ކާމިޔާބު ރީތި ލޯބީގެ ފިލްމުތައް ގެނެސްދީފައިވާ މަގުބޫލު ޑައިރެކްޓަރު ސޫރަޖު ބަރަޖްތިއާ ދާދި ފަހުން ވަނީ އޭނާ އަލަށް އުފައްދަން ނިންމާފައިވާ ފިލްމަށް އާ ޕްރޭމްއެއް ލިބިފައިވާ ކަމަށް ބުނެފައެވެ.
ކުރިން ސަލްމާން ޚާން ލީޑް ރޯލަށް ގެންނަން ނިންމި ފިލްމު މިހާރު އެކްޓަރު އަޔުޝްމާނު ކުރާނާއާ އެކު އުފައްދަން ނިންމާފައިވާ ކަމަށް ރިޕޯޓުތަކުން ބުނެފައި ވާއިރު ފިލްމުގެ ބަތަލާގެ ރޯލަށް ބޮލީވުޑްގެ ޒުވާން ދެ ފިލްމީ ތަރިން ވާދަކުރާ ކަމަށް ފިލްމީ ޚަބަރުތައް ބުނެއެވެ.
ފިލްމީ ޚަބަރުތައް ގެނެސްދޭ މިޑްޑޭގައި ބުނެފައިވާ ގޮތުގައި މި ފިލްމުގެ ބަތަލާގެ ރޯލަށް ފިލްމީ ތަރިން ކަމަށްވާ ސާރާ އަލީ ޚާން އަދި ތުރިޕްތީ ދިމްރީ ވަނީ ޝޯޓު ލިސްޓު ކޮށްފައެވެ.
މިޑްޑޭގައި ބުނެފައިވާ ގޮތުގައި ދެ ބަތަލާއިންނާ އެކު ވެސް ފިލްމުގެ ސްކްރިޕްޓް މަޝްވަރާ ކުރެވެމުން ދާއިރު ސޫރަޖްގެ ފިލްމުތަކުގެ ބަތަލާއިންގެ ކިބައިގައި ހުންނަ ހުރިހާ ސިފަތަކެއް ވެސް މި ދެ ބަތަލާއިންގެ އެބަހުއްޓެވެ.
ޑައިރެކްޓަރު ސޫރަޖު ބަރަޖަތިއާގެ ފިލްމަށް ވާދަކުރާ ދެ ބަތަލާއިން ކަމަށްވާ ތުރިޕްތ އަދި ސާރާ--ފޮޓޯ/މިޑްޑޭ
އެހެންކަމުން ފިލްމަށް ހޮވާނީ ކޮން ބަތަލާއެއްކަން ހޮވުމަކީ ސޫރަޖްއަށް ފަސޭހަ ނިންމުމަކަށް ނުވާނެ ކަމަށް ރިޕޯޓުތައް ބުނެއެވެ. ސަރާ އަލީ ޚާން އެކްޓަރު އަޔުޝްމާންއާ އެކު މިހާރު ވެސް ފިލްމެއްގެ މަސައްކަތް ކުރަމުން އަންނައިރު ބަތަލާ ތުރިޕްތީ އަކީ މިވަގުތު ފިލްމު އިންޑަސްޓްރީގައި ތިބި އެންމެ ޑިމާންޑު ބޮޑު ބަތަލާއިންގެ ތެރޭ ހިމެނޭ ތަރިއެކެވެ.
ފިލްމީ ޚަބަރުތައް ބުނާގޮތުން ސޫރަޖް ވަނީ މި ފެށޭ ޖަނަވަރީ މަހުތެރޭ މި ދެ ބަތަލާއިންގެ ސްކްރީން ޓެސްޓެއް ހަދަން ނިންމާފައެވެ.
އަޔުޝްމާންއާ އެކު ސޫރަޖް މަސައްކަތް ފަށަން ނިންމި މި ފިލްމާ ބެހޭ މާ ބޮޑު ތަފުސީލު މީޑިއާތަކާ ހާމަކޮށްފައި ނެތް ނަމަވެސް މިއީ އެކްޓަރު ސަލްމާން ޚާން ހިމަނައިގެން ޑައިރެކްޓަރު އުފައްދަން ނިންމި "ޕްރޭމް ކީ ޝާދީ" ނަމަކަށް ކިޔާ ފިލްމެއް ކަމަށް ރިޕޯޓުތައް ބުނެއެވެ. މި ފިލްމު ސިނަމާތަކަށް ގެންނަން ނިންމާފައި ވަނީ 2026ވަނަ އަހަރުއެވެ.