އިސްލާމީ ކަންތައްތަކާ ބެހޭ ވުޒާރާގެ އަންނަ އަހަރުގެ އެކްޝަން ޕްލޭނާއި، އެކްޓިވިޓީ ކަލަންޑަރާއި، ރިސާލަތު ޕްރޮގްރާމް 2025، އަދި ނަމާދު މަތިވެރިކުރުމުގެ ޕްރޮގްރާމް މިއަދު ލޯންޗުކޮށްފިއެވެ.
މި ރަސްމިއްޔާތު ޝަރަފުވެރިކޮށްދެއްވައި އިސްލާމިކް މިނިސްޓަރް ޑރ. މުޙައްމަދު ޝަޙީމް ޢަލީ ސަޢީދު ވިދާޅުވީ، ރައީސް ޑރ. މުޙައްމަދު މުޢިއްޒުގެ މެނިފެސްޓޯގައިވާ އިސްލާމީ ނޫރު ދިވެހި ރާއްޖެއަށް ފެތުރުމުގެ މުހިންމު މަސްއޫލިއްޔަތު މި ކުރިއަށް ގެންދަވަނީ ވަރަށް ވެސް މަތިވެރި އަޒުމާއި އިޚްލާސްތެރިކަމާ އެކު ދިވެހި އުންމަތުގެ ތެރޭގައި އިސްލާމްދީނުގެ ހިދާޔަތުގެ ނޫރު ފެތުރުމަށްޓަކައި ކަމަށެވެ.
މިއަދު އިފުތިތާހުކުރި ނަމާދު މަތިވެރިކުރުމުގެ ޕްރޮގްރާމާ ގުޅޭ ގޮތުން މިނިސްޓަރު ވިދާޅުވީ، މި މަޝްރޫޢަކީ ނަމާދާއި ނަމާދުގެ މުހިންމުކަން މުޅި މުޖުތަމަޢަށް ހަނދާންކޮށްދިނުމުގެ ގޮތުން ކުރިއަށް ގެންދެވޭ މަޝްރޫޢެއް ކަމަށެވެ. އަދި، 2025 ވަނަ އަހަރުގެ ރިސާލަތު ޕްރޮގްރާމް ޚާއްސަކޮށްފައިވަނީ އިސްލާމީ އަޚުލާޤަށް ކަމަށް ވެސް ވަނީ ވިދާޅުވެފައެވެ.
އިސްލާމިކް މިނިސްޓްރީން އާ އަހަރުގެ ޕްރޮގްރާމްތައް ލޯންޗުކުރުމުގެ ރަސްމިއްޔާތުގެ ތެރެއިން --- ފޮޓޯ/ އިސްލާމިކް މިނިސްޓްރީ
މި އަހަރު، ރައީސްގެ މެނިފެސްޓޯގައިވާ ގޮތުގެ މަތިން އިސްލާމީ ކަންތައްތަކާ ބެހޭ ވުޒާރާއާ މަތިކުރެވިފައިވާ ވަރަށް ގިނަ ކަންކަން ހާސިލުކުރެވިފައިވާ ކަމަށާއި އެގޮތުން މިސްކިތްތަކާ ބެހޭ ޤައުމީ މަޖިލީސް އުފެއްދުމާއި، ޒަކާތަށް ޚާއްސަ އިދާރާއެއް ގާއިމުކުރުން ފަދަ ކަންކަން ހިމެނޭކަމަށް ޝަހީމް ވިދާޅުވިއެވެ.
އޭނާ ވިދާޅުވީ، މި އަހަރަކީ ހުރިހާ ގޮތަކުން ވެސް ކާމިޔާބު އަހަރެއް ކަމަށެވެ. މި އަހަރަކީ ތާރީޚުގައި ޒަކާތު ފަންޑަށް އެންމެ ގިނަ އަދަދަކަށް ފައިސާ ލިބުނު އަހަރަށްވާއިރު ގިނަ އަދަދަކަށް ގުރުއާން ހިތުދަސްކުރި ޙާފިޒުން ނެރެވުނު އަހަރެއްކަމާއި އަދި ތާރީޚުގައި އިސްލާމީ ގޮތުން ފާހަގަކުރެވޭ މުހިންމު މަސައްކަތަކެއް ކުރެވުނު އަހަރެއް ކަމަށް މިނިސްޓަރު ވިދާޅުވިއެވެ.
އިސްލާމިކް މިނިސްޓްރީން އާ އަހަރުގެ ޕްރޮގްރާމްތައް ލޯންޗުކުރުމުގެ ރަސްމިއްޔާތުގެ ތެރެއިން --- ފޮޓޯ/ އިސްލާމިކް މިނިސްޓްރީ
އެހެންކަމުން ހިތްހަމަޖެހޭ މަސައްކަތްތަކެއް ކުރެވިފައިވާތީ މިނިސްޓްރީގެ މުވައްޒަފުންނަށް ޝަހީމް ވަނީ ޝުކުރު އަދާކުރައްވާފައެވެ.
އިސްލާމީ ކަންތައްތަކާ ބެހޭ ވުޒާރާއިން ކުރީ ރާއްޖޭގެ އިސްލާމްދީނުގެ ކަންކަން ހަރުދަނާކޮށް އިސްލާމީ އަޤީދާ ފަތުރައި، އިސްލާމްދީނުގެ މައްޗަށް ދިވެހި އުންމަތް އާރާސްތުކުރުން ކަމަށާއި މިކަންކުރުމުގައި ދިވެހި ރައްޔިތުންނާއި ރާއްޖޭގެ މީޑިއާއިން ކުރެއްވި އަދި ކުރައްވަމުންދާ މަސައްކަތް ފާހަގަކުރައްވައި އޭނާ ވަނީ ޝުކުރު އަދާކުރައްވާފައެވެ.
ކުރިއަށް އޮތް އަހަރު ކުރަން ނިންމާފައިވާ ކަންތައްތަކުގެ ތެރެއިން ވަގުފް ބިލްޑިންތައް އާރާސްތުކުރެވި ޒަކާތު ހައުސްގެ ބިލްޑިން އެޅި ވަރަށް އާ ކަންތައްތަކެއްގެ ތެރެއަށް އިސްލާމީ ވުޒާރާ ވަދެގެންދާނެ ކަމަށް ވެސް މިނިސްޓަރު ވިދާޅުވިއެވެ. މި މަސައްކަތްތައް މި ކުރެވެނީ އެކުވެރިކަމާ އެކު ރާއްޖޭގެ އިލްމުވެރިންނާއި އިސްލާމީ ޖަމިއްޔާތަކާއި ރާއްޖޭގެ އެކި ކަންކޮޅުތަކުގައި ތިއްބެވި އިމާމުންނާއި ހުރިހާ ކައުންސިލްތަކުން ގުޅިގެން ކުރެވުނު މަސައްކަތްތައް ކަމަށްވާތީ އެ ފަރާތްތަކަށް ވެސް ޝުކުރު އަދާކުރެއްވިއެވެ.
މި ރަސްމިއްޔާތުގައި ރިސާލަތު ވީޑިއޯ ޗެލެންޖުގައި ބައިވެރިވި ފަރާތްތަކުގެ ތެރެއިން ބައިވެރިވި 281 ބައިވެރިންގެ ތެރެއިން ދިވެހި އަދި އިނގިރޭސި ކެޓަގަރީން ވަނަވަނައަށް ދިޔަ ބައިވެރިން އިއުލާންކޮށް ވަނީ އިނާމު ދީފައެވެ.
ރައީސް މުޢިއްޒުގެ ސިޔާސަތުތަކުގެ ތެރެއިން، އިސްލާމީ ނޫރު ފަތުރާ، ދީނަށް ލޯބިކުރާ މުޖުތުމަޢެއް އުފެއްދުމުގެ މަޤުސަދުގައި އިސްލާމީ ކަންތައްތަކާ ބެހޭ ވުޒާރާއިން ފަށާފައިވާ ރިސާލަތު ޕްރޮގުރާމަކީ އިސްލާމީ ކަންތައްތަކާ ބެހޭ ވުޒާރާއިން އެންމެ އިސްކަމެއް ދެއްވައިގެން މި އަހަރުގެ ތެރޭގައި ކުރިއަށް ގެންދެވުނު އެންމެ ބޮޑު އެއް ޕްރޮގްރާމެވެ.
މި ޕްރޮގްރާމްގެ މަޤުސަދަކީ ދިވެހި ރައްޔިތުންގެ ހިތްތަކުގައި އިސްލާމްކަމާއި އީމާންކަމުގެ ރުކުންތައް ހަރުދަނާކޮށް ޢަޤީދާ ވަރުގަދަކުރުމާ އެކު އިސްލާމްދީނުގެ މައިގަނޑު ރުކުންތަކަށް އަހުލުވެރިވެފައިވާ ޖީލެއް ބިނާކުރުމާއި، ދީނަށް ލޯބިކުރާ މުޖުތަމަޢެއް ބިނާކޮށް، އިސްލާމްދީނުގައި ހުރި މުހިންމު ކަންކަމަށް ދިވެހި ރައްޔިތުންގެ ހޭލުންތެރިކަން އިތުރުކުރުވުމެވެ.