ބިންވެރިޔާ ސްކީމާ ގުޅިގެން ދޫކުރި ގޯތިތަކުގެ މައްސަލައިގައި ތުހުމަތުކުރެވިގެން ޕާސްޕޯޓު ހިފެހެއްޓި މީހުންގެ ތެރެއިން ނުވަ މީހެއްގެ ޕާސްޕޯޓު ދޫކޮށްލާފައިވާ ކަމަށް ފުލުހުން މިއަދު ބުނެފިއެވެ.
މި މައްސަލައިގައި ޖުމުލަ 24 މީހެއްގެ ޕާސްޕޯޓު ހިފެހެއްޓިއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖެއްގައި ބުނީ، އެ މައްސަލައާ ގުޅިގެން ރާއްޖެއިން ބޭރަށް ފުރުން މަނާކުރި މީހުންގެ ތެރެއިން ނުވަ މީހެއްގެ މައްޗަށް ނެރެފައިވާ އަމުރު ބާތިލުކުރަން ނިންމާފައިވާ ކަމަށެވެ. އެކަމަކު، ޕާސްޕޯޓު ދޫކޮށްލި މީހުންގެ ތަފުސީލެއް ހާމަކޮށްފައެއް ނުވެއެވެ.
އެ ގޮތަށް ނިންމީ ޕްރޮސެކިއުޓާ ޖެނެރަލާ ވެސް މަޝްވަރާކުރެއްވުމަށް ފަހުގައި ކަމަށް ފުލުހުން ބުންޏެވެ.
ޖުމުލަ 24 މީހުންގެ ތެރެއިން ނުވަ މީހެއްގެ ޕާސްޕޯޓު ދޫކޮށްލި ނަމަވެސް މި މައްސަލައިގެ ތުހުމަތުގައި ޕާސްޕޯޓު ހިފެހެއްޓި، ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި އޭނާގެ ބޭބެ މުހައްމަދު ފަޒީލް ރަޝީދުގެ ޕާސްޕޯޓު ދޫކޮށްލާފައިނުވާ ކަމަށް ފުލުހުން ބުންޏެވެ.
ވަގު ލިޔުން ހަދައިގެން ޝަރުތުހަމަނުވާ ބަޔަކަށް ގޯތިދިން މައްސަލައާ ގުޅިގެން ފުލުހުން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި އެސިސްޓެންޓް ކޮމިޝަނަރު އޮފް ޕޮލިސް އަބްދުﷲ ޝަރީފް ވިދާޅުވީ، ތަހުގީގަށް ސުވާލުކުރި ފަރާތްތަކުން ބުނެފައިވަނީ ފޯޖުކުރި ލިޔުންތައް ދީފައި އޮތީ ކުރީ ސަރުކާރުގައި ކަމަށެވެ.
މި މައްސަލައިގައި ފުލުހުން ފަޒީލާ ސުވާލުކުރުމުން އޭނާ ވެސް ބުނެފައިވަނީ އެ ގޮތަށް ކަމަށް ޝަރީފް ވިދާޅުވިއެވެ.
އޭނާ ވިދާޅުވި ގޮތުގައި ގޯތި ނުލިބުމުން ފަޒީލް ވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާ ވެސް ބައްދަލުކޮށްފައެވެ.
ނަމަވެސް، މި ކަމާ ގުޅިގެން އަކްރަމް މިއަދު އެކްސްގައި ކުރެއްވި ޕޯސްޓެއްގައިވަނީ ފަޒީލާ އެއްވެސް މުއާމަލާތެއް ކޮށްފައިނުވާނެ ކަމަށާއި، އަދި ދުވަހަކު ދިމާވެފައި ވެސް ނުވާ ކަމަށް ވިދާޅުވެފައެވެ. އެއްވެސް ކަމެއްގައި އޭނާއާ ބައްދަލުކުރަން ފަޒީލް އެދިފައި ވެސް ނުވާ ކަމަށް އަކްރަމް ވިދާޅުވިއެވެ.
ގޯތި ވައްކަމުގެ މައްސަލަ ސަމާލުކަމަށް އައީ ފަޒީލް ރަޝީދުގެ ޝަރުތުހަމަނުވި ނަމަވެސް، އޭނާއަށް ގޯތި ދީފައިވާ ލިޔެކިޔުމެއް ސޯޝަލް މީޑިއާއަށް ލީކުވުމާ ގުޅިގެންނެވެ.
މި މައްސަލަ އެންޓި ކޮރަޕްޝަން ކޮމިޝަން (އޭސީސީ)އާ ގުޅިގެން ތަހުގީގުކުރަން ތައްޔާރުވަމުން އަންނައިރު، ފަޒުލް ހިމެނޭހެން އެޗްޑީސީގެ ބޯޑު މެންބަރުންތަކެއް ވަނީ ސަސްޕެންޑުކޮށްފައެވެ. ތަހުގީގަށް ފުރުސަތު ދެއްވަން ކަމަށް ވިދާޅުވެ، ފަޒުލް ފަހުން ވަނީ އެޗްޑީސީގެ މެނޭޖިން ޑިރެކްޓަރުކަމުން އިސްތިއުފާދެއްވައިފައެވެ. އޭނާގެ ބޭބެ ފަޒީލް ވެސް ވަނީ ސަސްޕެންޑުކޮށްފައެވެ.
ގޯތި ވައްކަމުގެ މައްސަލަ ތަހުގީގުކުރަމުން އަންނަނީ ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގުޅިގެންނެވެ.