ސޫރިޔާގެ ރައީސް އަލް-ޝަރާއު އާއި ރަޝިއާގެ ރައީސް ޕޫޓިން މޮސްކޯގައި ބައްދަލުކުރައްވައިފިއެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި ސޫރިޔާގެ ރައީސް އަޙްމަދު އަލް-ޝަރާއު، ރަޝިޔާގެ ރައީސް ވުލަޑީމިއަރ ޕޫޓިންއާ ބައްދަލުކުރެއްވުމަށް މޮސްކޯއަށް ވަޑައިގެންފައިވާއިރު، މި ބައްދަލުވުމުގެ މައިގަނޑު ބޭނުމަކީ 2024 ވަނަ އަހަރު ބައްޝާރުލް އަސަދުގެ ވެރިކަން ވައްޓާލުމަށްފަހު، ސޫރިޔާގައި ރަޝިޔާގެ އަސްކަރީ ބާރުވެރިކަން ދެމެހެއްޓުމާ ގުޅޭގޮތުން މަޝްވަރާކުރުމެވެ.
ކްރެމްލިންގެ ތަރުޖަމާނު ޑިމިޓްރީ ޕެސްކޯވް ހާމަކުރެއްވި ގޮތުގައި، ބުދަ ދުވަހު ބޭއްވުމަށް ހަމަޖެހިފައިވާ މި ބައްދަލުވުމުގައި މައިގަނޑު ގޮތެއްގައި މަޝްވަރާކުރާނީ ސޫރިޔާގެ ހުމައިމީމް އެއާބޭސްއާއި ތަރްތޫސް ނޭވަލް ބޭސްގައި ތިބި ރަޝިޔާ ސިފައިންގެ މުސްތަޤުބަލާ ގުޅޭގޮތުންނެވެ. މި ދެ މަރުކަޒަކީ މިހާރު ކުރީގެ ސޯވިއެޓް ޔޫނިއަންގެ ބޭރުން ރަޝިޔާއަށް އޮތް ހަމައެކަނި އަސްކަރީ މަރުކަޒުތަކެވެ.
މި ހަފުތާގެ ކުރީކޮޅު ރަޝިޔާއިން ވަނީ ސޫރިޔާގެ އިރުއުތުރުގައި ކުރުދީންގެ ބާރުގެ ދަށުގައިވާ ގާމިޝްލީ އެއާޕޯޓުން އެޤައުމުގެ ސިފައިން ބާލާފައެވެ.
ދެހާސް ސައުވީސް ވަނަ އަހަރުގެ ޑިސެމްބަރު މަހު އަލް-ޝަރާއުގެ ބާރުތަކުން އަސަދުގެ ވެރިކަން ނިމުމަކަށް ގެނައި ފަހުން، ރަޝިޔާއިން ދަނީ އައު ސަރުކާރާއެކު ގުޅުން ބަދަހިކުރަން މަސައްކަތް ކުރަމުންނެވެ. މިއީ މެދުއިރުމަތީގައި ރަޝިޔާއަށް އޮތް ނުފޫޒު ދެމެހެއްޓުމަށްޓަކައި އެ ޤައުމުން ކުރާ މަސައްކަތެކެވެ.
ރަޝިޔާއިން މީގެ ކުރިން އަސަދަށް އަސްކަރީ ގޮތުން ބޮޑެތި އެހީތަކެއް ދީފައިވީ ނަމަވެސް، އަލް-ޝަރާއުގެ ސަރުކާރުން މިހާތަނަށް ރަޝިޔާއާއެކު ގެންގުޅެނީ އަމަލީ ގޮތުން ފައިދާހުރި (ޕްރެގްމެޓިކް) ސިޔާސަތެކެވެ.
އަލް-ޝަރާއު މިދިޔަ އޮކްޓޯބަރު މަހު މޮސްކޯއަށް ކުރެއްވި ފުރަތަމަ ދަތުރުފުޅުގައި ސުލްހަވެރި ރޫހެއްގައި ވާހަކަދެއްކެވި ނަމަވެސް، ރަޝިޔާއިން ބައްޝާރުލް އަސަދަށް ހިމާޔަތް ދީފައިވާ މައްސަލައަކީ ދެޤައުމުގެ ދެމެދުގައި އޮތް ބޮޑު ކަންބޮޑުވުމެކެވެ. އަސަދު ސޫރިޔާއާ ހަވާލުކުރުމަށް އަލް-ޝަރާއު ތަކުރާރުކޮށް އެދިވަޑައިގަންނަވަމުން ދިޔަ ނަމަވެސް، ރަޝިޔާއިން އެކަމަށް އެއްބަސްވާނެތޯ ޕެސްކޯވް ސީދާ ޖަވާބެއް ދެއްވާފައެއް ނުވެއެވެ.
ސޫރިޔާގައި ރަޝިޔާގެ ފައިތިލަ ސާބިތުކުރުމަށް ޕޫޓިން މިހާ ބޮޑަށް ބޭނުންފުޅުވަނީ، ރަޝިޔާގެ އަނެއް ބައިވެރިޔާ ކަމަށްވާ ވެނެޒުއޭލާގެ ރައީސް ނިކޮލަސް މަޑޫރޯ، އެމެރިކާގެ ޚާއްސަ ސިފައިން މި މަހު ހައްޔަރުކޮށްގެން ގެންގޮސްފައިވާ ދަނޑިވަޅެއްގައެވެ.
މީގެ އިތުރުން، އެމެރިކާއިން ދަނީ އަލް-ޝަރާއުގެ ސަރުކާރާއެކު އޮންނަ ގުޅުން ދުވަހެއް ދުވަހަކަށް ބަދަހިކުރަމުންނެވެ.
ސޫރިޔާގެ އަސްކަރިއްޔާއާއި ކުރުދީންގެ ބާރުތަކާ ދެމެދު މިހާރު އޮތް ނާޒުކު ހަނގުރާމަ ހުއްޓާލުމުގެ އެއްބަސްވުން އަދިވެސް ދަނީ ކުރިއަށެވެ.