ދުނިޔެ ހޫނުވަމުން ދާނަމަ އިއްޔެގެ މަންޒަރު އިތުރަށް ތަކުރާރު ވާނެ ކަމަށް ވިދާޅުވެ، ކުރީގެ ރައީސް މުޙައްމަދު ނަޝީދު މިއަދު ކަންބޮޑުވުން ފާޅުކުރައްވައިފިއެވެ.
އިއްޔެ މެންދުރު ވެހެން ފެށި ވާރޭގައި މާލޭގެ ބޮޑުބައެއްގައި ވަނީ ވަރަށް ބޮޑަށް ފެން ބޮޑުވެފައެވެ. މާލޭ މަގުތަކުން 30،000 ޓަނަށްވުރެ ގިނަ ފެން ހިންދަން ޖެހުނެވެ.
އެ ކަމާ ގުޅިގެން ކަންބޮޑުވުން ފާޅުކުރައްވައި އެކްސްގައި މިއަދު ކުރެއްވި ޕޯސްޓެއްގައި، ތިމާވެށީގެ ކަންކަމާ އަބަދު ވެސް އަޑުއުފުއްލަވާ ނަޝީދު ވިދާޅުވީ، ދުނިޔެ ހޫނުވަމުން ދާނަމަ މި ފަދަ މަންޒަރުތައް ތަކުރާރުވެދާނެ ކަމަށެވެ. އެ މަނިކުފާނު ވިދާޅުވީ، ރާއްޖޭގެ ބައިވެރިވުމެއް ނެތި މޫސުމަށް އަންނަ ނޭދެވޭ ބަދަލުތަކުގެ އަގު ރާއްޖެއިން އަދާކުރަން ޖެހިފައިވާ ކަމަށެވެ.
ނަޝީދު ވަނީ މާލޭގެ މާފަންނުގައި އިއްޔެ ފެންބޮޑުވެ، އެ ސަރަހައްދުގައި ޕާކުކޮށްފައި ހުރި ސައިކަލުތައް ވެސް ވެއްޓިފައި ހުރި މަންޒަރު ހިއްސާކުރައްވައިފައެވެ. އެ ވީޑިއޯއިން ސައިކަލުތައް ވެއްޓި، އެއްކޮށްހެން ފެނުގެ އަޑީގައިވާ މަންޒަރު ފެނެއެވެ.
އިއްޔެ މުޅި މާލޭގައި ވަރަށް ބޮޑަށް ފެންބޮޑުވިއިރު އެކަމުގެ ސަބަބުން ޖުމުލަ 36 ގެއަކުން 226 މީހަކަށް ވަގުތީ ބޯހިޔާވަހިކަމާއި ކާނާގެ އެހީތެރިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ ބުނެފައެވެ.
ސިފައިން 21 ގަޑިއިރު ވަންދެން ކުރި މަސައްކަތުން މާލޭ މަގުތަކުން ފެން ހިންދުނީ މިއަދު ހެނދުނެވެ. އެއީ، 30،569 ޓަނުގެ ފެން ކަމަށް ސިފައިން ބުންޏެވެ.
މޫސުމާ ބެހޭ ގައުމީ އިދާރާއިން ވަނީ ދެން މަޑުމަޑުން މޫސުން ރަނގަޅުވާން ފަށާނެ ކަމަށް ލަފާކޮށްފައެވެ.