މިހާރު ރާއްޖެއަށް ކުރަމުން މިއަންނަ ވިއްސާރަ އަލިވާނީ އަންނަ ހޯމަ ދުވަހު ކަމަށް މޫސުމާ ބެހޭ ގައުމީ އިދާރާ، މެޓް އޮފީހުން ބުނެފިއެވެ.
"ސަން"އަށް މައުލޫމާތު ދެމުން މެޓް އޮފީހުން ބުނީ ކުރިއަށް އޮތް ދެ ދުވަހު ރާއްޖެ ސަރަހައްދަށް ގުގުރުމާއެކު ބޯކޮށް ވާރޭވެހި ވައި ގަދަވާނެ ކަމަށާއި ވައި މަޑުވެ އަލިވާނީ އަންނަ ހޯމަ ދުވަހު ކަމަށެވެ.
މޫސުން ގޯސްވުމާ ގުޅިގެން މެޓު އޮފީހުން މެދު ރާއްޖެތެރެއަށް މިއަދު 15:00އިން 19:00އަށް ނެރުނު އޮރެންޖު އެލާޓު މިހާރު ވަނީ މިރޭ 23:00އާ ހަމައަށް ދިގުދަންމާލާފައެވެ.
މެޓުން ވަނީ ރާއްޖޭގެ އެކި ހިސާބުތަކަށް ވިއްސާރަކުރާނެ ކަމަށާއި ބައެއް ރަށްތަކަށް ބޯކޮށް ވާރޭވެހި ގުގުރުން ވެސް އެކަށީގެންވާ ކަމަށް ބުނެފައެވެ.
އިރުއުތުރާއި އިރުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރާއިރު، ގަޑިއަކު 45 މޭލަށް ވައިގަދަވުން އެކަށީގެންވާ ކަމަށް މެޓުން ވަނީ ބުނެފައެވެ.
މިހާރު ރާއްޖެއަށް ކުރަމުން މި ދާ ވިއްސާރައިގައި ކަނޑުތައް ގަދަވާނެ ކަމަށް ބުނެފައިވާއިރު، ރާޅުގެ އުސްމިން ހުންނާނެ ކަމަށް އަންދާޒާކޮށްފައިވަނީ ފަސް ފޫޓާއި އަށް ފޫޓާ ދެމެދުގައެވެ.
އަދި ދިޔަވަަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވާތީ، ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓުން ވަނީ އެދިފައެވެ.
މިހާރު ކުރަމުންދާ ވިއްސާރައިގައި މުޅި މާލެ އޮތީ ފެނު އަޑީގައެވެ. ބައެއް ގެތަކުގެ އިތުރުން ފިހާރަތަކަށް ފެންވަދެ އެކި ވަރުގެ ގެއްލުންތައް ދަނީ ލިބެމުންނެވެ.
މީގެ އިތުުރުން ބައެއް ރަށްތަކުގައި ފެންބޮޑުވެ، ގެއްލުން ލިބުމުގެ ސަބަބުން މީހުންނަށް އެހީ ފޯރުކޮށްދިނުމުގައި ހަރަކާތްތެރިވަމުން އަންނަ ކަމަށް އެމްއެންޑީއެފުން ބުނެފައިވެއެވެ.