މަޝްހޫރު ޑައިރެކްޓަރު އަދި އެކްޓަރު ރަވީ ފާރޫގު، "ހިންތާ"ގެ ނަމުގައި ތަފާތު ވެބް ޝޯއެއް ގެނެސްދިނުމަށް ތައްޔާރުވެއްޖެއެވެ.
މަގުބޫލު ހިޓް ޝޯ "ގަރީނާ" އަށް ފަހު މިހާރު ޓީމުން މަސައްކަތް ކުރަމުން އަންނަނީ އިތުރު ޑްރާމާ ޝޯއެއް ނެރުމަށެވެ. ހިންތާ އަކީ ވެސް އިޖުތިމާއީ މައްސަލަތަކަކަށް އަލި އަޅުވާލާނެ ޝޯއަކަށް ވާއިރު މި ޝޯގައި ކިޔައިދޭނީ އަންހެނެއްގެ ވާހަކައެވެ.
ރަވީ އަކީ އޭނާގެ ޑައިރެކްޓިން ހުނަރަށް މީހުން ސުވާލު ކުރާނެ ތަރިއެއް ނޫނެވެ. އެގޮތުން ރަވީ ޑައިރެކްޓު ކުރި ފިލްމު "ވިޝްކާ" އަކީ އަދިވެސް ގިނަ ބަޔަކު ވާހަކަ ދައްކާ ފިލްމެކެވެ.
އެގޮތުން އަލަށް ނެރޭ ވެބް ޝޯގެ ފަހަތުގައި ހިމެނެނީ ގަރީނާގެ ސްކްރީން ރައިޓަރު އަހުމަދު ޒަރީރެވެ. މި ޝޯ ތައްޔާރު ކުރާނީ ޒަރީރުގެ "އެއްކާފު" ޕްރޮޑަކްޝަނުންނެވެ.
View this post on Instagram
ހިންތާގެ ފުރަތަމަ ޓީޒަރު ވަނީ ދާދިފަހުން އާންމުކޮށްފައެވެ. މި ޓީޒަރުން ފެނިގެންދަނީ އަންހެނެއްގެ އަތުން ބާރުތަކެއް އަތުލަން އުޅޭތީ އެކަން ހުއްޓުވުމަށް މަސައްކަތް ކުރާނެކަން ދައްކާލާ ވާހަކަތަކެއް ދައްކާ މަންޒަރުތަކެކެވެ.
މި ޝޯގެ ލީޑު ރޯލުން ފެނިގެންދާނީ ދިވެހި ޑީޖޭއެއް ކަމަށްވާ ރާއީ އެވެ. އަދި ސަޕޯޓިން ރޯލުން ފެނިގެންދާނީ ސާމީ ހުސައިން އެވެ.
މީޑީއާނެޓްގެ އެމްއެސްކްލަބަށް އަންނަ މި ޝޯއާ ގުޅޭ އިތުރު މައުލޫމާތުތަކެއް ހާމަކޮށްފައެއް ނުވެއެވެ. އެގޮތުން މި ޝޯގައި ހިމެނޭނެ އެޕިސޯޑްތަކުގެ އަދަދާއި ކާސްޓު އަދި އިތުރުން ރިލީޒްކުރާ ތާރީހު ވަރަށް އަވަހަށް ހާމަކުރާނެ ކަމަށް މައުލޫމާތު ލިބެއެވެ.
މިއީ ގަރީނާ އާ އަޅާ ބަލާއިރު ތަފާތު ވާހަކައަކަށް ވާނެއެވެ. ގަރީނާ އަކީ ހަގީގީ ހާދިސާތަކަށް ބިނާކޮށް ތައްޔާރު ކޮށްފައިވާ ޝޯއެކެވެ. އެގޮތުން ގަރީނާގައި ކިޔައިދެނީ ފަސް އަހަރުގެ ކުއްޖެއްގެ މަރާ ގުޅިގެން ނޫސްވެރިޔަކު އެ މަރުގެ ހަގީގަތް ހޯދުމަށް މަސައްކަތް ކުރާ ގޮތުގެ ވާހަކައެވެ.