އެންމެ ސިނގިރެޓަކުން ވެސް އިންސާނާގެ އުމުރުން 20 މިނެޓް މަދުކޮށްލާ ކަމަށް އިނގިރޭސިވިލާތުގެ ދުންފަތުގެ އިސްތިއުމާލުކުރާ މީހުންގެ މައްޗަށް ބިނާކޮށް ކުރި އާ ދިރާސާއަކުން ދައްކައިފިއެވެ.
އިޖުތިމާއީ އަދި އިގުތިސާދީ ހާލަތާއި އެހެނިހެން ކަންތައްތަކަށް ރިއާޔަތްކުރުމަށް ފަހު ޔުނިވާސިޓީ ކޮލެޖް ލަންޑަންއިން ކުރި އެ ދިރާސާއަކުން ދައްކާ ގޮތުގައި އެއް ސިނގިރެޓު ބުއިމުން ފިރިހެނެއްގެ އުމުރުން 17 މިނެޓު މަދުވާއިރު، އަންހެނެއްގެ އުމުރުން 22 މިނެޓް މަދުވެއެވެ.
"އޭގެ މާނައަކީ ދުވާލަކު 20 ސިނގިރެޓް ހިމެނޭ ޕެކެއް ބޯ މީހެއްނަމަ، އެ މީހާގެ އުމުރުން ހަތް ގަޑިއިރު ގެއްލޭނޭ،" ޔޫސީއެލް އަލްކޮހޯލް އެންޑްޓޮބަކޯ ރިސާޗް ގްރޫޕްގެ މެންބަރު އަދި މި ދިރާސާގެ ކަރުދާހުގެ ލީޑް މެންބަރު ސާރާ ޖެކްސަން ވިދާޅުވިއެވެ.
"އެ މީހުންނަށް ގެއްލޭ ވަގުތަކީ ފުދޭވަރަކަށް ރަނގަޅު ސިއްޚަތެއްގައި ލޯބިވާ މީހުންނާ އެކު ހޭދަކުރެވިދާނެ ވަގުތެއް،"
އިނގިރޭސިވިލާތުގެ ޑިޕާޓްމަންޓް ފޯ ހެލްތު އެންޑް ސޯޝަލް ކެއާއިން އެދިގެން ކުރި އެ ދިރާސާގައި ބޭނުންކޮށްފައިވަނީ މިލިއަން ވިމެން ސްޓަޑީގެ އަންހެނުން މަރުވާ ގޮތުގެ މައުލޫމާތާއި، އިނގިރޭސި ޑޮކްޓަރުންގެ ދިރާސާއިން ފިރިހެނުން މަރުވާ މިންވަރުގެ މައުލޫމާތެވެ. މި ދިރާސާތަކުން ދައްކާ ގޮތުގައި މުޅި އުމުރު ދުވަހު ދުންފަތުގެ އިސްތިއުމާލުކުރި މީހުންގެ އުމުރުން އެވްރެޖްކޮށް ގާތްގަނޑަކަށް 10 އަހަރު ގެއްލިފައިވެއެވެ.
އެމެރިކާގައި ވެސް ދުންފަތުގެ އިސްތިއުމާލުނުކުރާ މީހުންނަށް ވުރެ ދުންފަތުގެ އިސްތިއުމާލުކުރާ މީހުންގެ އުމުރު ގާތްގަޑަކަށް 10 އަހަރުކުރުވާ ކަމަށް އެމެރިކާގެ ސެންޓަ ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)އިން ބުނެއެވެ.
ޖުމުލަކޮށް ބަލާއިރު އިނގިރޭސިވިލާތުން ލިބުނު އާ ޑޭޓާއިން ދައްކާ ގޮތުގައި ދުންފަތުގެ އިސްތިއުމާލުކުރުމުން ލިބޭ ގެއްލުންތައް އަންނަނީ އިތުރުވަމުންނެވެ.
"މި ހުރިހާ ދިރާސާތަކުން ވެސް ދައްކާ ގޮތުގައި ވަރަށް ޒުވާން އުމުރުގައި ދުންފަތުގެ އިސްތިއުމާލުކުރުން ހުއްޓައިލާ މީހުންގެ އުމުރު، ދުވަހަކު ވެސް ދުންފަތުގެ އިސްތިއުމާލުނުކުރާ މީހުންނާ ގާތްގަނޑަކަށް އެއްވަރު. ނަމަވެސް، އުމުރުން ކިތަންމެ ގިނަ ދުވަސްވެފައި ހުއްޓާ ދުންފަތުގެ އިސްތިއުމާލުކުރުން ހުއްޓާލި ނަމަވެސް ދިގު އުމުރެއް ލިބޭނެ. އެހެންވީމާ، ވޭތުވެދިޔަ ދުވަސްތައް ނުލިބުނު ނަމަވެސް މުސްތަގުބަލުގައި ރަނގަޅުވާނެ،" ސާރާ ވިދާޅުވިއެވެ.
"ދުންފަތުގެ އިސްތިއުމާލުކުރުން ހުއްޓާލުމަކީ، ޝައްކެއް ވެސް ނެތް ގޮތުގައި، އަމިއްލަ ސިއްޚަތަށް ކުރެވޭނެ އެންމެ ރަނގަޅު ކަންތައް،"
ކުރިން 1960 ގެ އަހަރުތަކުން ފެށިގެން ދުންފަތުގެ އިސްތިއުމާލުކުރާ ނިސްބަތް ދަށްވަމުން ދިޔަ ނަމަވެސް، އެމެރިކާގައި އެންމެ ގިނައިން މީހުން މަރުވަނީ ސިނގިރެޓް ބުއިމުގެ ސަބަބުންނެވެ. އުމުރުން 40 އަހަރުގެ ކުރިން ދުންފަތުގެ އިސްތިއުމާލުކުރުން ހުއްޓާލުމަކީ ދުންފަތުގެ އިސްތިއުމާލުކުރުމާ ގުޅުންހުރި ބަލިތަކުން މަރުވުމުގެ ފުރުސަތު ގާތްގަނޑަކަށް 90 އިންސައްތައަށް ދަށްކޮށްދޭ ކަމެއް ކަމަށް ސީޑީސީން ބުނެއެވެ.
މިދިޔަ އަހަރު ނޭޗާ ޖާނަލްގައި ޝާއިއުކުރި ދިރާސާއަކުން ދައްކާ ގޮތުގައި ދުންފަތުގެ އިސްތިއުމާލުކުރުމަކީ މީހެއްގެ ދިފާއީ ނިޒާމަށް ކުރު މުއްދަތާއި ދިގު މުއްދަތުގެ އަސަރުތަކެއް ކޮށް، އިންފެކްޝަން، ކެންސަރު ނުވަތަ އޮޓޯއިމިއުން ބަލިތައް ޖެހުމުގެ ނުރައްކާ ބޮޑުވާ ކަމެކެވެ. އަދި، މީހަކު ދުންފަތުގެ އިސްތިއުމާލުކުރި ވަރަކަށް ދިފާއީ ނިޒާމަށް ވެސް ގެއްލުންވާނެ ކަމަށް އެ ދިރާސާއިން ވަނީ ފާހަގަކޮށްފައެވެ.
ދުންފަތުގެ އިސްތިއުމާލުކުރާ މީހުން މަދުކުރުން ނުވަތަ ދުންފަތުގެ އިސްތިއުމާލުކުރުން މަދުކުރުމަށް ނުވަތަ ހުއްޓުވުމަށް ގިނަ ގައުމުތަކުގައި މަސައްކަތްކުރަމުން އަންނައިރު ރާއްޖޭގައި ވެސް އަންނަނީ އެ މަސައްކަތް ކުރަމުންނެވެ. އެގޮތުން، ވޭޕް އެތެރެކުރުމާއި ބޭނުން ކުރުން މަނާކުރުމާއި، ސިނގިރެޓް އިމްޕޯޓު ޑިއުޓީ ބޮޑުކުރުން އަދި ދުންފަތުގެ ބާވަތްތައް އުފެއްދުމަށް ބޭނުންކުރާ ތަކެއްޗާއި އާާލާތްތައް އެތެރެކުރުން ވެސް ވަނީ މަނާކޮށްފައެވެ.