ސައުދީ އަރަބިއާގެ ޙާރިޖީ ވަޒީރު ޕްރިންސް ފައިސަލް ބިން ފަރްހާން ބިން ޢަބްދުﷲ ސައުދީ އަރަބިއާއަށް ޒިޔާރަތް ކުރެއްވުމަށް ދެއްވާފައިވާ ދައުވަތު ގަބޫލުފުޅު ކުރައްވާ ކަމަށާއި މަގާމާ ހަވާލުވެވަޑައިގަތުމަށްފަހު، ގައުމުން ބޭރަށް ވަޑައިގަންނަވާނެ ފުރަތަމަ ގައުމަކީ ސައުދީ އަރަބިއާ ކަމަށް ސޫރިއާގެ އާ ޚާރިޖީ ވަޒީރު ޢަސްޢަދު ޙަސަން އަލް ޝައިބާނީ ވިދާޅުވެއްޖެއެވެ.
"އަޅުގަނޑުގެ ފުރަތަމަ ރަސްމީ ދަތުރުގައި (ސައުދީ އަރަބިއާ ދަތުރު) ގައި އަޅުގަނޑުގެ ގައުމު ތަމްސީލު ކުރުމަކީ އަޅުގަނޑަށް ލިބުނު ޝަރަފެއް." ޝައިބާނީ އެކްސްގައި ކުރެއްވި ޕޯސްޓެއްގައި ލިޔުއްވާފައިވެއެވެ.
ސޫރިއާގެ ޚާރިޖީ ވަޒީރު ކަމަށް އެ ގައުމުގައި މިހާރު އޮތް ވަގުތީ ސަރުކާރުން ޝައިބާނީ އައްޔަންކުރީ މި މަހުގެ 21 ވަނަ ދުވަހުއެވެ.
ހޯމަ ދުވަހުގެ ދިމިޝްގުގައި ކުވޭތުގެ ޚާރިޖީ ވަޒީރު އަބްދުﷲ އަލް ޔަހްޔާއާ އެކު ބޭއްވި ނޫސްވެރިންގެ ބައްދަލުވުމެއްގައި ޝައިބާނީ ވިދާޅުވީ ސައުދީ އަރަބިއްޔާއަށް ކުރައްވާ ދަތުރުފުޅު ހަމަޖެހިފައިވަނީ އާ އަހަރުގެ ފުރަތަމަ ހަފުތާގައި ކަމަށެވެ.
ދިމިޝްގުގައި ހުންނަ ކުވޭތު އެމްބަސީ އަލުން ހުޅުވައި، ސޫރިއާއާއެކު އަލުން ގުޅުން އަލުން ގާއިމުކުރުމަށް ޝައިބާނީ ވަނީ ގޮވާލައްވާފައެވެ.
ޑިސެމްބަރު މަހުގެ އަށް ވަނަ ދުވަހު ސޫރިއާގެ ހަނގުރާމަވެރިން ކުރީގެ ރައީސް ބައްޝާރުލް އަސަދުގެ ޒަމާންވީ ވެރިކަން ވައްޓާލުމާ ގުޅިގެން އެ ސަރަހައްދުގެ ގައުމުތަކުން ވަނީ ސޫރިއާއާ އަލުން ގުޅުން ގާއިމު ކުރުމުގެ އިޝާރާތް ކޮށްފައެވެ.
ޔަހްޔާ އާއި ގަލްފް ކޯޕަރޭޝަން ކައުންސިލް (ޖީސީސީ)ގެ ސެކްރެޓަރީ ޖެނެރަލް ޖޭސެމް މުހައްމަދު އަލް ބުދައިވީ ވަނީ ސުރިއާގެ ވަގުތީ ލީޑަރު އަޙުމަދު އަލް ޝަރާއާ ވެސް މި ދަތުރުފުޅުގައި ބައްދަލު ކުރައްވާފައެވެ. އަލް ޔަހްޔާ ވިދާޅުވި ގޮތުގައި އެ ގައުމުން ވަނީ ސަރަހައްދީ ތަރައްގީތަކާއި އެއްބާރުލުން ދިނުމާ ގުޅޭ ގޮތުން ސޫރިއާއާއެކު މަޝްވަރާ ކޮށްފައެވެ.
ޔަހްޔާ ވަނީ ސޫރިއާއަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށް ވިސްނުމަށް ބައިނަލްއަގްވާމީ މުޖުތަމައުއަށް ގޮވާލާއްވާފައެވެ.
ކުވޭތުގެ އިތުރުން އަލް ޝަރާ ވަނީ ޔޫކްރޭނުގެ ޚާރިޖީ ވަޒިރާވެސް ދިމިޝްގުގައި ބައްދަލު ކުރައްވާފައެވެ. އެ ބައްދަލުވުމުގައި ދެ ގައުމުގެ ދެމެދުގައި ގާއިމު ކުރާ އާ ސްޓްރެޓެޖިކް ޕާޓްނާޝިޕްވެސް ވަނީ އިއުލާނުކުރައްވާފައެވެ.
ޔޫކްރޭންގެ އެންމެ އިސް ޑިޕްލޮމެޓް މި ދަތުރުފުޅު ކުރައްވާފައިވާއިރު، ކާބޯތަކެތީގެ އެހީގެ ގޮތުގައި އެ ގައުމުން ސޫރިއާއަށް ފޮނުވާ ފުރަތަމަ ބެޗްގައި ހިމެނޭ 500 ޓަނުގެ ގޮދަން ފުށް ސޫރިއާއަށް ވަނީ ފޯރުކޮށްދީފައެވެ.
އަލް ޖަޒީރާއިން ރިޕޯޓުކޮށްފައިވާ ގޮތުގައި ސޫރިއާގެ އާ ސަރުކާރަށް ތާއީދުކުރުމަށް ގައުމުތަކުގެ މަންދޫބުން އަންނަނީ އެ ގައުމަށް ޒިޔާރަތްކުރައްވަމުންނެވެ.
އިސްލާމިސްޓް ހަނގުރާމަވެރި ޖަމާއަތެއް ކަމަށްވާ ހަޔާތު ތަހުރީރު އަލް ޝާމް (އެޗްޓީއެސް) އިސްވެ އޮވެ ހަނގުރާމަވެރިންގެ ސޫރިއާގެ ސިޓީތައް ބާރުގެ ދަށަށް ގެނެސް، ވެރި ރަށް ދިމިޝްޤަށް އަރައިގަނެ ބައްޝާރުގެ ވެރިކަން ވައްޓާލީ މި މަހުގެ އަށް ވަނަ ދުވަހުއެވެ.
ބައްޝާރު ވެރިކަމުގައި ހުންނަވާތާ 24 އަހަރު ވެފައި ވާއިރު މިއީ އޭނާގެ ވެރިކަމުގެ ނިމުމުގެ އިތުރުން ސީރިއާ ކޮންޓްރޯލްކުރަމުން ދިޔަ ބައްޝާރުގެ އާއިލާގެ ވެރިކަމުގެވެސް ނިމުމެވެ. ބައްޝާރުގެ ކުރިން، މާޗް 14، 1971 އިން ފެށިގެން 2000 ވަނަ އަހަރަށް ވެރިކަން ކުރެއްވީ ބައްޕާފުޅު ހާފިޒުލް އަސަދެވެ. މިހާރު އުމުރުން 59 އަހަރުގެ ބައްޝާރު ވެރިކަމަށް ގެނައުމަށް، ވެރިކަން ކުރާ މީހެއްގެ އެންމެ ހަގު އުމުރު ސީރިއާގެ ގާނޫނުއަސާސީން އޭރު ވަނީ 40 އިން 34 އަހަރަށް ދަށްކޮށްފައެވެ.
ސޫރިއާގައި ދާޚިލީ ހަނގުރާމަ ފަށާފައި ވަނީ 2011 ވަނަ އަހަރު، ބައްޝާރުގެ ސަރުކާރާ ދެކޮޅަށް އެ ގައުމުގެ އާންމު ރައްޔިތުން ތެދުވުމާ ގުޅިގެންނެވެ.
ސޫރިޔަން އޮބްޒަވޭޓަރީ ފޯ ހިޔުމަން ރައިޓްސްއިން ބުނާ ގޮތުގައި، އެ ހަނގުރާމައިގައި މަރުވެފައިވާކަން ކަށަވަރު ކުރެވޭ މީހުންގެ އަދަދު 507,000 އަށްވުރެ މައްޗަށް އަރައެވެ.