މިއަދު ވެސް އުތުރާއި މެދުރާއްޖެތެރެއަށް ވިއްސާރަކުރާނެ ކަމަށް ލަފާކުރެވޭ ކަމަށާއި އެހެންނަމަވެސް ކުރިއަށް އޮތް 48 ގަޑިއިރު ތެރޭ މަޑުމަޑުން މޫސުން އަންނާނީ ރަނގަޅުވަމުން ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން މިއަދު ބުނެފިއެވެ.
މުޅި ރާއްޖެއަށް ވެސް އިއްޔެ ވަނީ ވަރަށް ބޮޑަށް ވިއްސާރަކޮށްފައެވެ. މެންދުރުން ފެށިގެން ވެހުނު ވާރޭގައި މާލޭގެ ބޮޑުބައެއް އޮތީ ފެނު އަޑީގައެވެ. މާލޭ މަގުތަކުން އެކަނި ވެސް 30،000 ޓަނުގެ ފެން ވަނީ ހިންދާފައެވެ.
މެޓް އޮފީހުން މިއަދު ބުނީ، ކުރިއަށް އޮތް 48 ގަޑިއިރު ތެރޭ މޫސުން މަޑުމަޑުން ރަނގަޅުވާން ފަށާނެ ކަމަށް ލަފާކުރެވޭ ކަމަށެވެ. އެހާތަނަށް ކަނޑުތައް ވެސް މަޑުވާން ފަށާނެ ކަމަށް މެޓް އޮފީހުން ވަނީ ލަފާކޮށްފައެވެ.
ފާހަގަކޮށްލެވޭ ގޮތުގައި މި އަހަރު ރާއްޖެއަށް އިރުވައި މޫސުން ފެށުނީ މިދިޔަ ބުރާސްފަތި ދުވަހެވެ.
މެޓް އޮފީހުން ބުނީ، މޫސުން ރަނގަޅުވާން ފެށި ނަމަވެސް މިއަދު އިރުއޮއްސުމާ ހަމައަށް އުތުރާއި މެދު ރާއްޖެތެރޭގެ ބައެއް ރަށްތަކަށް ވިއްސާރަކޮށް، ބައެއް ހިސާބުތަކަށް ބޯކޮށް ވާރޭވެހި ގުގުރުން އެކަށިގެންވާ ކަމަށެވެ. އަދި، ވިލާގަނޑުގައި ގަޑިއަކު 35 މޭލަށް ވައިގަދަވެ، ކަނޑުތައް ގަދަވާނެ ކަމަށް ވަނީ އަންދާޒާކޮށްފައެވެ.
އެކަމަކު، ދެކުނުގެ ރަށްތަކަށް އާންމު ގޮތެއްގައި މޫސުން ރަނގަޅުވާނެ ކަމަށް ވަނީ ލަފާކޮށްފައެވެ.
އިއްޔެ މެންދުރު ފަހު ވެހެން ފެށި ވާރޭގައި މުޅި މާލޭގައި ފެންބޮޑުވުމުގެ ސަބަބުން 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ވަނީ ބުނެފައެވެ.
މާލޭގެ އިތުރުން، ވިއްސާރައިގައި އިތުރު އަށް ރަށަކަށް އެކިވަރުގެ ގެއްލުންތައް ވެފައިވެއެވެ. އެ ގޮތުން؛
- ފ. ނިލަންދޫގެ 80 އިންސައްތައިގައި ފެންބޮޑުވި
- ދ. ކުޑަހުވަދޫގެ 10 ވަރަކަށް ގެއަށް ގެއްލުން ލިބުނު
- ދ. މީދޫގެ 10 ވަރަކަށް ގެއަށް ގެއްލުން ލިބުނު
- ފ. މަގޫދޫގެ 9 ގެއަކަށް ގެއްލުން ލިބި އެއް ގެއިން މީހުން ހުސްކުރި
- އދ. މާމިނގިލީގެ ހަތަރު ގެއަކަށް ބޮޑެތި ގެއްލުންތަކެއް ލިބުނު
- ކ. ގުރައިދޫގެ 60 ގެއަކަށް އެކިވަރުގެ ގެއްލުން ލިބުނު
- ފ. ފީއަލީގެ އެއް ގެއިން މީހުން ހުސްކުރި
- ކ. ހިންމަފުށީގެ 60 އިންސައްތަ ގޭގައި ފެންބޮޑުވި
މި ވިއްސާރައިގައި ރ. އިނގުރައިދުއާއި ށ. ނަރުދުއަށް ވެސް އިއްޔެ އުދައަރައި ބޮޑެތި ގެއްލުންތަކެއްވިއެވެ.