ދިވެހިރާއްޖެއާ، 912 ކިލޯމީޓަރު ދުރަށް ބިންހެލުމެއް އަތުވެއްޖެއެވެ.
މޫސުމާ ބެހޭ ގައުމީ އިދާރާ، މެޓް އޮފީހުން ބުނި ގޮތުގައި މި ބިންހެލުން އައީ ކާލްސްބާގް ރިޖް އަށެވެ. ބިންހެލުން އައީ 4.7 މެގްނެޓިއުޑްގެ ބާރު މިނުގައެވެ.
މި ބިންހެލުން އައީ މިއަދު މެންދުރު 13:38 ހާއިރުއެވެ.
މެޓް އޮފީހުން ބުނި ގޮތުގައި މި ބިންހެލުމުގެ އަސަރު ރާއްޖެއަށް ކުރާނެ ކަމަކަށް ނުފެނެއެވެ.
މި ބިންހެލުން އައި ސަރަޙައްދާ މާލެއާ ހުރި ދުރުމިނަކީ 912 ކިލޯމީޓަރު ކަމަށް އެ އޮފީހުން ވަނީ މައުލޫމާތު ހިއްސާ ކޮށްފައެވެ.
ޖިއޯގްރަފީ ގޮތުން ބަލާއިރު ރާއްޖެއަކީ ތިރި، ޖަޒީރާ ރަށްތަކެކެވެ. އަދި ރާއްޖެ އޮތް ސަރަހައްދަކީ ބިންހެލުން މަދު ސަރަޙައްދެކެވެ. ނަމަވެސް ރާއްޖެއާ ކައިރި ސަރަޙައްދުތަކަށް އަންނަ ބިންހެލުމުގެ އަސަރު މީގެ ކުރިން ވެސް ރާއްޖެއަށް ކޮށްފައި އެބަހުއްޓެވެ.
އެގޮތުން 2004 ގައި އިންޑޮނޭޝިއާގެ ސުމަތުރާއަށް އައި ބިންހެލުމުގެ ސަބަބުން އުފެދުނު ސުނާމީއިން އެންމެ ބޮޑެތި ގެއްލުންތައްވި ގައުމުތަކުގެ ތެރޭގައި ރާއްޖެ ހިމެނެއެވެ. މިމަހުގެ 26 ގައި ވަނީ އެ ބިރުވެރި ހާދިސާއަށް 20 އަހަރު ފުރިފައެވެ.