ސޫރިއާގެ ދާޚިލީ ހަނގުރާމައިގެ ސަބަބުން އެ ގައުމުގެ ސްކޫލަށް ދާ އުމުރުގެ ކުދިންގެ ގާތްގަނޑަކަށް ދެބައިކުޅަ އެއްބައި ކުދިންނަށް ތައުލީމު ހޯދުމުގެ ފުރުސަތު ގެއްލިފައިވާ ކަމަށް އިނިގިރޭސިވިލާތުގެ އެންޖީއޯއެއް ކަމަށްވާ ސޭވް ދަ ޗިލްޑްރެންއިން ހާމަކޮށްފިއެވެ.
އަދި އެ ކަމަށް އަވަސް ހައްލެއް ހޯދުމަށް ފިޔަވަޅު އެޅުމަށް އެ ޖަމިއްޔާއިން ވަނީ ގޮވާލާފައެވެ.
އޭގެ އިތުރުން ސޫރިއާގެ ގިނަ ކުދިންނަށް ކާބޯތަކެއްޗާއި އެ ނޫންވެސް ޒަރޫރީ ބޭނުންތައް ފުއްދާނެ އިންސާނީ އެހީ ބޭނުންވާ ކަމަށްވެސް އެ ޖަމިއްޔާއިން ބުނެފައިވެއެވެ. ދެބައިކުޅަ އެއްބަޔަށްވުރެ ގިނަ ކުދިންނަށް ހަނގުރާމައިގެ ބިރުވެރިކަމުން އަރައިގަތުމަށް ނަފްސާނީ އެހީތެރިކަންވެސް ބޭނުންވާ ކަމަށް ސޭވް ދަ ޗިލްޑްރެންއިން ބުނެއެވެ.
"ގާތްގަނޑަކަށް 3.7 މިލިއަން ކުދިން ސްކޫލަށް ނުދާއިރު، އެ ކުދިން ސްކޫލަށް ގެންދިއުމަށް އަވަސް ފިޔަވަޅުތަކެއް އަޅަން ޖެހޭ." ސޭވް ދަ ޗިލްޑްރެންގެ ޑިރެކްޓާ ރާޝާ މުހުރޭޒް ވިދާޅުވިއެވެ.
ގަރުނަކަށްވުރެ ގިނަ ދުވަހު ހިނގި ހަމަނުޖެހުންތައް ސޫރިއާގެ ރައްޔިތުން ތަހައްމަލުކޮށްފައިވާއިރު، އެ ގައުމުގެ އިދިކޮޅު ފަރާތްތަކުން ވަނީ ޑިސެމްބަރު މަހުގެ އަށް ވަނަ ދުވަހު ރައީސް ބައްޝާރުލް އަސަދުގެ ޒަމާންވީ ވެރިކަން ވައްޓާލާފައެވެ. އެއާއެކު އެ ގައުމުގެ ހާލަތު އިތުރަށް ގޯސްވެ ގާތްގަޑަކަށް 700،000 އަށް ވުރެ ގިނަ މީހުންގެ ގެދޮރު ގެއްލިފައިވާ ކަމަށް އދ ން ވަނީ ހާމަކޮށްފައެވެ.
"ބައެއް ސްކޫލްތައް އަންނަނީ ގެދޮރު ގެއްލިފައިވާ މީހުންނަށް ވަގުތީ ހިޔާގެ ގޮތުގައި ބޭނުން ކުރަމުން." މުހުރޭޒް ވިދާޅުވިއެވެ.
ސަރުކާރާ ދެކޮޅު އަޑުއުފުލާ މީހުންނަށް ބައްޝާރު އެޅުއްވި ފިޔަވަޅުތަކުގެ ސަބަބުން 2011 ވަނަ އަހަރު ފެށި ދާޚިލީ ހަނގުރާމައާހެދި ސޫރިއާގެ އިގްތިސާދަށްވެސް އަސަރުކޮށް ގިނަ ކުޑަކުދިންގެ ހާލަތު އިތުރަށް ގޯސްވިއެވެ.
"ގާތްގަނޑަކަށް 7.5 މިލިއަން ކުޑަކުދިންނަށް އަވަސް އިންސާނީ އެހީތެރިކަން ބޭނުންވޭ." މުހުރޭޒް ވިދާޅުވިއެވެ.
"ކުޑަކުދިންނަށް ތައުލީމު ލިބުމާއި، ސިއްޚީ ޚިދުމަތް ހޯދުމާއި، ބޯހިޔާވަހިކަން ލިބުން ފަދަ އަސާސީ ހައްގުތަކުން މަހުރޫމްވި،"
ސޫރިއާގެ ހަނގުރާމަ 2011 ވަނަ އަހަރުން ފެށިގެން ހަލުވިކަމާއެކު ބޮޑު މަދަނީ ހަމަނުޖެހުމަކަށް ބަދަލުވެ، 500،000 އަށް ވުރެ ގިނަ މީހުން މަރުވެ، އެތައް މިލިއަން ބައެއްގެ ގެދޮރު ގެއްލިގެންދިޔައެވެ.
ވޯލްޑް ބޭންކުން ބުނާ ގޮތުގައި ސޫރިއާގެ ކޮންމެ ހަތަރު މީހަކުން އެކަކަށް ވުރެ ގިނަ މީހުން މިހާރު އުޅެނީ އިންތިހާއަށް ފަގީރު ހާލަތުގައެވެ.
ހަނގުރާމައިގެ ދުވަސްވަރު ބޮޑުވި ގިނަ ކުދިންނަށް އަނިޔާވެރިކަމުގެ ސަބަބުން ގެއްލުން ލިބިފައިވާ ކަމަށްވެސް މުހުރޭޒް ވިދާޅުވިއެވެ.
"މިކަމުގެ ސަބަބުން ވަރަށް ބޮޑު ޓްރައުމަޓިކް އަސަރެއް އެ ކުދިންނަށް ކުރި، އެކި ސަބަބުތަކާ ހުރެ، ގެއްލުންތަކުގެ ސަބަބުންނާއި މައިންބަފައިން މަރުވުން، އެއްބަނޑު އެއްބަފާ މީހުންނާއި ރައްޓެހި ގެއްލުން." މުހުރޭޒް އިތުރަށް ވިދާޅުވިއެވެ. އެގޮތުން ސޫރިއާގެ ގާތްގަޑަކަށް 6.4 މިލިއަން ކުދިންނަކީ ނަފްސާނީ އެހީ ބޭނުންވާ ކުދިން ކަމަށް ސޭވް ދަ ޗިލްޑްރެން އިން ހާމަކޮށްފައިވެއެވެ.
ސޫރިއާގައި މިހާރުއޮތް ވަގުތީ ސަރުކާރުގެ ވެރިޔާ އަޙުމަދު އަލް ޝާރާ ވިދާޅުވީ ސޫރިއާއާ ދެކޮޅަށް ގައުމުތަކުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެ ގައުމުންގެ ރައްޔިތުންގެ ބޭނުންތައް ފުއްދައިދިނުން ވަރަށް ބޮޑަށް ދަތިވެފައިވާ ކަމަށެވެ.
ހަނގުރާމައިގެ ކުރީކޮޅުއްސުރެ އެމެރިކާ އާއި ޔޫރަޕިއަން ޔޫނިއަންގެ ގައުމުތަކުން ވެސް އަސަދުގެ ސަރުކާރަށް އަމާޒުކޮށްގެން ހަރުކަށި ދަތިކުރުމުގެ ފިޔަވަޅުތައް ވަނީ އަޅާފައެވެ.