ކަސްރަތަކީ އިންސާނާގެ ހަށިގަނޑަށް ވަރަށް މުހިއްމު އެއްޗެކެވެ. ކަސްރަތު ކުރާއިރު ބައެއް ކަހަލަ ގަވާއިދުތަކަކީ އެއަށް ބަލައިގެން އުޅެން ވަރަށް މުހިއްމު ކަންތައްތަކެވެ. އެއިން އެއް ކަމަކީ ސްޓްރެޗް ކުރުމެވެ. ނަމަވެސް އޭގެތެރެއިން ވެސް ރަނގަޅު ސްޓްރެޗްތަކެއް ވެސް އެބަހުއްޓެވެ.
ސްޓްރެޗް ކުރުމަކީ ކަސްރަތު ކުރުމާ އެއްވަރަށް މުހިއްމު ކަމެކެވެ. އެގޮތުން ކަސްރަތު ކުރުމުގެ ކުރީން އަދި ކަސްރަތު ކުރުމުގެ ފަހުން ވެސް ސްޓްރެޗް ކުރަން ޖެހޭއިރު އެ ނުކުރާ ނަމަ އޭގެ ސަބަބުން މީހާއަށް ގެއްލުންތަކެއް ވެސް ކުރިމަތިވުން އެކަށީގެންވެއެވެ.
އިންސާނާގެ ހަށިގަނޑުގެ މަސްލްތަކަކީ އެއަށް ކުޑަ ވާމްއަޕެއް ބޭނުންވާ އެއްޗެއްސެވެ. އެހެންވީމާ ސްޓްރެޗް ކުރުމުގެ ސަބަބުން އެ މަސްލްތަކަށް ލޭ ދައުރުވެ "ހޭލައްވާލުމަށް" އެހީތެރިވެއެވެ. ސްޓްރެޗް ކުރުމުގެ ސަބަބުން މީހާ އިތުރަށް ހަރަކާތްތެރިވެ އުޅުމަށް އެހީތެރިކަން ފޯރުކޮށްދޭއެވެ. މިއާއެކު ކަސްރަތު ކުރުމަށް އެންމެ އެކަށީގެންވާ މިންވަރަށް ހަރަކާތްތަކާއި ހަކަތަ ބޭނުން ކުރެވޭނެއެވެ.
އެހެންވީމާ އެންމެ ފައިދާވާނެ އަދި އެންމެ އެކަށީގެންވާ ސްޓްރެޗް ތަކަކީ ކޮބާ ހެއްޔެވެ؟
"ބައެއް މީހުން ޖިމަށް ދާގޮތަށް ގޮސް ހަމަ ވަގުތުން ވޯކްއައުޓް ކުރަން ފަށާނެ. އެކަމު ކަސްރަތު ކުރިން އަދި ފަހުން ކުރާ ސްޓްރެޗް އަކީ ވޯކްއައުޓް އެންމެ އެކަށީގެންވާ ގޮތުގައި ކުރުމަށް ބާރުއަޅާނެ އެއްޗެއް. އެހެންވީމާ މިއީ ނުކޮށް ދޫކޮށްލެވޭނެ ކަމެއް ނޫން،" އެމެރިކާގެ ޖިމް ފްރެންޗައިޒް އެއް ކަމަށްވާ "ވީޖިމް"ގެ ޕާސަނަލް ޓްރެއިނަރު އަދި ޑިރެކްޓެކްޓާ އޮފް ޓްރެއިނިން ވިޓްނީ ހޫލީން ބުނެއެވެ.
އޭނާ ބުނާގޮތުގައި ކަސްރަތު ކުރުމަށް އެންމެ އެކަށީގެންވާ ސްޓްރެޗް ތަކަކީ ޑައިނަމިކް އަދި ސްޓެޓިކް ސްޓްރެޗެވެ. މި ދެ ވައްތަރު އެއްކޮށްލައިގެން ކުރުމަކީ ވަރަށް އެކަށީގެންވާނެ ކަމެއް ކަމަށް އޭނާ ފާހަގަކުރެއެވެ.
ޑައިނަމިކް ސްޓްރެޗް އަކީ މީހާގެ ހުޅުތައް ގެންދެވޭނެ އެއްމެ ދުރަކަށް ގެންގޮސް ގުނަވަންތައް ދަމާލައި މަސްލްތަކަށް ބާރު ކޮށްލުމެވެ. އަދި ސްޓެޓިކް ސްޓްރެޗްގައި އާންމުކޮށް އެއް ހަރަކާތެއްގައި ހުއްޓާލައިގެން ހުންނާނީއެވެ.
އާތުރޮސްކޮޕީ، ސްޕޯޓްސް މެޑިސިން އެންޑް ރިހެބިލިޓޭޝަން ޖާނަލްއިން އާންމުކޮށްފައިވާ ދިރާސާއެއްގައި ބުނާގޮތުގައި ކަސްރަތެއް ފެށުމުގެ ކުރިން އެންމެ ފައިދާކަން ބޮޑުވަނީ ޑައިނަމިކް ސްޓްރެޗް އަކުންނެވެ. މިއީ ހުރިހާ ހުޅުތަކެއްގެ ހިންގުންތައް ހޭލައްވާލައި ކަސްރަތަށް ރެޑީވުމަށް އެހީތެރިކަން ފޯރުކޮށްދޭތީއެވެ. އަދި އެގޮތަށް ސްޓެޓިކް އެންމެ އެކަށީގެންވަނީ ކަސްރަތަށް ފަހުގައެވެ. އެއީ އޭގެ ސަބަބުން ކަސްރަތު ނިންމާލުމަށްފަހު އެއްވެސް ކަހަލަ ތަދެއްވާނަމަ އެއިން އެހީތެރިކަން ފޯރުކޮށްދޭނެތީއެވެ.