އާ އަހަރެއް ފެށުމަށް ވަރަށް ގާތްވެފައިވާއިރު ހުރިހާ އެންމެންވެސް ތަފާތު އެކި ގޯލުތައް އަންނަނީ ކަނޑައަޅަމުންނެވެ. އެގޮތުން ރީތިވުމާއި މީހާގެ ރީތިކަން ދެމެހެއްޓުމަށްޓަކައިވެސް ގިނަ ބަޔަކު ގޯލުތައް ކަނޑައަޅައެވެ. މަޝްހޫރު ލަވަކިޔުންތެރިޔާ ރިއާނާ ވެސް އެގޮތުން ގޯލެއް ކަނޑައަޅައިފިއެވެ.
މަގުބޫލު ކޮސްމެޓިކް ބްރޭންޑް ފެންޓީގެ އޯނަރު ރިއާނާއަކީ އޭނާގެ ހަންގަނޑު ދުޅަހެޔޮކަން މަތީގައި ބެހެއްޓުމަށްޓަކައި ތަފާތު މަސައްކަތް ކުރާ ތަރިއެކެވެ. އެ ވިސްނުމުގައި ފެންޓީ ލޯންޗު ކުރީ އެކި ކުލައިގެ ހަންގަނޑުތަކަށް އިސްކަމެއް ދީ ތަފާތު އެކި ކަހަލަ ދަތިތަކަށް އަލި އަޅުވާލައިގެންނެވެ.
ދާދިފަހުން "އިންސްޓައިލް" އަށް ދިން އިންޓަވިއުއެއްގައި ރިއާނާ ބުނެފައިވަނީ އޭނާގެ މޫނުގެ ހަންގަނޑުގެ ދުޅަހެޔޮ ކަމަށް ތަފާތު މަސައްކަތް ކުރާ ކަމަށެވެ. އެގޮތުން ކްލެންޒާ އާއި ޓޯނާ އަދި މޮއިސްޗަރައިޒާ އެއްވެސް ވަރަކަށް ހުއްޓާލުމެއް ނެތި އަބަދުވެސް ބޭނުން ކުރާ ކަމަށް އޭނާ ބުންޏެވެ.
ނަމަވެސް ހަމުގެ ދުޅަހެޔޮ ކަމަށްޓަކައި އާ ގޯލުތަކެއް ކަނޑައަޅާފައިވާ ކަމަށް އޭނާ ބުންޏެވެ. އޭގެތެރެއިން އެންމެ މުހިއްމު ކަމަކީ ގިނައިން ނިދުމަށް މަސައްކަތް ކުރުން ކަމަށް އޭނާ ބުނެއެވެ.
ގަވާއިދުން ފެން ބުއިމާއި ގަޑި ހަމަކޮށްގެން ނިދުމަކީ ޑާމަޓޯލަޖިސްޓުން ވެސް ހަމުގެ ދުޅަހެޔޮކަމަށް ދޭ ވަރުގަދަ ދެ ލަފައެވެ.
ރިއާނާ ބުނާގޮތުގައި ނިދުމަކީ ކޮންމެ އަހަރަކު ވެސް އަހަރަށް ހިތުލާ ކަމެއް ކަމަށެވެ. ނަމަވެސް އޭނާ ދިރިއުޅުމަށް އިތުރު މެމްބަރުން ލިބުމާއެކު ނިދީގެ މުހިއްމުކަން އިތުރަށް އެނގޭ ކަމަށް ވެސް ރިއާނާ ބުންޏެވެ. ދަރިން ބަލަމުން ނިދި ހަމަކުރުމަކީ އުނދަގޫ ކަމަކަށް ވި ނަމަވެސް އަންނަ އަހަރާއެކު އަށް ގަޑިއިރުގެ ނިދި ހޯދުމަށް މަސައްކަތް ކުރާނެ ކަމަށް ރިއާނާ ވަނީ ބުނެފައެވެ.