހަރަކީ ރާއްޖެއަށް ވަރަށް ކާމިޔާބު އަހަރެއް ކަމަށާއި، އަންނަ އަހަރުގެ އަމާޒަކީ ފަތުރުވެރިކަމުން ރާއްޖެއަށް ލިބޭ އާމްދަނީ ފަސް ބިލިއަން ޑޮލަރަށް މައްޗަށް ޖެއްސުންކަމަށް މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމްއެމްޕީއާރްސީ)އިން މިއަދު ބުނެފިއެވެ.
ފަތުރުވެރިކަމުގެ ދާއިރާއިން މި އަަހަރު ކުރެވުނު މުހިންމު މަސައްކަތްތަކާއި ކާމިޔާބުތަކުގެ ވާހަަކަ ހިއްސާކުރުމަށް މިއަދު އޮތް ނޫސްވެރިންގެ ބައްދަލުވުމުގައި އެ ކޯޕަރޭޝަނުގެ ޗެއާޕާސަން އަބްދުﷲ ޣިޔާސްއާއި، މެނޭޖިން ޑިރެކްޓަރު އިބްރާހިމް ޝިއުރީ ވަނީ މައުލޫމާތު ހިއްސާކުރައްވައިފައެވެ.
އެމްއެމްޕީއާރްސީގެ ޗެއާޕާސަން އަބްދުﷲ ޣިޔާސް ނޫސްވެރިންގެ ބައްދަލުވުމުގައި ވާހަކަދައްކަވަނީ -- ފޮޓޯ: އެމްއެމްޕީއާރްސީ
އެ ބޭފުޅުން ފާހަގަކުރެއްވި ގޮތުގައި މި އަހަރުގެ އެންމެ ބޮޑެތި ކާމިޔާބީތަކުގެ ތެރޭ ހިމެނޭ ކަންކަމުގެ ތެރޭ:
- އެއް މިލިއަން ފަތުުރުވެރިންގެ އަމާޒު ހާސިލްވަމުން އަންނަތާ 11 އަހަރަށްފަހު ދެ މިލިއަނަށްވުރެ ގިނަ ފަތުރުވެރިން ރާއްޖެ އައުން
- މިހާތަނަށް އެންމެ މަހަކުން، އަދި އެއް ދުވަހުން އެންމެ ގިިނައިން ފަތުރުވެރިން އައި މަހުގެ ގޮތުގައި މި އަހަރުގެ ފެބްރުއަރީ ވުން
- ވޯލްޑް ޓްރެވަލް އެވޯޑްސްގައި، ވޯލްޑް ލީޑިން ގްރީން ޑެސްޓިނޭޝަންގެ އެވޯޑު ފުރަތަމަ ފަހަރަށް ހާސިލްކުރެވުން
- ވޯލްޑް ޓްރެވަލް އެވޯޑްސްގައި، ވިދިވިދިގެން ފަސްވަނަ ފަހަރަށް ވޯލްޑް ލީޑިން ޑެސްޓިނޭޝަންގެ އެވޯޑު ހާސިލްކުރެވުން
- މާކެޓިންގެ މަސައްކަތުގެ ތެރެއިން 23 ފެއާއާއި ރޯޑްޝޯ، 15 ސޯޝަލް މީޑިއާ ކެމްޕެއިން، 23 ވާޗުއަލް އިވެންޓު ބޭއްވުން
- އައިޓީބީ ބާލިން އަދި އޭޓީއެމް ދުބާއީގައި ބައިވެރިވެ، ރާއްޖެ ތަމްސީލްކުރުމާއި، ފުރަތަމަ ފަހަރަސް އައިޓީބީ ޗައިނާ ހޯސްޓުކުރުން
- އާ އެއާލައިންތަކުން ރާއްޖެއަށް ދަތުުރު ފެށުން
- މަރުކަޒީ ބޭންކް އެމްއެމްއޭގެ ހިސާބުތަކުން މިދިޔަ އަހަރާއި މި އަހަރާ އަޅައިބަލާއިރު، މި އަަހަރު ޓޫރިޒަމުން ލިބުނު އާމްދަނީ 15 ޕަސެންޓުން އިތުރުވުމާއި، ޓޫރިޒަމާ ގުޅޭ އެކި ޓެކްސްތަކުން މީރާއަށް ލިބުނު އާމްދަނީ އަށް ޕަސެންޓު އިތުރުވުން
އެއާއެކު ކުރިއަށް އޮތް އަހަރަކީ ވެސް ފަތުރުވެރިކަމުން އިތުރު ކާމިޔާބީތަކެއް ހޯދަން މަސައްކަތްކުރާނެ އަހަރެއްކަމަށް ޗެއާޕާސަން، ޣިޔާސް ވަނީ ވިދާޅުވެފައެވެ.
"އަޅުގަނޑުމެން 2025އަށް ބަލާއިރު ވަރަށް ގިނަ އާ އިނީޝިއޭޓިވްސް ތަކެއް އެބަ އިންޓްރޮޑިއުސްކުރަން،" އޭނާ ވިދާޅުވިއެވެ.
ޣިޔާސް ވިދާޅުވީ އަމާޒަކީ ހަމައެކަނި ނަންބަރުތަކެއް އިތުރުކުރުން ނޫން ކަމަށެވެ. ނަމަވެސް ރާއްޖޭގެ ފަތުރުވެރިކަމުގެ ފެންވަރު ވެސް އިތުރަށް ފުރިހަމަކޮށް މަތިކުރުން ކަމަށް ވިދާޅުވިއެވެ.
އެގޮތުން ފަތުރުވެރިކަމުގެ ދާާއިރާއާ ގުޅޭ ޓެކްސްތަަކަށް އަންނަ ބަދަލާއި، ފަތުރުވެރިން އިތުރަށް އަންނާނެކަމަށް ލަފާކުރެވުމާއެކު އަމާޒަކީ، މިހާރު ހަތަރު ބިލިއަން ޑޮލަރުގެ އާމްދަނީއެއް ލިބުނު ނަމަވެސް، އަންނަ އަހަރު ފަސް ބިލިއަން ޑޮލަރަށް އެ އަދަދު މަތިކުރުން ކަމަށް ވިދާޅުވިއެވެ.
މީގެ އިތުރުން އަންނަ އަހަރުގެ އަމާޒަކީ ދެ މިލިއަން ފަތުރުވެރިންގެ 15 ޕަސެންޓު އިތުރަށް، ފަތުރުވެރިން ރާއްޖެ ގެނައުން ކަމަށް އޭނާ ފާހަގަކުރެއްވިއެވެ.
މީގެ އިތުރުން ޝިއުރީ ވަނީ މި ފެށޭ އަހަރު ކުރަން ހުރި މުހިންމު ކަންކަން ހިއްސާކުރައްވައިފައެވެ. އޭގެ ތެރޭ ހިމެނެނީ:
- ވިޒިޓް މޯލްޑިވްސް ޝޮޕްއެއް ތައާރަފްކުރުން
- ރާއްޖޭގެ ރިސޯޓުތަކުން ހިންގާ ހަރަކާތްތަކާއި ޚާއްސަ ކަންކަން ފަތުރުވެރިންނަށް ފެންނާނެހެން ވިޒިޓް މޯލްޑިވްސް ކަލެންޑަރު ތައާރަފްކުރުން
- ރާއްޖޭގެ ފަތުރުވެރިންނަށް ހުރި އިންތިޒާމުތަކާއި، ކަންކަން ދަސްކޮށްދިނުމަށް ދިވެހިރާއްޖޭގެ ގައުމީ ޔުނިވާސިޓީއާ ގުޅިގެން ވިޒިޓް މޯލްޑިވްސް އެކެޑަމީއެއް ތައާރަފްކުރުން
- ރާއްޖޭގެ ކޮންޓެންޓް ހަދާ މީހުންނަށް، ކޮންޓެންޓް ވިއްކައި، ވިޔަފާރިއަށް ފަހިކުރަން ވިޒިޓް މޯލްޑިވްސް ކޮންޓެންޓް ޕޯޓަލް ތައާރަފްކުރުން
- ފަތުރުވެރިކަމުގެ ތަފާސް ހިސާބުތައް، ބައިނަލްއަގްވާމީ ފަރާތްތަކަށް ހިއްސާކުރުމަށް ވިޒިޓް މޯލްޑިވްސް ޑޭޓާ ޑޭޝްބޯޑް ތައާރަފްކުރުން
- މުހިންމު މާކެޓްތަކުގައި "ވިޒިޓް މޯލްޑިވްސް ވީކް" ހިންގުން
- މި އަަހަރުގެ ޖެނުއަރީ އެކަކުން ފެށިގެން އެކި ޕްލެޓްފޯމްތަކުގައި "ވޯލްޑްސް ބިގެސްޓް ގިވްއަވޭ 2025" ގެ ނަމުގައި ރާއްޖެއިން ކުރިއަށް ގެންދާ ޚާއްސަ ޕްރޮމޯޝަން ފެށުން
މި ފެށޭ އަހަރު ވެސް ފަތުރުވެރިކަމުގެ ދާއިރާއިން ޚާއްސަ ކަންތައްތަކެއް ކުރަން އެމްއެމްޕީއާރްސީން ރާވައިފައިވާއިރު، އެ ކޯޕަރޭޝަނުން ވަނީ ޓޫރިޒަމް މިނިސްޓަރު އިބްރާހިމް ފައިސަލާއި، ފިނޭންސް މިނިސްޓްރީގެ ފަރާތުން ލިބޭ އެއްބާރުލުން ފާހަގަކުރައްވައިފައެވެ.