އިނގިރޭސި ޕްރިމިއާ ލީގުގައި ނިއުކާސްލް ޔުނައިޓެޑު އަތުން ބަލިވެ، މެންޗެސްޓާ ޔުނައިޓެޑަށް އިތުރު ހާސްކަމާ ކުރިމަތިލާން ޖެހިއްޖެއެވެ.
ޔުނައިޓެޑްގެ ދަނޑުގައި ކުޅުނު މި މެޗު ނިއުކާސްލުން ކާމިޔާބުކޮށްފައިވަނީ 2-0 އިންނެވެ.
މިއީ 1972 ވަނަ އަހަރަށް ފަހު ޔުނައިޓެޑްގެ ދަނޑު، އޯލްޑް ޓްރެފަޑްގައި ކުޅޭ ނިއުކާސްލަށް ޔުނައިޓެޑްގެ މައްޗަށް ކުރި ހޯދުނު ދެވަނަ ފަހަރެވެ. މި ނާކާމިޔާބީއާ އެކު 45 އަހަރުގެ ތެރޭގައި ފުރަތަމަ ފަހަރަށް ޔުނައިޓެޑް މިވަނީ އަމިއްލަ ދަނޑުގައި ޖެހިޖެހިގެން ތިން ފަހަރު ބަލިވެފައެވެ.
މެޗުގެ ފުރަތަމަ 20 މިނެޓްގެ ތެރޭގައި ނިއުކަސްލުން ވަނީ މެޗުގެ ލީޑު ނަގައި، އެ ލީޑު ދަމަހައްޓާފައެވެ. މެޗުގައި ނިއުކާސްލުން ކާމިޔާބުކުރި ފުރަތަމަ ލަނޑު މެޗުގެ ހަތަރުވަނަ މިނެޓުގައި ކާމިޔާބުކޮށްދިނީ އެލެގްޒެންޑާ އިސާކެވެ. މިއީ މި ފަހަރު ލީގުގައި އޭނާ ކާމިޔާބުކުރި 12 ވަނަ ލަނޑެވެ. ދެވަނަ ލަނޑު 19 ވަނަ މިނެޓުގައި ކާމިޔާބުކޮށްދިނީ ޖޯލިންޓަންއެވެ.
މެޗުގައި ޔުނައިޓެޑުން ލަނޑެއް ކާމިޔާބު ކުރެވޭތޯ މަސައްކަތްކުރި ނަމަވެސް އެކަން ކާމިޔާބުވާގޮތެއް ނުވިއެވެ.
ޔުނައިޓެޑް އެންމެ ފަހުން އަމިއްލަ ދަނޑުގައި ޖެހިޖެހިގެން ތިން މެޗުން ބަލިވެފައިވަނީ 1979 ވަނަ އަހަރެވެ.
މި ނާކާމިޔާބީއާ އެކު ޔުނައިޓެޑް މި އަހަރު ނިންމާލީ 22 ޕޮއިންޓާ އެކު 14 ވަނައިގައި އޮވެގެންނެވެ. އަދި، 18 ވަނައިގައި އޮތް އިޕްސްވިޗް ޓައުންއާއި ޔުނައިޓެޑާ ދެމެދު މިހާރު އޮތީ ހަތް ޕޮއިންޓްގެ ތަފާތެއް ކަމުން ރެލިގޭޝަންގެ ބިރުވެރިކަން އެބައޮތް ކަމަށް ވެސް ބައެއް ފަރާތްތަކުން އަންނަނީ ބުނަމުންނެވެ.
މެޗު ކާމިޔާބުކުރުމާ އެކު ނިއުކާސްލް މިހާރު އޮތީ 32 ޕޮއިންޓާ އެކު ފަސްވަނައިގައެވެ.
މި މުބާރާތުގައި އެސްޓަން ވިލާއާއި ބްރައިޓަން އެންޑް ހޯވް އެލްބިއަން ބައްދަލުކުރި މެޗު 2-2 އިންވީ އެއްވަރެވެ.
އެ މެޗުގައި ބްރައިޓަންގެ ދެ ލަނޑު ކާމިޔާބުކޮށްދީފައިވަނީ ސައިމަން އަޑިންގްރާއާއި ޓާރިގް ލެމްޕްޓީއެވެ. އަދި، ވިލާގެ ދެ ލަނޑު ކާމިޔާބުކޮށްދީފައިވަނީ އޮލީ އޮޓްކިންސްއާއި މޯގަން ރޮޖާސްއެވެ.
މެޗު އެއްވަރުވުމުން ވިލާ 29 ޕޮއިންޓާ އެކު ނުވަވަނައިގައި އޮތްއިރު ބްރައިޓަން އޮތީ 27 ޕޮއިންޓާ އެކު 10 ވަނައިގައެވެ.