ވަން އެންޑް އޮންލީ ރީތިރަށް ރިސޯޓުގެ ވޯޓާވިލާއަކަށް ހޮނު އެޅުމުގެ ސަބަބުން އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފުއިން ވަނީ ވަންއެންޑް އޮންލީ ރީތިރަށް ރިސޯޓުގައި އަލިފާނުގެ ހާދިސާއެއް ހިނގައިގެން އެމްއެންޑީއެފްގެ ފަޔާ އެންޑް ރެސްކިއު ސާވިސްއިން ރޭ ހަރަކާތްތެރިވެފައި ވާކަމަށް ބުނެފައެވެ.
އެމްއެންޑީއެފްއިން ބުނީ، އަލިފާން ރޯވީ އެ ރިސޯޓްގެ ވޯޓާވިލާއެއްގެ ފުރާޅުގައި ކަމަށާއި ހާދިސާ ހިނގުމުން ރިސޯޓްގެ މުވައްޒަފުން އަލިފާން ކޮންޓްރޯލްކޮށް ނިއްވާލާފައި ވާކަމަށެވެ.
އެ ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަމަށާއި ނަމަވެސް ވޯޓާވިލާގެ ފުރާޅަށާއި ސީލިންއަށް އެކިވަރުގެ ގެއްލުންތައް ލިބިފައި ވާކަމަށް އެމްއެންޑީއެފްއިން ވަނީ ބުނެފައެވެ.
"ސަން"އަށް މައުލޫމާތު ދެމުން ފުލުހުންގެ މީޑިއާ އޮފިޝަލަކު ވިދާޅުވީ އަލިފާނުގެ ހާދިސާއެއް ފުލުހުންނަށް ރިޕޯޓްކޮށްފައި ނުވާކަމަށާއި ނަމަވެސް މައުލޫމާތު ލިބޭ ގޮތުގައި ހާދިސާ ހިނގަން މެދުވެރިވީ ހޮނު އަޅައިގެންކަމަށެވެ.
ވަން އެންޑް އޮންލީ ރީތި ރަށް ރިސޯޓުގެ ވޯޓާވިލާ 205ގައި ހޮނުއަޅައި ބޮޑެތި ގެއްލުންތަކެއް ލިބިފައި ވާކަމަށް ބުނެ ސޯޝަލް މީޑިއާގައި ވެސް ފޮޓޯތަކެއް ދަނީ ދައުރުވަމުންނެވެ.