ހޮނިހިރު ދުވަހުގެ ފަހުން ރާއްޖޭގެ ބޮޑު ހިސާބަކަށް މޫސުން ރަނގަޅުވާނެ ކަމަށް މޫސުމާ ބެހޭ ޤައުމީ އިދާރާ (މެޓް އޮފީހުން) މިއަދު ލަފާކޮށްފިއެވެ.
މެޓުން ބުނީި، ކުރިއަށް އޮތް 24 ގަޑިއިރު އުތުރާއި މެދު ރާއްޖެތެރޭގެ ރަށްތަކަށް ވިއްސާރަކުރާނެ ކަމަށާއި ބައެއް ރަށްތަކަށް ބޯކޮށް ވާރޭވެހޭނެ ކަމަށެވެ. ދެކުނަށް ވެސް ކެރީގެ އަސަރުކުރާނެ ކަމަށް ވަނީ ލަފާކޮށްފައެވެ.
ނަމަވެސް، ހޮނިހިރު ދުވަހުގެ ފަހުން މޫސުން ރަނގަޅުވާނެ ކަމަށް ލަފާކުރެވޭ ކަމަށް މެޓުން ވަނީ ބުނެފައެވެ.
ވިލާގަނޑުގައި ގަޑިއަކު 13 މޭލާއި 23 މޭލާ ދެމެދުގެ ބާރުމިނެއްގައި އުތުރާއި މެދު ރާއްޖެތެރެއަށް ވައިގަދަވާނެ ކަމަށާއި ދެކުނުގެ އަތޮޅުތަކަށް 18 މޭލަށް ވައިގަދަވާނެ ކަމަށް މެޓުން ވަނީ ލަފާކޮށްފައެވެ. އަދި، ވިލާގަނޑުގައި 40 މޭލަށް ވައިގަދަވާނެ ކަމަށް ވެސް ވަނީ ލަފާކޮށްފައެވެ.
މެޓް އޮފީހުން ބުނީ، ހޮނިހިރުގެ ފަހުން މޫސުން މަޑުމަޑުން ރަނގަޅުވާން ފަށާނެ ކަމަށް ލަފާކުރެވޭ ކަމަށެވެ. އެހާތަނަށް ކަނޑުތައް ވެސް މަޑުވާން ފަށާނެ ކަމަށް މެޓް އޮފީހުން ވަނީ ލަފާކޮށްފައެވެ.
މިހާރު ރާއްޖެއަށް ކުރަމުންދާ ވިއްސާރާގައި ގިނަ ރަށްރަށުގައި ވަނީ ފެންބޮޑުވެ، ބޮޑެތި ގެއްލުންތައް ލިބިފައެވެ. މާލޭގައި ވެސް ފެންބޮޑުވެ ގިނަ ގެއްލުންތައް ވަނީ ލިބިފައެވެ.
މިހާރު ކުރަމުންދާ ވިއްސާރަގައި ދިމާވެދާނެ ގެއްލުމަކުން ރައްކާތެރިވުމަށް ދުރާލާ ފިޔަވަޅު އެޅުމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ވަނީ މީގެ ކުރިން އިލްތިމާސްކޮށްފައެވެ.