މަޝްހޫރު ޑައިރެކްޓަރު އަދި އެކްޓަރު ރަވީ ފާރޫގުގެ އާ ޝޯ "ހިންތާ" އަންނަ ހަފުތާގެ ބުރާސްފަތި ދުވަހު ދައްކަން ފަށަން ތައްޔާރުވެއްޖެއެވެ.
މަގުބޫލު ހިޓް ޝޯ "ގަރީނާ"އަށް ފަހު މިހާރު ޓީމުން މަސައްކަތް ކުރަމުން އަންނަނީ އިތުރު ޑްރާމާ ޝޯއެއް ނެރުމަށެވެ. ހިންތާއަކީ ވެސް އިޖުތިމާއީ މައްސަލަތަކަކަށް އަލިއަޅުވާލާނެ ޝޯއަކަށްވާއިރު މި ޝޯގައި ކިޔައިދޭނީ އަންހެނެއްގެ ވާހަކައެވެ.
ރަވީއަކީ އޭނާގެ ޑައިރެކްޓިން ހުނަރަށް މީހުން ސުވާލުކުރާނެ ތަރިއެއް ނޫނެވެ. އެގޮތުން، ރަވީ ޑައިރެކްޓު ކުރި ފިލްމު "ވިޝްކާ"އަކީ އަދިވެސް ގިނަ ބަޔަކު ވާހަކަދައްކާ ފިލްމެކެވެ.
އެގޮތުން، އަލަށް ނެރޭ ވެބް ޝޯގެ ފަހަތުގައި ހިމެނެނީ ގަރީނާގެ ސްކްރީން ރައިޓަރު އަހުމަދު ޒަރީރެވެ. މި ޝޯ ތައްޔާރުކުރާނީ ޒަރީރުގެ "އެއްކާފު" ޕްރޮޑަކްޝަނުންނެވެ.
ހިންތާގެ ޕްރޮމޯޝަނަލް ޕޯސްޓަރު އަދި ޓީޒަރުތައް އާންމުކޮށްފައިވާއިރު މިހާރު ރެޑީ ވަނީ ޕްރިމިއާ ކުރުމަށެވެ. މީޑީއާނެޓްގެ އެމްއެސްކްލަބަށް އަންނަ މި ޝޯގެ އެޕިސޯޑު ކޮންމެ ބުރާސްފަތި ދުވަހުގެ ރޭގައި ދައްކާ ގޮތަށް ވަނީ ހަމަޖެހިފައެވެ.
މި ޝޯގެ ލީޑު ރޯލުން ފެންނާނީ ދިވެހި ޑީޖޭއެއް ކަމަށްވާ ރާއީއެވެ. ސަޕޯޓިން ރޯލުން ފެނިގެންދާނީ ސާމީ ހުސައިނެވެ.
ހިންތާއަކީ ގަރީނާ އާ އަޅާ ބަލާއިރު ތަފާތު ވާހަކައަކަށް ވާނެއެވެ. ގަރީނާއަކީ ހަގީގީ ހާދިސާތަކަށް ބިނާކޮށް ތައްޔާރުކޮށްފައިވާ ޝޯއެކެވެ. އެގޮތުން، ގަރީނާގައި ކިޔައިދެނީ ފަސް އަހަރުގެ ކުއްޖެއްގެ މަރާ ގުޅިގެން ނޫސްވެރިޔަކު އެ މަރުގެ ހަގީގަތް ހޯދުމަށް މަސައްކަތް ކުރާ ގޮތުގެ ވާހަކައެވެ.