އަމިއްލައަށް ސިނގިރޭޓު ހަދަން ބޭނުންކުރާ ތަކެތި އެތެރެކުރުން މަނާކޮށްފައިވާއިރު، އޭގެ ތެރޭގައި ދުންފަތުގެ އިސްތިއުމާލު ކުރުމުން ދުރުހެލިވާން ބޭނުންކުރާ ތަކެތި މަނާނުވާނެ ކަމަށް ސަރުކާރުން ބުނެފިއެވެ.
ސޯޝަލް މީޑިއާގައި މިއަދު ވަނީ، އަމިއްލައަށް ސިނގިރޭޓު ހަދަން ބޭނުންކުރާ ތަކެތި ރާއްޖެއަށް އެތެރެކުރުމަކީ ދުންފަތް ކޮންޓްރޯލް ކުރުމާ ބެހޭ ގާނޫނަށް މިދިޔަ ނޮވެމްބަރު މަހު ގެނައި އިސްލާހުގެ ދަށުން، ދުންފަތް އަދި ދުންފަތުގެ ބާވަތްތައް އުފެއްދުމަކީ މަނާ ކަމެއް ކަމަށް ހެލްތު މިނިސްޓްރީން ބުނެފައިވާ ސިޓީއެއް އާންމުވެފައެވެ.
އެއީ ރާއްޖެއަށް އާދަޔާ ޚިލާފަށް ގިނައިން ދުންފަތް ޕެކެޓާއި، އެ އޮޅަން ބޭނުންކުރާ ކަރުދާސް މި ފަހުން އެތެރެކުރަން ފެށުމުން ކަސްޓަމްސްއިން ހެލްތު މިނިސްޓްރީގައި އެކަމާ ބެހޭގޮތުން ލަފަޔަކަށް އެދުމުން ފޮނުވި ސިޓީއެއް ކަމަށް "ސަން"އަށް މައުލޫމާތު ލިބިފައިވެއެވެ.
އެ ސިޓީގައި ވަނީ، ދުންފަތާއި ދުންފަތުގެ ތަނޑިއާއި ނިކޮޓިން އެއްވެސް މިންވަރަކަށް ހިމެނޭ، ހިފައިގެން ނުވަތަ ބޮއެގެން ނުވަތަ ވަސްދަމައިގެން ނުވަތަ ހަށިގަނޑު ތަނެއްގައި ތަތްކޮށްގެން ނުވަތަ ޖައްސައިގެން ނުވަތަ އުނގުޅައިގެން ވިޔަސް އޭގެ މާއްދާއެއް ނުވަތަ މާއްދާތަކެއް ހަށިގަނޑަށް ވާސިލުވާ ގޮތަށް ތައްޔާރުކޮށްފައިވާ ކޮންމެ އެއްޗަކީ ދުންފަތުގެ ބާއްވަތެއް ކަމަށް، ގާނޫނަށް ގެނައި އިސްލާހުގައިވާ ކަމަށެވެ.
އެހެންވެ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އާލާތެއް އެއްވެސް ފަރާތަކުން އެތެރެކޮށްދި ނަމަ އެތަކެތި ހިފަހައްޓައި ނައްޓާލުމަށް މިނިސްޓްރީން ވަނީ އަންގައިފައެވެ.
އަމިއްލައަށް ހަދާ ސިނގިރޭޓުގައި ބޭނުންކުރާ ތަކެތީގެ ތެރޭގައި ސިނގިރޭޓަށް ޚާއްސަ ދުންފަތާއި އޮޅާ ކަރުދާހާއި ފިލްޓަރު ހިމެނެއެވެ.
އެ ސިޓީ ސޯޝަލް މީޑިއާގައި އާންމުވުމުން ބައެއް މީހުން ވަނީ އޭގެ މާނައަކީ، ދުންފަތުން ދުރުވުމުގެ ފަރުވާގައި ގައިގައި ހިތްޕައިގެން ބޭނުންކުރާ ނިކޮޓިން ޕެޗު ފަދަ ތަކެތިވެސް މަނާވުންތޯ ސުވާލު އުފައްދައިފައެވެ.
އެ ކަންބޮޑުވުންތަކާ ގުޅޭ ގޮތުން "ސަން"އިން ސުވާލުކުރުމުން، ސަރުކާރުން އިސް އޮފިޝަލަކު ވިދާޅުވީ، ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހަށް އަމަލުކުރަން ފެށުމާއެކު، އަމިއްލައަށް ސިނގިރޭޓު ހަދަން ބޭނުންކުރާ ތަކެތި މަނާވެފައިވާ ކަމަށެވެ. ނަމަވެސް މަނާވާ ތަކެތީގެ ތެރޭގައި ދުންފަތުން ދުރުވުމުގެ ފަރުވާގައި ބޭނުންކުރާ ތަކެތި ނުހިމެނޭނެ ކަމަށާއި އެ ބާވަތްތަކަށް ޑިއުޓީ މާފުވުމުގެ އިތުރުން، އާސަންދަ ނިޒާމުގެ ތެރެއިން ލިބޭނެ ކަމަށް އޭނާ ވިދާޅުވިއެވެ.
މިދިޔަ އޮކްޓޯބަރު މަހުގެ 31ގައި ސިނގިރޭޓުގެ އިމްޕޯޓު ޑިއުޓީ ބޮޑުކުރުމާއެކު، ސިނގިރޭޓުގެ އަގު ވަނީ ވަރަށް ބޮޑަށް އުފުލިފައެވެ. އެއާއެކު ސިނގިރޭޓު ވިކޭ މިންވަރު މަދުވެ، ސިނގިރޭޓު ފޮށި ގަތުމުގެ ބަދަލުގައި އަމިއްލައަށް އޮޅައިގެން ސިނގިރޭޓު ބޯން ގިނަ ބަޔަކު ވަނީ ޚިޔާރުކުރަން ފަށައިފައެވެ.
މީގެ އިތުރުން މި ސަރުކާރުގައި ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހުން ވަނީ، ކެފޭތަކާއި ރެސްޓޯރަންޓު ފަދަ ތަންތަނުގެ މަނާ ހިސާބުތަކުގައި ދުންފަތުގެ އިސްތިއުމާލު ކުރާނަމަ، އެތަނެއްގެ ހުއްދަ ބާތިލްކުރުމުގެ ބާރު ވެސް ލިބިދީފައެވެ.
މި ސަރުކާރުގައި ދުންފަތުގެ އިސްތިއުމާލު ކުރުމާ ދެކޮޅަށް ގިނަ ފިޔަވަޅުތަކެއް އަޅަމުން އަންނައިރު، ވޭޕް އެތެރެކުރުމާއި ބޭނުންކުރުން ވެސް ވަނީ މަނާކޮށްފައެވެ.