މިހާރު ރާއްޖެއަށް ކުރަމުންދާ ވިއްސާރައިގައި ކ. ގުރައިދޫގައި ފެންބޮޑު، އެ ރަށުގެ ހާލަތު ވަރަށް ގޯސް ކަމަށް އެ ރަށު ކައުންސިލުން ބުނެފިއެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ރިޕޯޓުކުރި ގޮތުގައި ގުރައިދޫގައި ނަރުދަމާ ލީކޭޖެއްގެ ސަބަބުން 60 ގެއަކަށް އަސަރުކޮށްފައިވެއެވެ.
"ސަން" އާ ވާހަކަދައްކަވަމުން ގުރައިދޫ ކައުންސިލްގެ ރައީސް ހުސައިން ޔާމީން މުހައްމަދު ވިދާޅުވީ މިހާރު ކުރަމުންދާ ވިއްސާރައިގައި ގުރައިދޫގެ ހާލަތު ވަރަށް ދަށްވެފައިވާ ކަމަށާއި ރަށު ތެރޭގައި ވަރަށް ބޮޑަށް ފެން ބޮޑުވެފައިވާ ކަމަށެވެ.
ރަށު ތެރޭގެ ހާލަތު ހިއްސާކުރައްވާ ގުރައިދޫ ކައުންސިލްގެ މެންބަރު ފާތިމަތު ޒިރުފާ ވިދާޅުވީ މިއަދު ހަވީރާ ހަމައަށް ވަރަށް ބޮޑަށް އެ ރަށުގައި ފެންބޮޑުވި ކަމަށެވެ. އެހެންކަމުން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން އެ ރަށުގެ ބަނދަރުގައި ދެ ޕަންޕެއްް ބަހައްޓައިގެން ފެން ހިންދުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ކޮންމެވެސް ވަރަކަށް ފެންގަނޑު ހިނދުނު ނަމަވެސް އަދިވެސް ވާރޭ ބޯކޮށް ވެހެމުންދާ ކަމަށް އޭނާ މައުލޫމާތު ދެއްވިއެވެ.
ފުލުހުންނާއި، ކައުންސިލް އަދި ރަށުގެ ކުދި ބޮޑެތި އެންމެން ވެގެން ގޭބީސީތަކުގައި ވެލި ބަސްތާތައް ޖެހުމުގެ މަސައްކަތް މިއަދު މެންދުރުން ފެށިގެން ކުރި ނަމަވެސް ބޯކުރި ވިއްސާރައިގައި ގެތަކަށް ފެން ވަދެފައިވާކަން ޒިރުފާ ފާހަގަކުރެއްވިއެވެ. އަދި ރަށުގެ މަގުތަކުގައި ޖަންކްޝަންތަކުން ނަޖިސް އަރަމުންދާ ކަމަށް ވެސް އޭނާ ވިދާޅުވިއެވެ.
ޒިރުފާ ވިދާޅުވި ގޮތުގައި މިވަގުތު ކައުންސިލްގެ ޓީމުން ގެތަކަށް ލިބިފައިވާ ގެއްލުންތައް ދެނެގަނެ، އެހީތެރިކަން ބޭނުންވާ ގެތައް ދެނެގަތުމުގެ މަސައްކަތް ދަނީ ކުރަމުންނެވެ. އަދި ވަގުތީ ބޯހިޔާވަހިކަން ބޭނުންވާ އާންމުންނަށް އެކަން ފޯރުކޮށްދިނުމަށް ބޭނުންވާނެ އެންމެހާ އިންތިޒާމުތައް ވެސް ކައުންސިލުން ހަމަޖައްސައިދިނުމުގެ މަސައްކަތް ކުރައްވާނެ ކަމަށް އޭނާ ވިދާޅުވިއެވެ. އަދި އެ އިންތިޒާމްތައް ރަށު ސްކޫލުން ހަމަޖައްސައިދެއްވާނެ ކަމަށް ވެސް އޭނާ ވިދާޅުވިއެވެ.
ގުރައިދޫއަކީ މިދިޔަ އަހަރު ވެސް މޫސުން ގޯސްވުމުގެ ސަބަބުން ދެ ފަހަރެއްގެ މަތިން ފެން ބޮޑުވެ، ގެއްލުންތައް ލިބިފައިވާ ރަށެކެވެ. އަދި އެ ރަށުން ގިނަ ބަޔަކަށް ވަގުތީ ބޯހިޔާވަހިކަން ވެސް ފޯރުކޮށްދީފައިވެއެވެ.
މިހާރު ކުރަމުންދާ ވިއްސާރާއިގައި މާލޭގެ އިތުރުން އަތޮޅުތެރޭގެ ވަރަށް ގިނަ ރަށްތަކުގައި ވަނީ ފެންބޮޑުވެފައެވެ.