އާ އަހަރު ބަންދާ ދިމާކޮށް މުޅި ރާއްޖޭގެ މޫސުން ގޯސްވާނެ ކަމަށް ލަފާ ކުރެވޭއިރު, ކުރިއަށް އޮތް ފަސް ދުވަހު ރާއްޖޭގެ އެކި ހިސާބުތަކަށް, އުދަ އެރުމުގެ ފުރުސަތު ބޮޑުކަމަށް, މޫސުމާ ބެހޭ ގައުމީ އިދާރާ، (މެޓު) އޮފީހުން މިއަދު ބުނެފިއެވެ.
މެޓުން ބުނީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި، މި ކޮޅިގަނޑާ ގުޅިފައިވާ ލޯޕްރެޝާގެ ސަބަބުން އާ އަހަރު ބަންދުތެރޭގައި ރާއްޖޭގެ ބޮޑު ބަޔަކަށް ގުގުރުމާއެކު ބޯކޮށް ވާރޭވެހި، ވަޔާއި ކަނޑުތައް ގަދަވެ އަދި ބައެއް އަތޮޅުތަކަށް، އުދައެރުމުގެ ފުރުސަތު ބޮޑު ކަމަށެވެ.
ވައިޖެހޭނީ އުތުރާއި މެދުރާއްޖެތެރޭގެ އަތޮޅުތަކަށް، އުތުރާއި އިރު އުތުރުން، ދެކުނުގެ އަތޮޅުތަކަށް ހުނޅަގާއި ހުޅަނގުއުތުރުން ގަޑިޔަކު 15 މޭލާއި 25 މޭލާ ދެމެދުގެ ބާރުމިނެއްގައި ކަމަށް މެޓުން ލަފާ ކުރެއެވެ. އަދި ވިލާގަނޑުގައި ގަޑިއަކު ގާތްގަޑަކަށް 50 މޭލަށް ވައި ގަދަވާނެ ކަމަށް ވެސް ލަފާ ކުރެއެވެ.
އެހެންކަމުން ކަނޑުތައް އާއްމު ގޮތެއްގައި ގަދަވާނެ ކަމަށް މެޓުން ލަފާ ކުރެއެވެ.
މޫސުން ގޯސްވާނެ ކަމަށް ލަފާ ކުރެވޭއިރު އަންނަ އާދިއްތަ ދުވަހަކީ ޗުއްޓީއަކަށް ފަހު ސްކޫލުތައް ހުޅުވާ ދުވަހެވެ. އެހެންކަމުން ކުރިއަށް އޮތް ދެތިން ދުވަހުގެ ތެރޭގައި އަތޮޅުތެރެއާއި މާލެއާ ދެމެދު ގިނަ އަދަދެއްގެ ބަޔަކު ދަތުރު ކުރާނެ އެވެ.
މޫސުން ގޯސްވެފައިވާއިރު އާ އަހަރާ ދިމާކޮށް ރާއްޖޭގެ ގިނަ ރިސޯތްތަކަކާއި ގެސްޓްހައުސްތަކެއް ވެސް ވަނީ ފުލްވެފައެވެ.
ނިމިގެން ދިޔަ ބަންދު ހަފުތާތެރޭގައި ވެސް ވަނީ ބަންގާޅު ކަނޑުގައި ގޮޅިގަނޑެއް އުފެދި އޭގެ ސަބަބުން ރާއްޖޭގެ އެކި ހިސާބުތަކަށް ބޯކޮށް ވާރޭވެހި ގިނަ ގެއްލުންތަކެއް ލިބިފައެވެ.
މޫސުން ގޯސްވާ ދުވަސްވަރު، ކަނޑު ދަތުރުކުރުމުގެ ކުރިން މެޓު އޮފީހުން ނެރޭ އެލާޓުތަކަށް ސަމާލުވުމަށް އެ އިދާރާއިން އަބަދު ވެސް އިލްތިމާސް ކުރެއެވެ.