ހޮލީވުޑްގެ ތަފާތު ބޮޑެތި ހިޓް ފިލްމުތަކުން ފެނިގެންގޮސްފައިވާ އެކްޓަރު އެރަން ޓޭލާ ޖޯންސަން ރާއްޖޭގައި ޗުއްޓީ ހޭދަކުރަމުން އެބަ ދެއެވެ.
މާވެލް އަދި އެނޫންވެސް ބޮޑެތި ފްރެންޗައިޒްތަކުން ވެސް ފެނިގެން ގޮސްފައިވާ އެރަން ހޮލީވުޑްގެ ބިޒީ އަހަރަކަށް ފަހު ޗުއްޓީ ހޭދަކޮށްލުމަށް ރާއްޖެ އައިސްފައިވަނީ މީގެ ދެ ދުވަހެއް ކުރީންނެވެ. އޭނާ ރާއްޖޭގައި ޗުއްޓީ ހޭދަކުރަމުން ދަނީ ސޮނޭވާ ޖާނީގައެވެ.
ރާއްޖެ އައިސް ޗުއްޓީ ހޭދަކުރަމުންދާ މަންޒަރުތައް އޭނާ އަންނަނީ ސޯޝަލް މީޑިއާގައި ހިއްސާ ކުރަމުންނެވެ. އެގޮތުން އޭނާ ރާއްޖެ އައިސް މިވަގުތު ޗުއްޓީ ހޭދަކުރަމުންދަނީ އޭނާގެ އަންހެނުން، މަޝްހޫރު ޕްރޮޑިއުސަރު ސޭމް ޓޭލާ ޖޯންސަން އާއެކުގައެވެ.
View this post on Instagram
ހޮލީވުޑްގައި ގިނަ އަހަރުތަކެއް މަސައްކަތް ކުރި ނަމަވެސް މި ފާއިތުވި އަހަރުތަކުގައި އެރަން އެހާ ފާހަގަކުރެވޭ ރޯލުތަކަކުން ފެނިގެން ގޮސްފައެއް ނުވެއެވެ. ނަމަވެސް މިދިޔަ އަހަރު ވެގެން ދިޔައީ އޭނާއަށް ވަރަށް ބޮޑު އަހަރަކަށެވެ. އާންމުކޮށް އަހަރަކަށް އެއް ފިލްމު ވަރުން ފެނިގެން ދިޔަ އެރަން މިދިޔަ އަހަރު ވަނީ ތިން ފިލްމުން ފެނިގެން ގޮސްފައެވެ. މި ތިން ފިލްމުން ވެސް އޭނާ ވަނީ ލީޑު ރޯލުން ފެނިގެން ގޮސްފައެވެ.
އޭނާ މިދިޔަ އަހަރު ފެނިގެން ގޮސްފައިވާ ފިލްމުތަކަކީ "ފޯލް ގާއި" އާއި "ކްރޭވެން" އަދި "ނޮސްފަރާޓޫ" އެވެ. ނޮސްފަރާޓޫއަށް ބޮޑު ތަރުހީބެއް ލިބެމުން އަންނައިރު މި ފިލްމު މި ވަގުތު އަދި އޮތީ ސިނަމާތަކުގައެވެ. ފިލްމުގައި އެރަންގެ ރޯލުގެ އިތުރުން އިތުރު ލީޑު އެކްޓަރު ލިލީ ޑެޕް ރޯޒްގެ އެކްޓިން ހުނަރަށް އަންނަނީ ގިނަ ބައެއްގެ ތަރުހީބު ލިބެމުންނެވެ.